Midang thil cungah zumh awktlakmi na si maw?
Nihin caan ṭha caan sunglawi a kan zaangfah ṭhantu kan Pathian a hmasabik amin thiang thangṭhat si ko seh. Nihin RVA Pathian bia thazaang a latu zumtu hna nan dihlak cungah Bawipa nih thluachuah in pe ko hna seh. Nihin thawngṭhabia (Lk. 16:9-15) tiang a si lai. A tawinak in kan rel lai.
“Midang thil a simi ah zumh awktlak na si lo ahcun aho nih dah nangmah ta a simi thil cu an pek hna lai. Farasi mi nih hi a chimmi vialte cu an theih tikah annih cu tangka a duhmi an si caah amah kha an nihsawh. Jesuh nih a thawh hna i, “nannih hi minung mithmuh i miding aa lawhtermi pawl nan si, sihmanhsehlaw Pathian mithmuh ahcun nan lungthin cu an hngalh dih ko. Zeicahtiah minung nih mansung ngaiin an hmuhmi cu Pathian mithmuh ahcun pakpalawng a si ko.”
Thawngṭhabia chungin tlangtar ka duhmi midang thil cungah zumh awktlakmi na si maw? timi in thazaang lak hna usih. Nang cu a hmun lomi chaw le vaa ah zumh awktlak lomi na si ahcun zungzal a hmunmi zumhnak taktak cu aho nih dah an pek khawh lai. Tangka cu minung kan nunnak caah a herhtukmi a si ko. Tangka cu kan ngeih lo tikah minung cu kan si kho hrimhrim lo. Tangka cu tamtuk kan ngeih tikah kan lungre a thei i kan thin a phang chinchin. Tangka cu minung kan caah a herhtukmi a si ko. Asinain hakkauhnak ruangah piahtana a phunphun a chuahtertu cu tangka a si i zungzal nunnak sunghnak lei zongah a phaktertu zong a si kho. Tangka duhtuknak le hakkauhnak cu kan i ralrin thiam lo ahcun tangka cu Pathian he a kan hlattertu, a kan ṭhentertu zong a si kho.
Chaw le vaa a ngeitu hi kanmah kan si lo, Pathian a si. Caan tawite kan nunchung ca lawngah Bawipa nih a kan pekmi a si. Bawipa a chaw le va a kengtu kan si. Dawtu Pathian nih kan nunnak lamhruai loin tangka nih a ukmi le lam a hruaimi kan tampi ko. Tangka cu minung kan nunnak caah hman dingin dawtu Pathian nih a kan pekmi a si ko. Asinain minung nih hman loin tangka nih minung a hmanmi, lam a hruaimi kan tamtuk cang. Kan nunnak ram ah dawtu Pathian hmunhma la loin tangka tu nih hmunhma a lakmi kan tamtuk cang.
(1Tim. 6:10) ah, “tangka duhnak hi ṭhatlonak a phunkip a chuahnak a hram a si. Mi a cheu cu tangka ngeih an duhtuk ruangah zumhnak kha an kaltak i, ngaihchiatnak a phunphun an tong. (Mt. 26:14-15) ah, “Judah sinin tlangbawi upa pawl hna cu, “Jesuh nih nan kutchung ah kan chanh hna lai, zeidah na kan pek lai, tiah a ti hna. “Tangka sawmthum” tiah an ti i an rel piak i an pek. Judah le Pathian a hlattertu le nunak a sunghtertu cu tangka a si. Pathian nih thluachuah a kan pekmi hi a hman zia i thiam usih. (Eph. 4:11-13) ah, Mithiang Paul nih hitihin a chim, “ka ngeihmi paoh ah lungsi tein um kha ka thiam cang. Ka paw a tam ah siseh, ka paw a khim ah siseh, tamtuk ka ngeih ah siseh, tlawmte ka ngeih ah siseh lungsi hnangam tein um kha ka thiam cang. Jesuh thawngin zei paoh ka tuah ngam ko hna,” tiah a ti.
(Deut. 8:17-18) ah, “keimah ṭhawnnak le ka kut thazaang in hi chawva hi ka hmuh nan ti sualnak hnga lo u. Chawva hmuh khawhnak ṭhawnnak an petu cu Bawipa nan Pathian a si a ti. Dawtu Pathian nih thluachuah a kan pekmi chaw le va vialte cungah zumh awktlak salṭha va si tuah. Na ngeih chinchin lai, na rum chinchin lai. Na ngaitu nan dihlak cungah dawtu Pathian nih thluachuah in pe ko hna seh. Kaa lawm.
Thazaang petu /- Saya Francis Khua Pheng