Ahodah na Panh Lai

2026 November (06), nihin ni hna zongah RVA hmangin thawngṭha hrawm ṭinak caan ṭha a kan zaangfahtu kan Pathian amin ka thangṭhat. Thawngṭha a rak ngai i thazaang a kan pe pengtu nan zaten Pathian nih thluachuah bongmal za in ṭumh ko hna seh tiah thlaza kan cam piak hna.

Nihin ni ah rel dingin Khrihfa Bupi nih a kan timhpiakmi bible (Lk. 16:1-8) a si. A tawinak tein kan rel lai. Jesuh nih a zultu kha a thawh hna i, “mirumpa pakhat a rak um i, cu mirumpa nih cun thil zohkhenhtu pakhat a ngeih i a thil zohkhenhtu nih cun a tangka kha a duhduh in pakpalawng ah a hman, tiah an chim. Amah cu a khawh i, “Nangmah kong i ka theihmi hi zeidah a si. Kan thilri na tuahtonak cazin kha tlamtling tein ka pe tuah. Zeicahtiah kan thil zohkhenhtu na si kho ti lo,” tiah a ti. 

Duhdawtmi u le nau, nu le pa hna kan van a ṭhat khunnak cu vawlei zum lotu tampi lakah zeizong vialte sertu Pa Pathian, a dik a hmaanmi, pathian vialte lak i cungnungbik Pathian, amah hngal in le amah zumh dingin, amah miphun can dingin sawm khawhnak chungah khan kan si hi zeizong vialte nakin a sunglawi bikmi a si. Cu chungah cun zumtu nang le kei aa timi hna nih nifatin te kan nunnak ah hin kanmah le pahrang cio in Pathian nih hin talen pahrang pek cio kan si. Cu a kan pekmi pahrang cio cu amah min sunparnak, amah min thangṭhatnak, a pennak kauhternak caah pek cio kan si. 

Nihin kan relmi thawngṭha chungah, “mirumpa” tiah a timi cu Pathian kha a tahchunh duhnak a si i, a thil zohkhenhtu tiah a timi cu zumtu amah mifa hna kan dirhmun cio kha a chimduhmi kha a si. Mithiang Paul nih a timi cu, “kannih cu Pathian chawkeng ṭha bantukin kan si awk a si,” tiah a ti. Kannih cu Pathian nih a kan pekmi nunnak, thazaang, tik cu caan kan ngeih ciomi pahrang hi kanmah caah pumsa duhnak lawngah kan hman a si si ahcun cucu sertu Pathian nih a kan duh piak lomi thil a si i, a kan pekmi pahrang hi amah min sunparnak caah kan hman a si si ahcun cucu a kan duh piakmi thil a si i, cucu khamhnak i hawi, khamhnak tinconak dirhmun cu a si. 

Nihin ni ah Mithiang Paul nih Philipi khuami hna ca a kuatnak (Fil. 3:17) zawnah a kan timi cu, “ka u le ka nau hna ka nawl cawn i zuam ko u. Zohchunh awk ṭha nan caah kan in chiahpiakmi hna a zulmi kha i zohchunh hna u,” tiah a ti. Mithiang Paul cu Pathian pekmi pahrang kha chawkengtu ṭha, zumh awktlak salṭha dirhmun in a dir i, “Ka nun i cawn uh,” tiah a kan sawm ngam. Kannih hna zong hi amah zumtu, amah chawkengtu kan si ve bantukin kannih hna zong nih hin kan u kan nau hna kha kan nunzia i cawn u, ti hi kan ti ngam ve ding hi a biapi ngaingaimi a si. A ruahnak, a thinlung a zate, a nunnak zeizong vialte Khrih min sunparnak caah, Pa Pathian Pennak caah rian a ṭuan. A vun pehrihmi cu, “hi hlan ah voitampi kan chimh cang hna i, atu ah mitthli he ka nolh rih. Mi tampi cu an nuncan nih Khrih vailamtah ral ah a canter hna,” a ti. Zumtu dirhmunh a si tiah aa timi u le nau nang le kei nih hin Khrih nih vailam cungah a kan tlanh cang kan ti ko nain nifatin te na nunnak ah pumsa duhnak lawngin kar na hlan peng ko a si si ahcun Pathian pekmi pahrang kha zei rel loin nangmah na taksa nuamhnak, na pumsa duhnak lawngah a si si ahcun cucu Khrih vailam ih ral cu na si ko. Khamhnak hmuhnak ral na si. “Annih cu hell ah an tlak ko lai, zeicahtiah an pathian cu an pumsa duhnak kha a si ko i ningzah awk a simi thil kha an i pawrhlaw i, hi vawlei cung thil lawnglawng kha an ruat tiah nihin kan relmi (Fil. 3) chungah fiang tein a kan chimh. 

Duhdawtmi u le nau, nu le pa hna a si si ahcun nang le kei nih hin mu Vawlei cungah pawrhlawt awkpi tlak zeihmanh kan ngei lo i kan nunnak hi cu Mithiang Paul nih, “kei ka nun hi Khrih a si ko,” tiah a ti bangin kan nunnak caan tawite hi amin thangṭhatnak, amin sunparnak ah kan hman ding hi a biapi i thlarau karhlannak lamthluan ah kan nunnak hi kan thap ve ding hi a biapi ngaingaimi a si. Nifatin te ka nunnak ah zeihmanh kan i pawrhlawt dingmi kan ngei lo. Nihin kan relmi Salm hla (Ps. 122) nak ah caangkhat in caanglinak lakkar ah kan hmuh khawhmi cu, “Bawipa inn ah kal usih a kan ti tikah khan kan rak i lawm. Atu cu maw Jerusalem na kutka chungah kan dir cang. Jerusalem cu i rem ṭhepṭhep le i dawh cikcek in sakmi khua a si. Cuka ah cun Bawipa sin i lawmhnak bia chim awk ah Israel miphun cu an kal tawn. Cu lawmhnak bia chim cu Bawipa nih a fialmi hna a si,” tiah a ti. 

Duhdawtmi u le nau, nu le pa hna nang le kei nih kan sualnak ngaihthiam kan sinak hnga ding caah rem ṭhepṭhep in sakmi, kan Bawipa Jesuh nih hmunhma a laknak biakinn kal usih law kan sualnak i thlah usih law nang le kei nih Pathian sin i kan chim khawhmi cu ‘kan i lawm’ tiin nitin kan nunnak ah lawmhnak bia chim hin kan caan hmang ko usih. Lawmhnak chim cu kan Bawipa nih a kan fialmi a si. Duhdawtmi u le nau nu la pa hna kannih cu vailam thawngin khamhmi kan si bantukin vailam hawikom si usih law, Khrih hawikom si usih law, Khrih a nunzia dawh kha cawng usih law Mithiang pawl hna le Lamkaltu pawl an nunzia dawh kha i zohchunh in mi caah zohchunh awktlak in kar a hlang khomi kan si khawhnak ding caah i zuam hna usih. Thawngṭha a rak ngaitu nan zapite kan Pathian nih thluachuah in thumhthlak ko hna seh.  

Thazaang petu /- Saya Canute Bawi Kam