KHRIH NUNNAK KONG BIATHUK HNA

Khrih a nunnak kong zumhnak bia nih Minung a cannak (a pawinak le a hrinnak) le lanhtak biathuk hna timi (a temhinnak, vailamtahnak, a thihnak, an vuinak, hell ah a ṭumnak, a thawhṭhannak le vancung a kainak) lawng kha a chim. A dang a nunnak kong ah zeihmanh fiang tein a chim lo. Sihmanhsehlaw zumhnak bia nih minung a cannak le lanhtak biathuk hna nih vawlei cung a nunnak vialte kha a chim dih ko. “Jesuh nih a tuahmi le a cawnpiakmi vialte, a hramthawk in vancung a kai tiang cu, (Lam. 1:1-2) Christmas le Thawhṭhan biathuk chungah zoh dih awk a si.

I. Khrih A Nunnak Hi Biathuk A Si Dih

Mi nih Jesuh kong hngalh an duhmi thil a tampi cu Thawngṭhabia ah khumh a si lo. Nazareth khua i a thlithup tein a umnak kong kha a chim hrimhrim chim a si lo i, zapi hmai ah a langhnak kong zong tling tein ṭial dih a si lo. Thawngṭhabia chungah aa ṭialmi hna cu “Nannih nih Jesuh cu Khrih, Pathian Fapa a si, tiah nan zumhnak hnga le cu nan zumhnak thawngin amah min in nunnak nan ngeihnak hnga caah a si” (Jn. 20:30-31). Thawngṭhabia cu a rak zum hmasa mi hna lakah a tel ve mi hna (Mk. 1:1, Jn. 21:24) le anmah lakin midang kha cheuh a duhmi hna nih an rak ṭial. Zumhnak in Jesuh Khrih kha aho a si tiah an vun hngalh bangin vawlei cung a nunnak kong biathuk kha an hmuh khawh i midang kha an hmuh ter ve hna. Naupuan in an zualnak in a temhinnak, hnitkha ti a dinnak in a thawhṭhannak tiangah Jesuh a nun chung zeizong vialte cu biathuk hmelchunhnak an si dih. (Lk. 2:7, Mt. 27:48, Jn. 20:7). A tuahmi khuaruahharnak hna le a chimmi bia hna nih “A chungah Pathian sinak a tlinnak kha a pum in a um,” ti kha a langhter dih. (Col. 2:9). A minung sinak cu Sacrament in a lang; cucu Pathian fa a sinak le a rak pekmi khamhnak caah hmelchunhnak le hmanmi thil ah an cang. A vawlei nunnak ah hmuhkhawh a simi nih Pathian fa a sinak le a khamhnak rian hmuh khawh lomi biathuk lei ah a hruai.