Pathian Thluachuah Nunpi a Herh
Phungthlukbia 31:10-13,19-20,30-31; Psalm 127(128):1-5; 1Theselon 5:1-6; Matthew 25:14-30
Phungthlukbia chungah zeitindah a kan cawnpiak tiah cun, “nupi ṭha cu hlawn nakin tampi aman a sung deuh. Cu bantuk nupi ṭha cu hmuh a har ngaingai,” a ti. Nupi ṭha he khan nihin na nunnak a tahchunh. “A va nih aa bochan i, a va cu a si a fak bal lo. A va caah a nunchung vialte ṭhatnak kha a tuah. Zumh awktlak tein nun a thiam. Cu bantukin Pathian pekmi veel laksawng kha ṭha tein Pathian caah a hman,” a ti. “A chungkhar caah bochan awk le zumh awktlak a si bantukin Pathian pekmi talen cu a hman thiam,” a ti.
Cun voihnihnak kan relnak ah Mithiang Paul nih: “Bawipa a rat lainak ni le caan hi nikhat hna a herh lo tiah u le nau hna nih nan va ruah sual lai,” a ti. “Zeicahtiah zaan ah mifir a rat bantuk khin Bawipa ni cu a ra lai, kan theih lo kar ah a rak lai,” a ti. “Nannih cu nan dihlak in ceunak nan si. Cucaah chun mi hna nan si, zaan muihnak mi hna nan si ti lo,” a ti. Thesalone khua ah Khrihfa an rak lut i Thlasalone khuami hna kha Khrihfa nan si cang tiah a ti hna. Muihnak fa nan si lo, midang bantukin aa hngilh ding nan si ti lo. Nannih cu ceunak fa nan si cang, i hngilh ti hlah u,” a ti.
Cucaah Khrihfa kan zumhnak ah hin zong cu bantukin Bawipa pekmi thluachuahpi cu nunnakpi le ceunakpi ding a si timi kha a kan cawnpiak. “Khirhfa nan si caah ceunak fa nan si cang, muihnak fa nan si lo,” a ti.
Thawngṭhabia chungah: “Vancung pennak cu khual a tlawng i a sal vialte kha ṭha tein talen a pektakmi hna” he khan tahchunhnak kha a kan cawnpiak. Cucu a sal le hna kha anmah le an thilti khawh ning cio khan ngun tangka kha a pek hna a ti. Pakhat cu talen thongnga, pakhat cu talen thonghnih, pakhat cu thongkhat ti te hna khan fiang tein a kan cawnpiak. Cu hnuah khual a tlawng i a rak phanh ṭhan tikah thongnga a ngahmipa kha, ra tuah kan pektakmi tangka cu zeitindah na hman a ti tikah, “Bawipa mah thongnga tein khan chawlehnak ah ka va kal i amiak thongnga ka hmuh i tuhi thonghra ka ngei,” tiah a ti i thonghra kha a va pek.
Cu tikah a bawipa nih, “salṭha nang cu thil hmete ah khan zumh awktlak na si. cucaah nangmah cu thil nganpi zong kha ṭuanvo kan pek. Cucaah hika ah hin rak lut tuah, keimah rawldumnak rak lut tuah, a ti lai” a ti. Cu hnuah thonghnih a pekmipa kha a auh ṭhan i, “zeitindah na tuahmi cu a si?” tiah a hal tikah, “thonghnih tein khan atu chawlehnak ka va tuah i atu hi thonghnih amiak in ka rak put i a zaten thongli a si,” a ti. “Sal ṭha, cu bantukin thil hmete ah khan zumh awktlak in na um caah khan nang cu thil nganpi zong kha zumh awktlak in pek na si lai, ṭuanvo pek na si lai,” a ti. Thongkhat te a pekmi pa cu a ra i, “Bawipa nangmah cu na tuh lonak ah khan na zun, cun na vorhnak te hna ah khan nangmah nih thlaici te hna kha na lak ti kha ka theih caah khan ka ṭih i vawlei ah ka thuh ko. Cucaah hi na phaisa thongkhat cu a um ko,” a ti. “Sal chia, thathu pawl amah sinin khan atu a ngeimi kha va lak ulaw thonghra a ngeimi pa kha va pek u. Amah kha khuamuihnak ah khan va hlonh u law, hacang rialnak le muihnak ah khan va chia u,” a ti. Mah talen thongnga le thonghnih le thongkhat timi cu nihin Pathian nih thluachuah laksawngpi kha kan zaten a kan pek tikah amah ningte khan kan pek i kan covo cio kha kan ngei.
Sihmanhsehlaw Khrihfa kan si hnuah Pathian nih a kan pekmi covo te kha zei rel loin Khrihfa kan si timi amin lawnglawng in kan si i ṭhatnak kan tuah lo, Khrih bantukin Khrih zumhnak kha vawlei ah a karh ding le, cun Mission kan timi Pathian thawngṭhabia te hna, cun Pathian rianṭuan te hna kha ṭuan loin kan tha a thut a si ahcun thongkhat a ngeimi bantukin kan ngeihmi vialte chuh dih kan si lai i a hnu ah khoika dah kan kal lai? Hell ah kan kal lai. Vancung Pennak he kan i tlak lai lo. Cucaah nihin Pathian nih a kan pekmi laksawng ciote kha ṭuan cio usih, zum cio usih.
Kan zumhnak lawng nih a ngah lo,ṭuan u timi talanpi kha ṭuanvo kha kan ṭuan a hau. Cucaah nih zumhnak timi lawngin a ngah lo cu tah! Zeidah a herh? Talen a kan pekmi vialte kha kan hman thiam i thongnga pek i thongnga amiak va tuah i thonghra a hmumi pa bantuk khan nihin ah full bantukin Pathian duh ningte khan kal in Pathian duh ningte khan a ṭuan khomi, a nung khomi kha nihin Pathian nih a kan duh. Cucaah khual a tlawngmi Bawipa nih talen a pektakmi cu nihin ah Khrih cu vawlei cungah a um ti lo. Amah nih khan a cawnpiak hna i, Lamkaltu zong kha cawnpiak dingin ṭuanvo a pek hna i, “vawlei caan a dongh tiang kan umpi hna lai” timi cawnpiaknak vialte zong a chimhtak hna. Cucaah kannih cu Pathian zummi kan si caah Pathian a zum rih lomi vawlei mi hna sin zongah va kal in, Khrihfa a si rih lomi hna zong thawngṭhabia chim in mah talen pi kha tamdeuh a ngahmi nih tamdeuh chuahpi ding le vancung pennak lampi le zulh ding kha nihin ah a kan cawnpiak.
Nihin kan zumhnak cu Pathian nih a kan pekmi Khrihfa kan sinak kha a si i talen bantuk a simi Pathian thawngṭhabia le nihin ah nun ṭhatnak le vancung pennak le nihin Pathian laksawngpi cu a karh chinchin dingah nihin Pathian duhnak bantukin a nungmi kan sinak hnga kan zumhnak le kan tuahnak cu nihin ah talen thongnga a ngami bantukin i zuam cio hna usih.
Thazaang petu /- Fr. Dominic Kung Tial