PATHIAN PENNAK CU NAN CHUNGAH PEI A UM CU!

Bawi Khrih ah dawtmi u le nau hna, Hakha Service RVA a ngai a zohtu nan dihlak cungah Bawipa thluachuahnak um ko seh. Tutan ah kan nu Bupi nih a kan timhpiakmi (Lk. 17:20-25) chungah kan rel lai. 

Farasi mi a cheu nih Jesuh cu, “zeitikah dah Pathian pennak cu a tlun lai,” tiah an hal. Anih nih a leh hna i, “Pathian pennak cu hmuh awk in a ra lo. Ahohmanh nih, “zohhmanh hika ah a um hih! Khika ah a um khih! an ti kho lo. Zeicahtiah Pathian pennak cu nan chungah pei a um cu,” tiah a ti hna. Cun a zultu kha a thawh hna i, “nannih nih Mi Fapa ni kha hmuh kan hei duh dah, nan ti caan a phan te lai. Sihmanhsehlaw nan hmu lai lo. “Khika lei khi zoh hmanh u! Hika lei hi zoh hmah u, tiah an timi hna an um lai. Sihmanhsehlaw cu zoh awk ahcun va chuak hlah u. Nimtlau cu vankam khattalei kam in khattalei kam ah aa lek i, van cu a cheuh bantuk khin Mi Fapa cu amah ni ahcun a si ve lai. Sihmansehlaw a ingtuar hmasat le tuchan mi hna nih an hlawt hmasa kha a herh lai.” Bawipa thawngṭhabia a si. 

Nihin kan nu Bupi nih Mithiang Josaphat puai sunglawi ngaiin a kan tuahpiak ni a si. Hi Mithiang Josaphat hi (1580) kum ah Ukraine ram Valadimir khua ah a chuakmi a si. Siangbawi cannak ah a lut i, Siangbawi a can hnu ah hin dinfelnak le amah le amah kha aa sum i, sumnak he a nung i Rome Khrihfabu le Orthodox Khrihfabu pumkhat in can ṭhan khawhnak dingah a nunnak le a thazaang dihlak in aa zuam ngaingaimi pakhat a rak si. Kha ti khan a rak um i (1617) kum ah hin Polotsk khua i Bishop pakhat cang dingah thimnak a rak hmuh. 

Bishop a can hnu zongah a rianṭuannak kha teinak, a mission rianṭuannak ah teinak a hmuh ngaingai caah Orthodox Khrihfabu hna nih an nahchuah i an thin a hunter ngaingai hna i, cucaah annih Josaphat kha zeitin an ti ti a si ahcun, “Thlarua a firtu” tiin an auh phah. Cuticun Josaphat cu rian a rak ṭuan i zeitindah a ti ti a si ahcun, “Keimah cu Rome Khrihfa hna he hmunkhat in um dingah le St. Peter (Pope) i nawlngeihnak le uknak caah hin thih dingin timhciate ka si,” tiah a ti. A biaknak (Rome Khrihfabu biaknak) aa ṭanh i, Mithiang Peter (Pope) i uknak nawl ngeihnak caah hin kei cu ready ka si, thihnak tiang hmanh ka ngamh, tiah a nunnak dihlak in aa pe i hi kan Bawipa Pathian i (kan Bawipa Jesuh Khrh i) a dirhtakmi a Bupi caah nunnak pek tiangin timhcia tein ka um tiah ralṭha ngaingai in pumkhat can dingah hin khua a rak khangmi a rak i zuam ngaingaimi Mithiang pakhat a rak si. 

Cutikah (1623) kum ah biakinn ah zing thlacam awkah a va kal tikah khin cu biakinn a kal lioah cun biaknak leiin a pialsualmi biaknak aa ṭnahtukmi hna nih meithal kahnak in a nunnak a liammi Mithiang Josaphat pakhat a rak si ti kha nihin a puai kan tuahmi Mithiang Josaphat puai a konglam kha tlawmte ruah kan duh hna. Hi Mithiang Josaphat hi biaknak caah pumkhat cang dingah (Orthodox le Rome Khrihfa hna pumkhat cang ṭhan dingah) aa zuam ngaingaimi Mithiang pakhat a rak si ti hi nihin ah kan hmuh khawhmi a si. Nihin bible gospel chungah kan zoh tikah zeidah kan hmuh ti a si ahcun kan Bawipa Jesuh Khrih kha Farasi cheukhat hna nih, “Pathian pennak kha zeitikdah a tlun lai,” ti kha an hal tikah a lehmi hna cu, “Pathian pennak cu hmuh awk in a ra lo,” a ti. 

