Lai Nunphung Cheukhat

Roco Phungphai

A biana ah ‘A’ a thi i a nupi’B’, a fanu ‘C’ le a fapa ‘D’ an um. ‘A’ fapa ‘E’ cu ‘A’ a nun lioah a thi diam cang nain fanu le fapa a ngeih hna. Cu tikah a thimi pa ‘A’ i rothil cu ‘B’ nih tthenkhat, a fanu ‘C’ nih tthenhnih, a fapa ‘D’ caah le a thi ciami a fapa ‘E’ caah tthenli cio tiah tthenpiak hnu ah a thi ciami a fapa nih a co ding cu fanu comi nakin lethnih a tam deuh lai. ‘B’ a thimi nih amah taktak hrinsor, fanu fapa a ngeih hna lo ahcun a tanglei bantukin co a si lai.

1)A nu le a pa lakah pakhatkhat an nung, an nupi zong a nun ko rih ahcun a cheu kha a nupi nih a co lai, tthenkhat kha a nungmi a nu a siloah a pa nih a co lai. Asinain a nu le a pa an pahnih in an nun ko rih ahcun a pa cu a nu i hmuh dingmi lethnih tam deuh a co lai. Hringtu nu le pa ti tikah a nu le a pa taktak kha a si, paei le nuei an i tel lo.

2)A nu le a pa an thi cang i a pa unau, a farle (an ni) a nun rih ahcun a pa le a nu hmuh ding covo chungin nu nih tthenkhat a co tikah pa nih tthenhnih a co lai. A pa unau pakhatkhat a thi i, cu a thimi pa a fapa a um ahcun a thimi a pa va nung rih sehlaw a co hnga ding covo chungin a fapa pakhatkhat nih a fanu pakhat covo nakin letkhat tam deuh a co lai.

3)A nu le a pa, a pa unau chungin hrinsor um loin a pi le a pu an um ahcun a thimi a nupi nih thumchuah hnih a co lai. A pi le a pu nih tthenkhat an co lai. A palei a pi le a pu an thi i a pu hrinsor chinmi an um ahcun a pi le a pu va nung hna sehlaw, a co dingmi thil chungin pa cu nu nakin letkhat tam deuh a co lai.

4)A cunglei rocotu ding pakhat in pathum tiang an um ti lo ahcun a nupi nih lichuah khat a co lai i lichuah khat a co kho tu ding a dang aho paoh nih an co lai.

A cunglei upadi phunglam ning tein pa siseh, nu siseh, ro conak nawl pek a um ko nain -Ro kha co hlah seh tiah hlonhmi fale, -A thimi pa a thattu asiloah thahnak ah a bawmtu mipa cu pupa ro thil siseh, rothil sawhsawh siseh conak nawl an ngei lo.