Somalia ram harnak a dongh nakhnga Pope nih thla a cam
Somalia hmun cheukhat ah a cangmi buainak an ngolnak hnga le International community hna sin in bawmhnak an hmuh khawhnak hnga St. Peter’s Square ah hnga, nizan (Zarhpi ni chun) Angelus thlacam a dih ah Pope Leo XIV nih thla a campiak hna. Somalia ram cheukhat ah buaibainak le nikhua chiat ruang ah harnak an tonnak kong le abik in nu le ngakchia hna caah harnak a chuak i bawmtu ṭha ngai an umlonak kong Pope nih a langhter. UN agency tampi hna nih Africa ram caah bawmhnak an pekmi cu naite ah khan an ṭhumh tiah theih asi. The Office for the Coordination of Humanitarian Affairs (OCHA/ UN bawmhnak rianṭuannak zung) nih bawmhnak caah cheuthum cheukhat lawng budget (tangka) an hmuh.
UN World Food Program zong nih eidin bawmhnak a ṭhumh/ a tlawmter i, kum dang i tingkul hrawng bawmhnak rak pek tawnmi kha 2026 ahcun minung 600,000 ca lawng bawmhnak a phan cang. Kum dang nak in tukum cu ruahpi a tlawm tuk caah ti a har i mitampi cu inn zuat saṭil he ti umnak ah an i ṭhial hna. Mudug pengkulh ah ngandamnak he aa pehtlai mi sii inn 70 hrawng an khar cang caah tirawl lei bawmhchanh zohkhenhnak hmunhma ser ṭhan awk a herh tiah Doctors Without Borders (MSF) nih bawmchantu hna sin ah sawmnak a tuah. 1991kum ah Mohamed Siad Barre acozah a rak tlak hnu in Somalia ramchung buainak a karh i khuate zei mawzat cu Islamist ralhrang pawl nih an uk hna.