Ahohmanh nih zoh hmanh u, khika ah khin a um khi! Hika ah hin a um khi an ti kho lai lo, a ti. Zeicahtiah Pathian pennak cu nan chungah pei a um cu, a ti. Pathian pennak nihin kan chungah a um ti hi kan Bawipa Jesuh Khrih nih a kan chimh. Cucaah pakhatnak ah Pathian pennak cu minung pakhat, Khrihfa pakhat cio kan lungthin chungah a um ti hi kan i hngalh awk a si. Zeitindah a um ti a si ahcun kan biakmi kan Pathian kha kan lungthin dihlak, kan ruahnak dihlak, kan thazaang dihlak in kan dawt tikah Pathian pennak cu nihin kan chungah a um ti kha fiang tein kan hmuh khawhmi a si. 

Cucaah kan Bawipa Jesuh Khrih nih amah kha lungthin dihlak, thazaang dihlak, nunnak dihlak in dawt dingah cu Pathian cu kan dawt a si ahcun amah zong kan chungah a um lai. “Kei a ka dawtmi cu ka nawlbia kha an zulh lai.” Cun nihin Alleluia chungah, “Keimah cu mitsur ruang ka si. Keimah cungah nan um ahcun nan chungah kei zong ka um lai,” tiah nihin a kan ti. Cucaah Pathian kha kan dawt i Pathian he pumkhat kan si ahcun kan nunnak dihlak, kan thazaang dihlak, kan ruahnak dihlak in kan dawt ko a si ahcun Pathian pennak kan chungah a um ti kha fiang tein kan hmuh khawhmi a si. 

Cuve bantuk tein pahnihnak ah kan Bawipa Jesuh Khrih nih a kan cahmi, nawlbia a kan pekmi chung zongah zeitin kan hmuh ti a si ahcun, “Pathian pennak kan chung, kan lakah a um ti kan hngalhnak cu mah le mah he aa naihmi kan innpa chakthlang hna kan dawt tikah, kan zohkhenh hna tikah kanmah kan i dawt bantukin kan dawt hna tikah Pathian pennak cu kan chungah a um ve ti kha nihin ah kan hmuh khawhmi a si. Cucu kan karlak ah, kan khuatlang lakah, Khrihfabu chungah kan minung hawi hna kha kanmah kan i dawt bantukin kan dawt hna tikah Pathian pennak kan chungah a um ti kha nihin ah kan hmuh khawhmi a si. 

Cucaah dawtmi u le nau hna, Pathian pennak cu khika ah, hika ah a um ti hmuh awk in a ra lai lo, a ti. Nimtlau bantukin nimtlau cu van khattalei kam in khattalei kam aa let i van cu a ceu bantuk khin Mi Fapa cu amah ni ahcun a si ve lai, a ti. Hika khi zoh hmanh u! Khika khi zoh hmanh u! tiin a um lai lo, a ti. Hmuh awk in a ra lo, Pathian pennak cu nan cungah pei a um ko cu, a ti. Kan chungah a ummi Pathian pennak, kan lakah a ummi Pathian pennak a si bantuk tein nifatin kan nunnak hi amah sunparnak caah, amah ram kauhnak caah a hmang khomi kan sinak hnga i zuam cio usih. 

Na pennak tlung cang ko seh, tiah thlacam in kan nunnak ah kan hawi minung sinah dawtnak, kan Pa Pathian sinah kan Pa Pathian kan nunnak dihlak in, kan thazaang dihlak in, kan ruahnak dihlak in a dawt khomi kan sinak hnga le kan minung hawi, innpa chakthlang kan dawtnak kan langhter tikah Pathian pennak kan sinah a um a kan ti bantuk tein Pathian pennak cu kan lungthin chung, kan nunnak chungah siseh, kan innpa chakthlang sinah siseh a tlanghter khomi an um bantuk tein a langhter khomi fanu/fapa ṭha kan si khawhnak ding caah i zuam cio usih ti in thazaang pek le ruah kan duh hna. 

Thazaang petu /- Saya William