Pathian Timhpiak mi Rawl Dumnak ah Nunzia Dawh he Panh Ding A Herh

Bible thiang relding: Isaiah 25:6–10; Psalm 23; Philippians 4:12–14, 19–20; Matthew 22:1–14

Nihin kan relmi cathiang hna nih Pathian ṭhatnak le a fale hna cungah siang ngai in a um zungzal nak, cun zungzal nunnak hrawmh ding in sawmmi kan sinak kong hna kha an langhter. Pathian nih ṭih phang in kan um ding a duh lo. Ngaihchia lung kuai in le ruahchan nak a ngei lomi hna bangin kan um ding a kan duh piak lo. Amah sin in lawmhnak, daihnak, dawtnak a um zungzal, hrawmh dingin a kan sawm ko timi hna kong a si.

Voi(1) Bible relnak ah Bawipa Pathian nih mi vialte hna caah rawl dumnak puai nganpi a timhnak kong a chim. Gospel chungah zongah Jesuh nih, siangpahrang pakhat nih a fapa caah ṭhit-umh rawl dum nak a timhtuahnak bianabia a chim. Hi cathiang hna nih aa lo ngai mi cawnpiak nak an langhter hna. Cucu Pathian nih kan caah hmunhma a kan timhpiaknak, cucu kanmah lei zongin lunglawm tein kan cohlaan thiam ding a herhnak kong a si. 

Pslam hla ṭial tu pa nih, Pathian cu tuukhal ṭha a si nak, kan ṭhihruaitu le a kan khamh tu a sinak a langhter ve. Paul zong nih zumtu hna ralrin a pek hna i thil sining hna cungah cohlaan thiam ding le, zeizong vialte a kan petu, thazaang a kan petu taktak cu Pathian a si nak a langhter ve.

Nihin cathiang hna chungin phun thum in thazaang i lak hna u sih.

Pakhat nak ah, Pathian nih a lawmhnak hrawmh a kan duh. Voi(1) Bible relnak ah Pathian nih a mi hna an ngeihchiatnak chungin a khamh lai hna nak kong, thihnak in a luaṭer hna lai nak, cun an ngeihchiatnak an miṭhli a hnawh piak hna lai nak kong a chim. 

Pathian nih amah sin ah thlacamnak he kan panh ding, Missa thawinak in siseh, Bible thiang relnak in siseh, midang hna cungah dawtnak lungthin ngeih khawh dingin siseh, a kan sawm a kan cawnpiak zungzal. Sihmahsehlaw, micheu khat cu an mah le an rian cungah khuaruat in Pathian caah caan an pe kho lo. Thluachuah a petu Pathian kha an philh. Sual a kan phawt sual lai tiah a phunphun in luatnak khua an khang i an i phet. Mah hna chungah kan nih zong aa tel kho ve mi kan si. Ruat ṭhan hna u sih. Nunnak le thil ti khawhnak a kan petu Pathian sinah lawmhnak bia chim loin kan um sual maw?

Pahnihnak ah Pathian cu a kan kilveng tu le a kan hruaitu, kan herh mi vialte a kan petu a si.

Psalm 23 chungah, “Pathian cu a ka khaaltu a si. Ka herh mi vialte a kan pek dih” a ti. Tuukhal nih cun a tuu hna nih zeidah an herh timi le an cungah zeidah a cang timi kha ṭha tein an theih tawn. Pathian nih kan herh mi le kan cungah a cang mi vialte cu a theih dih taktak ko. Kan lunglawmhnak maw, kan ngeihchiatnak maw, kan sin kan pawng te ah um in kan thlarau a tlau lonak hnga, kan thih lo nak hnga ding caah lam a kan hruai zungzal ko.

Paul nih “Thil tlawm te in maw, tampi ngeihnak in maw ka um thiam cang” tiah a ti. Harsatnak hna caan ah zeitin dah ka um lai timi kha a theih i Pathian thil ti khawhnak cungah a zum dih kho mi a si. Paul nunnak nih a kan cawnpiak duh mi cu: zumhnak timi cu harsatnak hna kan tong ti lai lo timi a si lo. Sihmahsehlaw, cu harsatnak hna cu kan mah lawng in kan ton si loin Pathian nih kan intuarnak ah a kan telpi ko timi kha a si. 

Nunnak a har caan ah kan i ruahchannak kan thlau lo ding a herh. Pathian cungah zumhnak chiah in amah nih a kan umpi zungzal ko timi kha kan cohlaan thiam a herh.

Pathumnak ah, Pathian kawhnak cu nunzia thlennak he kan leh a herh timi a si.

Nihin Gospel chungah ṭhitumhnak puai ah a herh mi thilthuam aa hruk lomi pa kong kan hmuh khawh. A helice in sawmmi hna an rat duh lo tikah, mi kip sinah sawmnak a hung si. Cu tikah puai kal nak thilthuam aa hruk lomi pa kong zong kan hmuh. Cu pa cu biahal zong a si. 

Thilthuam nih a kan cawnpiak duhmi cu Pathian sawmnak ah hin va tel sawhsawh nak lawng ah hin a tling lo. Puai kal nak ding caah kan lungthin, kan ruahnak kan thlen a herhnak, Pathian veel thawngin nunzia thlen a herhnak kha a bikin a langhter.

Zarhpi pumh caan paoh ah kan i pum ko men lai. Thlacam nak zong kan tuah ko men lai. Bupi rian zong kan ṭuan ko men lai. Hi hna hi kan zumhnak langhter nak ding caah a herh mi an si tiah ti khawh cu a si ko. Sihmahsehlaw, cu thil hna kan tuahnak thawngin dawtnak lungthin kan ngei deuh cang maw, sual ngaihthiamnak kan ngei deuh maw, tangdornak lungthin kan ngei deuh maw, ka fel deuh maw, zangfahnak lungthin kan ngei deuh maw timi hna hi kanmah le kanmah kan i chek hlat ding a herh.

Cuasicaah, Pathian nih a kan dawtnak, a lunglawmhnak hrawmh ding in a kan kawhnak ah lungthin tak tein a let mi kan si cang hna maw? Pathian kawhnak thawngin nunzia thlennak kan ngei kho taktak cang hna maw? A kan kawhnak kha lunglawmhnak in a cohlaang thiammi kan si a herh.

Thazaang petu /- Fr. Fidelis Maung Sein