JESUH A THLITHUP NUNNAK
Jesuh nih a nun chungah tam deuh cu mi tampi nunnak kha hrawm in a nung. Mingan a si lai ti langhnak pakhat hmanh um loin a can cu a hman i rianhrang ṭuan in a um ve. Biaknak lei ah a nunzia cu Pathian nawlbia a zulmi Judah mi nunnak kha a si. (Gal. 4:4). Mah chung vialte ah Jesuh cu a nu le a pa bia kha a ngaih i fimnak le pum in a ṭhang. Pathian hmai le minung hmaiah mithmai ṭha kha a hmuh. (Lk. 2:51-52).
Jesuh nih a nu le pa bia a ngaihnak thawngin nawlbia a palinak kha a tlinh i cuticun vancung i a ummi a Pa nawl a ngaihnak kha a langhter. Joseph le Mary nawl a ngaihnak nih a thiang cacawn nili zaan ah a chimmi, “Keimah duhnak bang si hlah seh, Nangmah duhnak bang si ko seh,” a timi kha, a nunchung mi nuncan a rak si. (Lk. 22:42). Nifate in bia ngaih in a nunnak nih, Adam nih nawlngaih lonak in a rak hrawhmi kha hmuh ṭhan awkah ṭuan hram a thawk ti kha a kan hmuhsak. (Rom. 5:19).
Nazareth khua ah a thlithup in a nunnak nih mi vialte kha nifate an nunnak ah amah he aa khawmhter khawh hna. Nazareth inn cu Jesuh nuncan theihnak hram kan thawhnak sianginn le Thawngṭhabia sianginn a si. A hmasabik ah dai tein a umnak kong a si. Daihnak kha tlaihchan in, cu lungput thangṭhat awktlak zia cu kan chungah nunter in innchungkhar nunnak caah dawtnak bu a simi aa summi le aa dawhmi, a thiang i hrawh khawh lo a simi Nazareth innchungkhar nuncan cu kan ni zohchunh awk a si.
Rianṭuannak ah i zohchunh awk; Nazareth cu zungthiampa Fapa inn a si. Nanmah lakah minung rianhrang ṭuannak phung kha kan theihthiam i ka chim lai. A donghnak ah vawlei cung rianṭuantu vialte hna nih anni zohchunh awk cu; Pathian a simi nan unau Jesuh Khrih kha a si, tiah kuttlaih in kan biakchonh dih hna. (Paul V1).
Biakinn chungah Jesuh an hmuhnak lawnglawng hi Jesuh a thlithup nunnak kong ah Thawngṭhabia dai tein a umnak kha a hrawhmi a si. (Lk. 2:41-52). Hika ah Jesuh nih Pa Pathian duhnak tuah awkah a pumpaluk in aa pek dihnak kong kha a kan hmuhter. “Ka Pa rian cu ka ṭuan awk a si, ti nan hngal lo maw?” (Lk. 2:49). Mary le Joseph nih mah bia a chimmi kha an hngal kho lo. Sihmanhsehlaw zumhnak in an pawn. Mary nih mah kong vialte kha a lungthin chungah aa chiah dih.