Zeidah a Biapi Bik?

Caan ṭha caan sunglawi a kan petu kan biakmi kan Pathian amin thiang thangṭhat in um ko seh. 

Nihin kan nu Bupi nih a kan timhpiakmi a voikhatnak bible chungin thazaang lak ṭi le ruah ṭi kan duh hna. (Fil. 3:3-8) tiang a si i caang riatnak te lawng kha kan rel lai, “cu lawng cu an si lo, a dang vialte zong kha sungh cikcek ah ka rel hna. cu thil hna nakin a sung deuh tukmi ka Bawipa Jesuh Khrih hngalhnak ruangah cun sungh cikcek ah ka rel hna. Khrih cu ka co khawhnak hnga le amah he cun kan i pehtlaih khawhnak hnga amah ruangah cun zeizong vialte hi ka hlawt dih hna, an dihlak in hnawmtam ah ka rel hna.” “Kan Bawipa Jesuh Khrih cu ka co khawhnak hnga,” a ti. “Zeizong vialte kha amah ruangah cun hnawmtam ah an dihlak in ka rel hna e,” a ti. Tlangtar in ruahṭi ka duhmi cu zeidah a si tiah cun, “Minung kan nunnak ah zeidah a sunglawi bikmi a si? Na nunnak zeidah a sunglawi bikmi a si?” timi tlangtar in ruahṭi kan duh hna. 

Khrih ah dawtmi u le nau hna nihin kan nunnak ah hin, na nunnak ah hin zeidah a sunglawibik timi hi na ruat bal maw? Vawlei mi nih zeitindah kan ruah ti a si ahcun, an ruah ti a si ahcun rumnak, ngandamnak, rian i hmuhnak (asiloah) dawtmi hna he nungak tlangval hna nih cun chungkhar dirhnak (asiloah) chungkhar kan dirh tikah fanu. fapa hna he sunglawi ngaiin umṭi mi hi ka nunnak ah nu le pa kan caah a sunglawi ngaimi a si tiah kan ruah tawnmi a si. Asinain kha vialte kha a herhmi zong a si ko nain minung kan nunnak ahcun zeitik hmanh ah a si bal lo! Zeiruang ah dah ti a si ahcun rumnak nih hin minung kan nunnak ah phaisa lei ngeih le chiah, chaw le va hi kan nunnak ah a biapi ngaingai mi pakhat a si ko. Phaisa a um lo a si ahcun kan chim kan relmi hi zeihmanh a si lo. Phaisa a um lo a si ahcun kan nunnak ah zeihmanh tlam a tling ko ve lo. Minung kan nunnak ah hi phaisa ngeih le chiah, chaw le va hi mi cheu nih cun a sunglawibik ah kan ruah tawnmi a si. Asinain hi ngeih le chiah, chaw le va hi nihin kan nunnak, zungzal nunnak timi hi a caw kho lo ti kha (Mt. 16:26) ah nihin kan Bawipa Jesuh nih fiang tein a kan chimmi kha kan hmuh khawhmi a si. “Minung hi vawlei pumpi co hmanh seh law, a nunnak cu zeihmanh in a caw ṭhan kho lai lo” ti kha nihin ah kan hmuh ṭhan khawhmi cu a si. Cucaah minung kan nunnak ah a sunglawi bik ah kan ruah tawnmi ngeih le chiah, chawva phaisa rumnak hi zeitik hmanh a sunglawi bikmi a si kho lo. 

Cuve bantukin ngandamnak, ngandamnak hi zeitluk in phaisa a um hmanh ah kan ngan a dam lo hnuah cun kha kan ngeihchiah chawva vialte kha, kan khonmi thil vialte cu a lakka in a si khomi kha a si. Ngamdamnak hi a biapi maw? A biapi tukmi pakhat a si ve. Sihmanhsehlaw, ni nikhatkhat cu kan duh zongah kan duh lo zongah kan mit te hna a vun mui lai, kan haa te hna an khia an tlong lai, kan takvun te hna ni nikhatkhat cu a ṭunh te lai. Cuve bantuk tein kan duh le duh lo zong a thing dingmi kan si. Cucaah nifa kan nunnak ah ngandamnak hi a biapi ngaingai mi, a herh ngaingai mi a si ve ko nain kan nunnak ah a sunglawi bikmi a si hlei lo. Cuve bantukin rian kan timi zong hi ai hmuhmi hna caah cun lunglawm thanuam ngaiin a dam chung zong a ṭuan kho ko nain a hnubik ahcun cu kha kan rian vialte kha piahtana pakhatkhat ton sual ahcun tlam a tling kho lomi pakhat a si ve. Rian aa hmuhmi hna, rian i hmuh te hna hi a herh maw? A herh ngaingai mi a si. A ṭha ngaingai mi pakhat a si. Asinain cu kan rian kan i hmuhmi, rian kan ṭuanmi vialte hi kan nunnak ah a herh bikmi a si maw? A si ve hlei lo. Cuve bantukin duhdawt bikmi hna he chungkhar khuasak ṭi, dirh ṭi zong hi a ṭha ngaingai mi a si. Cheukhat nih duhdawtmi hna he chungkhar dirh ṭi a va nuam e, an ti ko lai natein kha an i nuamhmi cu chikkhat caan khatte lawng a si. A caan caan ah, timi a si ve bantuk te khin an i hro caan, an i sik caan tete hna hnu ah an i tongte lai, kan  ton cio dingmi a si. Cucaah kan nunnak ah kha vialte zong kha siseh law a herh bikmi zeitik hmanh ah a si lo. A sunglawi bikmi zeitik hmanh ah a si ve lo. Cuve bantukin nu le pa hna nih fale hna he, kan dawt tukmi kan fanu kan fapa le hna he khuasak ṭi, chungkhar nuam tein um ṭi, ei le din ṭi, rian te hna ṭuan ṭi cu a ṭha ngaingai mi le a sunglawi ngaingai mi pakhat a si ve. Asinain kha vialte kha kan zoh a si ahcun zeitik hmanh ah kan nunnak ah a sunglawi bikmi a si ve hlei lo. 

