Pope nih Argentina mino hna sin ah, Pathian kawhnak aw ngai i a hnu zulh cu zeitik hmanh ah a tlai bal lo tiah a ti

Cawn nihnih ni ah, Argentina ram, Buenos Aires khualipi ah Pope Leo 14 cu mino ting hra (one million) hrawng he i tonnak le thlacamṭi nak an ngei. Argentina mino hna kha thlacamnak ah Khrih sin rat dingah a sawm hna i Pathian kawhnak aw ngaih awk le zulh awk ah zeitik hmanh ah a tlai bal lo tiah Pope nih a ti. Cupin ah, Argentina Khrihfa hna nih vawlei cung ah Khrih dawtnak mei-alh si awk ah thazaang a pek hna i cu mei-alh ceu nih minung kan lungthin a thianter i a tlingmi zaangfah dawtnak a kan ngeihter tiah a chim chap. Prophet Daniel cauk chung ah, milem biak duh lo ruangah Babilon ram in tlangval pathum hna meiphu chungah paih an sinak tuanbia kha a chim.

 Nebuchadnezzar siangpahrang nawlpeknak in mizapi nih lukun in milem an biak lio ah, tlangval pathum nih cun milem an bia duh lo i, an zumnak kha an hlaw duh lo i daitein an um tiah Pope nih a chim. Cu bantuk zumhnak fekmi nunnak cu zeitluk in dah zalonnak a um? Siangpahrang sin in a ra dingmi dantatnak kha an hngal ko nain, Pathian sin lawng ah lunglawmhnak an hmuh lai ti kha an hngalh. Tu chan ah, a thurhnawmmi hmanthlak le rithai sii i sal sinak hmai ah lukun ding in tukforhnak kan tong. Nihin zongah, milem tampi an hung chuak i kan bia u tiah an kan ti. Cu hna cu konglam a phunphun in hlawhtlinnak le rumnak tangka chawva in siseh, aparpavuan lenglang zoh dawhnak, minthannak le a dong kholo mi taksa nuamhnak hna an si. Nunnak a pe kho lomi vawlei thilri chawhlawn hmai ah kun in bia hlah. Cu hna hmai i na tluuk sual ahcun tho ṭhan ko. Pathian pekmi luatnak le zalonnak kha zei thil hmanh nih, ahohmanh i chuhter hna hlah, tiah Pope nih a ti. Mi vialte cu Khrih sin ah, Khrih he hmun khat ah, Khrih bantuk in nunnak Khrihfa hna nunnak sullam le Khrih zult hna nunnak sullam kha Pope nih hrilhfiahnak a tuah. Bawipa nih amah bantuk si khawhnak caan ṭha tampi a kan pek. Nan nunnak cu Thawngṭha ṭialnak catlaap ah cang sehlaw, zaangfahnak cati in ṭialmi si hram she. Cuticun nanmah an hmu mi hna nih Jesuh dawtnak le lawmhnak kha nan chungah an hmuh khawh lai tiah a ti.