Bawipa nih a Kan Pek mi Luatnak ah Fek Tein Dir
Bible relding: Galatians 4:22-24,26-27,31-5:1; Luke 11:29-32
Nihin kan cathiang hna nih a kan cawnpiak mi chungin biahal ding phun hnih a um mi cu: Jesuh Khrih cungah zumhnak ka ngei taktak maw? Cun, a kan pekmi luatnak chungah hin kan nung kho taktak cang maw timi hi a si.
Gospel chungah ‘Tuchan mi hna nih khuaruahhar thil an hal; sihmanhsehlaw Bawipa an sin a um kha an philh’ timi kha a si. Paul nih a timi cu kan nih cu biakamh mi fa le kan si nak, luatnak hmuh awk ah Jesuh Khrih nih a auhmi kan sinak kha a chim ve.
Cucaah zumhnak timi cu khuarauhhar thil hmuh nak lawng kha si loin Pathian kan sin a um hrimhrim timi, a biakam nak cungah zumh fek tein um le, a cawnpiaknak cungah nun kha a si.
Cucaah khuaruahhar thil hmuh ding lawngin hngah dingah timh ding a si lo. Jesuh nih khuaruahhar thil a kawl mi hna kha Jonah sining in a cawnpiak hna.
Mi hna nih Jesuh sin in khuaruahhar thil hmuh dingin an i timh lio ah Jesuh an lungthin in cohlaan duhnak innka an i khar kha a hmuh. Kannih hna zong cutin kan si tawn ve. Pathian sin ah harsatnak ton lo dingin thla kan cam. Biana, “Bawipa hi harsatnak in na ka luatter a si ahcun kan zumh ko lai” tibantuk in khuaruah kan hmang tawn.
Pathian sin ah thla kan cam mi cu zeihmanh a palhnak cu a um lo. Sihmahsehlaw, Pathian nih kan thlacamnak a kan leh lawngah ka zumh lai timi lungput kan ngeih lo ding kha a herh mi a si.
Nifatin kan nun ning te hi ruat ve hmanh. Pathian nih kan thlacam cu a kan let dih men lai lo. Sihmahsehlaw, a Bible thiang in kan cawnpia, a Thisa in a kan cawm, a Bupi chungah a kan chiah, midang hna he i theih hngalhnak caan ṭha a kan pek.
Jesuh hrimhrim in Pathian sin in kan cohlaanmi Khuaruahhar vialte lakah khuarauhhar bik a si timi kha kan theih a herh. A thihnak le a thawh ṭhannak in Pathian dawtnak a ngan zia kha a langhter. Cucu thihnak le sual nak tei khawh tiang in a si.
Cucaah khuaruahhar thil lawng kha kawl loin, Maw Bawipa, ka sin na um timi thiehthiam le cohlaan khawh dingin ka lungthin innka run ka hun piak ko sawh tiin kan hal ding a si.
Cuasicaah na caan a rem caan le na si ṭhat lio caan lawng ah Bawipa kho zumh si loin na caah an timpiakmi na thieh khawh lo hmanh ah a cungah zumhnak ngeih khawh zungzal ding kha a bipi mi a si. Sualnak, ṭih phannak, huatnak, a hmun lomi thil hna cungah lungthin chiah loin, Jesuh nih a kan pek mi luatnak le a dawtnak cungah kan nun a herh.
Thazaang petu /- Fr. Fidelis Maung Sein