Pathian Ruahnak cu a Ṭha deuh Zungzal Ko

Zarhkel Zarhpi (24)nak Bible rel ding mi hna: Isaiah 55:6–9; Psalm 145:2–3, 8–9, 17–18; Philippians 1:20c–24, 27a; Mathai 20:1–16a

Nihin kan relmi cathiang hna nih an langhter mi cu “Minung lei kap siloin Pathian lei kap in zoh ding le tuaktan thiam” a herhnak kong hna an si. Thawngṭhabia nih mitsur dum chungah rian a ṭuanmi hna bianabia kong kan rel. A cheu cu chun nitlak tiang rian an ṭuan. Sihmanhsehlaw zaanlei sang a hung phanh tikah rianṭuan tu hna cu aa tluk cio in an ṭuanman a pek hna kong kan hmuh. Chun nitlak rian a ṭuantu hna nih tam deuh kan hmuh a herh tiin dum ngeitu sinah zaibia an chim.

A zai mi hna bantukin kannih zong a si kho mi kan si. Mi dang hna he kan i tahchunh i, “Kei cu rian a ṭuan deuh mi ka si. Kai pechan kho deuh. Zei ruangah dah hi nu hi pa zong nih keimah he aa tluk teih Pathian thluachuah a hmuh ve hnga?” tiin kan ruat kho. Sihmanhsehlaw, kan theih ding a simi cu “Pathian siannak cungah minung hna nih nawl kan ngei lo” timi kha a si. 

Pathian nih amah lei kap hoih in kan kir ṭhan ding nihin ni ah a kan sawm cio ko. A caan ah kan pawcawmnak ca lawng ah kan i zuam tawn. Cun mi dang nih ka cohlang hna seh tiin midang mithmai zoh in kan nung tawn. Pathian kawl ding kha philh riangmang in mi dang hna he kanmah le kanmah tahchunh nak kan i tuahnak ah caan tamtuk kan liamhter tawn. 

Prophet nih ralrin a kan pek mi cu ‘minung ruah nak le Pathian ruahnak cu a dang tuk hringhran ee; Pathian khuakhan nak cu kan mah khuakhannak nak in a sang deuh ee’ tiah a ti.

Kan ruah sual ṭheo tawnmi cu “Zei ruangah dah Pathian nih hitin a thil a canter hnga? Keimah nak in zei ruangah dah thluachuah a pek deuh hnga?” tiin kan ruah caan a um tawn. Sihmahsehlaw, zumhnak timi cu ‘Pathian fimnak cu kanmah thil ti khawhnak le ruahnak nak in a ngan deuh zungzal ko ee’ timi kha kan theih ding a si. 

Thawngṭhabia chungah, tuan deuh ah rianṭuan aa thawh mi hna nih laksawng tam deuh, ngan deuh kan hmuh lai tiah an ruah. Zaanlei tlai hnu ah rianṭuan nak ah a phaanmi hna he aa tluk ruang tein rianṭuan man phalh an si tikah an thin a hung. 

An ruah palhmi cu rianṭuan man a tlawm ruangah siloin midang hna he an i tahchunh caah a si. An i lawm kho lo.

Nihin thawngṭhabia nih fimnak tampi a kan chimh mi a um.

A caan ah midang hna cungah a cang mi Pathian thluachuah kan hmuh hlaan paoh cu Pathian cungah lawmhnak kan ngei kho ko. Midang chungkhar hna he tahchunhnak kan i tuah hlaan paoh cu kan chungkhar hna cungah lung tlinnak kan ngei kho ko. Sihmahsehlaw, pakhat le pakhat cungah tahchunhnak lungput kan hun ngeih in kan i lawm kho ti lo.

Pakhat le pakhat cungah tahchunhnak kan ngeih mi nih kan lunglawmhnak a kan phih tawn.

Pathian nih ahohmanh aa lomi sining in thlua a kan chuah lo. Aa lomi rian zong a kan pe cio lo. Kan tuah khawh mi rian te kha a kan pek ko. Sihmahsehlaw, a dawt nak cu aa tluk ruang tein a kan pek cio timi kha kan theih ding a si. “Pathian nih a ka pek mi thluachuah cungah zumh fel tein kan nung kho maw” timi kha kan ruah a herh. 

Dum ngeitu pa nih “Ka thilri cungah keimah duh ning in tuah khawh nak nawl cu ka ngei ko lo maw?” tiah a ti. 

Pathian cu mi thleidan a hmang mi Pathian a si lo. Pathian siannak cu kan ruahnak nak in a lian deuh timi kha Jesuh Khrih nih a langhter mi cu a si. 

Pathian thluachuah kha lahkhah hmuh le lak bantukin kan ruah ding a si lo. Kan i tlak caah pek si loin a kan dawt caah pek kan si timi kha kan hngalh a herh. 

Pathian he aa hlaat mi pa zong nikhat khat cu Pathian sinah a hung kir ṭhan kho mi a si. Cu pa zong cu Pathian nih a dawtnak in a cohlaan ṭhiamṭhiam ko. Pathian rianṭuannak zongah cu ṭhiamṭhiam cu a si ve. Kum caan saupi a ṭuan cangmi kan si zongah Pathian nih aa tluk ruang cio tein thluachuah a kan pek ko. 

Pathian nih thluachuah a kan pek caah a thluachuah a zor deuh lai tiah kan ruah ding a si lo. Mi pakhatkhat nih thluachuah nak a hmuh tikah nahchuahnak lungthin ngeih loin Pathian thluachuah cungah kan lawm pi hna ding a si. 

Nihin voi(2) Bible relnak zongah Paul nih: Ka nunnak cu Khrih caah a si a ti. Ka duhnak cu Khrih kha conglawmh chinchin a si nak hnga ding caah ka nun zongah kan thih zongah Amah ta ka si a ti. Paul ruahnak cu “mah le mah cungah siloin Khrih cung tu ah khan a si deuh.”

Kannih Khrihfa a simi hna zong nih “Mah le mah cungah maw aa daw deuhmi kan si, Jesuh Khrih a daw deuh mi dah kan si?” timi kha ruat cio ve hna u sih. 

Kan minung sinak cung lawngah caan a pe i a ruat mi kan si asiahcun midang hna he tahchunhnak kan ngei peng ko lai, kan zai peng ko lai i nahchuahnak nih a kan uk peng ko lai. 

Khrihfa a simi hna nih cun, Jesuh Khrih cungah kan ruahnak le kan i timhnak a chia kho tu si khawh ding kha kan i zuam zungzal ding a si. 

Thazaang petu /- Fr. Fidelis Maung Sein