Asiahcun nifa zumtu kan nunnak zeidah a sunglawi khunmi a si? Nihin Paul hmanh nih hin a cunglei bible kan zoh tikah a hme pathumnak hrawng kan zoh tikah cathiam ngaimi pakhat zong a si, bible thiam ngaimi pakhat zong a si. Rumnak lei in siseh, Bible thiamnak lei in siseh, nawlbia zulhnak lei zong siseh a bau lomi mitling pakhat a si ve. Asinain kan Bawipa Jesuh Khrih he Damascus haukaa ah an ni ton hnu ahcun zeizong vialte kha a nunnak kha aa zoh i minung kan nunnak hi zeidah a si ti kha biahalnak a vun tuah tikah minun kan nunnak hi Khrih a si e, a ti. Cucaah ka nun zongah, ka thih zongah Bawipa ta ka si e, a ti khawhmi a si. Paul a nunnak kan zoh tikah kha vialte kha vawlei rumnak fimthiamnak, chungkhar nuam tein khuasaknak, rianṭuannak vialte kha pakpalawng ah kan rel tih hna. Zeiruang ah, Khrih kha kan co khawhnak hnga caah a si e, a ti. “Khrih Jesuh hngalhnak ruangah cun zeizong vialte kha sungh cikcek ah ka rel hna e, a ti. Khrih cu ka co khawhnak hnga, amah he cun kan i pehtlaih khawhnak hnga amah ruangah cun zeizong vialte hi ka hlawt dih hna, an dihlak in hnawmtam ah ka rel dih hna e,” tiah Paul nih a nunnak kha aa zoh i nihin ah nang le kei zong thazaang a kan pekmi a si.

Dawtmi u le nau hna nihin kan nunnak ah zeidah a nunnak a sunglawi bikmi a si? Ngeih le chiah, chawva maw, fanu fapa he khuasak ṭi maw, duhdawtmi hna he chungkhar dirh ṭi maw (asiloah) rian ṭhaṭha nai hmuhmi kha maw nan nunnak ah a sunglawi bik in na ruahmi a si. Nihin ah dawtmi u le nau hna kha vialte cu chikkhat caan khatte lawng a nguhmi a si. Chikkhat caan khawtte lawnglawng a si. Dawtmi u le nau hna nifa kan nunnak ah kan Bawipa Jesuh Khrih hi a sunglawi bikah kapkhat lei in kan chim si ahcun kan Bawipa Jesuh Khrih hi kan nunnak a pakhatnak ah a chiami kan Bawipa Jesuh Khrih kan i ngeih hnu lawngah, kan Bawipa Jesuh Khrih he khua kan sak ṭi hnu lawngah zeizong vialte hi tlam a tling kho dingmi a si caah dawtmi u le nau hna nihin kan nunnak ah hin kan Bawipa Jesuh Khrih hi a pakhatnak ah chiah in kan Bawipa Jesuh Khrih hi zeizong vialte cungah nawlngeitu ah chiah in kan Baiwpa Jesuh Khrih lawnglawng hi kan nunnak na nunnak ah a sunglawi bikah a chia khomi zeizong vialte kha amah kan Bawipa Jesuh Khrih kan co khawhnak ding caah hin hnawmtam ah a rel khomi fanu fapa kan si khawhnak ding caah Hakha Service RVA a ngaitu kan dihlak cungah Bawipa a thar in thluachuah kan pe ko hna seh. Amen.  

Thazaang petu /- Saya William