Pathian Tinh Piak ningin Nun

Dawtmi u le nau, nu le pa hna Khrihfabu timi a sullam cu Greek holh Eccelesia tiin a rami a si i, hmaiah rak fong tuah tiah thim a sinak kha a sullam a sawh duhmi a si. Chimduhmi cu mitampi lakin mi zeimaw kha hmailei ah rak chuak tuah tiah thim hleicenak kha a chimduhnak a si. 

Titas. 1:3 chungah, “zumhnak kan timi cu Pathian nih a thimmi hna chungin a hung thomi zumhnak,” tiah a ti. Vawlei cung miphun tampi lakah amah zumtu dingin Pathian nih a kan thim kha a chimduhnak a si. 

Nihin ni ah Khrihfa Bupi nih rel dingin a kan timhpiakmi bible pakhatnak (Eph. 1:11-14) chungah kan hmuh khawhmi cu, “zeizong vialte hi Pathian nih a khuakhan ning le aa tinh ningin an kal ko. Khrih he kan i pehtlaihnak thawngin Pathian nih amah mi si ding i a kan thim cu amah nih a rak tinhmi a si ko i, a hramthawk tein tuah awkah a rak i khiah ciami a si,” tiah a ti. 

Kan Bawipa Jesuh Khrih nih a pennak cu vawlei cungah a dirh i, cu a pennak cu a Khrihfa Bupi a si i, cu a Khrihfa Bupi cu a thisen a luanh hnawh i, cu a Khrihfa Bupi chungah kannih cu a kan sawm a si. Amah ta si awkah a kan sawm i, Jesuh Khrih he kan i pehtlaihnak thawngin amah Pathian ta si dingin Pathian nih thim kan si. Jesuh Khrih he kan i pehtlaihnak cu zeitindah a si kan ti a si ahcun, kan Bawipa Jesuh Khrih cu kan khamhtu le a ka khamhtu le ka Bawipa tiah kan cohlan i kan zumh i, Kalvary Vailam cung a thihnak thawngin Sacrament kan caah a kan chiahpiak i, cu Sacrament kan cohlannak in Jesuh Khrih he cun pumkhat kan si i Jesuh Khrih he kan i pehtlaihnak cu a si. 

Duhdawtmi u le nau, nu le pa hna, nihin ni ah amah mi si dingin, Pathian nih amah ta si dingin a kan sawm i amah ta si dingin amahkhaan tawh cu Thiang Thlarau a si e, tiah a ti. Asiahcun Sacrament vialte siseh, Khrihfa Bupi a ṭhancho i lamṭha a hmu i a hruaitu dingah siseh, cu Khrihfa Bupi chung i pumpak kan nunnak, thlarau kar kan hlannak ah lam a kan hruaitu hi Thiang Thlarau Pathian a si i Sacrament vialte hna a thiantertu, Pa Pathian hmaiah puitling in a sertertu, a thar a chuahtertu hi Thiang Thlarau Pathian a si. 

Nihin Gospel rel dingin Khrihfa Bupi nih a kan timhpiakmi (Lk. 12:1-7) chung a si i cu hna chungah kan hmuh khawhmi cu, kan Bawipa Jesuh Khrih nih a chimmi cu, “Farasi mi pawl i thilnu kha i ralring u, midepde an si,” tiah kan Bawipa Jesuh nih a ti. Farasi mi pawl cu miṭha ngai, miding ngai, nawlbia zul kho ngai an i lawhter natein Pathian hmuitinh kha an nganh. Pathian kong cu an phuan nain Pathian bia cu an phuan i, Pathian a rian cu kan ṭuan tiah an i ti ko natein Fapa Jesuh Khrih an cohlang lo. Cucu Farasi mi pawl i thilnu a si. Lenglang in zoh aa dawh ngai natein a chunglei ah a thumi a si. Chungthu lengnal a si.

Duhdawmi u le nau, nu le pa hna nihin ni ah hin Khrih kong thawngṭha cu kan phuang cio i, Vawlei cungah rel cawk lo bu kan um i, cucu Khrih khamhnak kong lawngte phuan cio a si. Sihmanhsehlaw a pum a simi Khrihfabu cu zeiah a rel lomi bu kan tampi. Duhdawtmi u le nau, nu le pa hna Farasi mi hna cu a dik ngaimi an lo natein an dik lo a si. 

Nihin ni ah Khrih kong thawngṭha phuan kip hi thawngṭha an si dih lo. Cu thawngṭha phuannak nawl cu a pum a simi a Khrihfa Bupi cu a ap a si. 

Jesuh Khrih nih a pehmi cu, kan ṭih awk hnga dingmi hi pakhat lawnglawng a um. Cucu pum zong a that kho i, thlarau zong hell i a thla khotu Pathian lawng kha nan ṭih ding a si,” tiah a kan ti. 

Duhdawtmi u le nau, nu le pa hna Pathian nih a kan thim i amah ta si dingin a kan kawh auhmi thimmi miphun, thimmi minung kan si caah amah nawl kan zulh ding hi kan rian a si i amah biak hi kan rian nganbik a si i, sertu Pathian thangṭhat upat pek le sertu Pathian ṭihzah hi kan rian nganbikmi a si. Sertu Pathian dah ti lo cun vawlei cungah ṭih ding zeihmanh kan ngei lo. “Khuhmi thil paoh hi hun an si dih lai i, biathli paohpaoh hi hngalh an si dih lai. Muilak i chimmi cu chun ceu ah theih a si lai i, cun innka nan i kharkhumhnak khaan chungah a thli tein nan chimmi cu innchung in aupi an si lai,” tiah a ti. 

Ni donghnak ni ah, biaceihnak ni ah vawlei kan nun lioah Pathian ṭihzah loin kan chim, kan relmi vialte, kan holh kan relmi vialte hna, muihnak thil a simi Satan pa duhnak in kan umtu vialte hna hi ni hmanungbik ni ahcun chun ceu bangin a lang dih lai i, phozar a si dih lai, cucu kan biaceihnak a si te lai. Sihmanhsehlaw amah caah aa thim i amah a ṭihzahmi hna cu, cu vialte chung cun an luat lai i zungzal nunnak an hmu lai timi kha nihin kan relmi cathiang nih a kan chimh i a kan fianter duhmi a si. Thawngṭha a rak ngaimi nan zapi te kan biak kan Pathian nih thluachuah in pe hna seh law, amah ṭih bu tein amah kung tangte ah khuk i bil in Pathian cu a biami si peng ko usih. Pumpak, chungkhar, nan zapi te kan biak kan Pathian nih thluachuah in pe ko hna seh.  

Thazaang petu /- Saya Canute Bawi Kam