Thei a Tlaimi Zumtu Nun

Nihin ni thiang nunnak damnak a kan pe i, a tu caan zongah a Bia thiang in thazang lak ṭi dingah caanṭha caan sunglawi a kan serpiaktu a min thiang ka thangṭhat. Zumtu nan dihlak in Bawipa nih a thar in thluachuahnak in pe ko hna seh. 

(John 12:24-26) “Biatak kan chimh hna: facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu dang tampi a chuahter khawh. Ahopaoh, a nunnak a dawmi nih cun a nunnak cu a thlau lai: hi vawlei cung i a nunnak a huami nih zungzal nunnak ah cun aa chiah lai. Ahohmanh ka rian ṭuantu si nan duh ahcun keimah kha nan ka zulh hrimhrim lai, cucaah ka rian a ka ṭuanpiaktu cu ka umnak ah a um ve lai. Ka rian a ka ṭuapiaktu cu ka Pa nih upatnak a pek hna lai,” tiah a ti. 

Tu ka hrawngah kan Bawipa Jesuh Khrih nih thlaici bianabia in a kan cawnpiak mi kong kha tampi kan theih cang hna. Nihin caan zongah a tawi khawh chungin thlaici kong he ka vun langhter ve lai. (Gal 6:7) chungah: “Mi nih a tuhmi cu a zun ko lai. Vawlei pumsa duhnak ah a tuh ahcun thihnak kha a zun lai i, thlarau lo ah a tuh ahcun thlarau nih cun nunnak kha a pek lai” tiah a ti. Vawlei mi vialte hi taksa caah siseh, thlarau lei in kan cawlcanghnak vialte ah siseh, kan tuahser-ṭuannak le kan khuaruahnak, kan zeizong vialte hi thluachuah kan hmuhnak zong a si i khat lei ah chiat i serhnak zong a si. Cun thlarau lei zongah thlaici tampi kan khonnak, kan zunnak a si i khat lei ahcun kan sunghnak zong asi ve. 

Zeidah a kan cawnpiak duhmi a si tiah cun Pathian dawtmi fanu fapa hna, Khrih thisen in tlenh mi fanu fapa hna, nifatin kan cawlcanghnak, Khrihfa kan sinak ah hin Pathian nih hi vawlei ca i nun dingah hin a kan kawh-auh mi kan si lo. A kan fial mi zong kan si lo. Pathian nih a kan auh tikah, vawlei kan nun lio hrimhrim ah hin, Amah duhnak kha kan duhnak nganbik ah chiah in kan ruahnak in siseh, kan tuahsernak in siseh, kan cawlcanghnak vialte hi Bawipa sunpar lianngannak caah a tuahtu le a ṭuantu, a kawl-hawl tu kan si khawhnak ding kha Bawipa nih a kan duhpiak mi cu a si. 

Vawlei caan tawite kan nun chungah hin mi tampi kan zoh hna tikah vawlei pumsa duhnak, vawlei nuamhnak, vawlei chawva, vawlei minthannak ah an i zuam i Bawipa kha hnu an chit i Bawipa ngeih a chiaṭer tu mi tampi kan um. A caan ahcun thlarau fa tampi zong hi vawlei thilri, sinak nih a kan tei i thlarau hnu chiat riangmang in vawlei pumsa duhnak a zuan hnawh mi tampi kan hmuh hna. 

Nihin kan Bible thiang nih a kan cawnpiak duh mi cu vawlei pumsa duhnak ah thlaici kan tuh sual maw? Vawlei pumsa duhnak ah kan tuh sual a si ahcun a phi chuak cu thihnak a si ko. Cuasicaah, vawlei pumsa duhnak ah thlaici a tuh tu si loin thlarau thlaici a tuh tu kan si khawhnak ding kha pakhatnak ah langhter ka duh. 

Pahnihnak ah Bawipa pek mi kan nun caan tawite chungah hin harnak, ngeihchiatnak, tukforhnak, hneksaknak tampi kan ton ko lai. Mah vialte chungah hin lungsau thin fual tein intuar khawhnak kan ngeih i, cuticun kan tuah ṭuannak, kan cawlcanghnak vialte hi thlarau lo ah thlaici a tuh mi kan si khawhnak ding hi a biapi tuk hringhran mi a si. Mi pakhat nunnak lei ah, thlarau lei ah kar a hlaannak kan zoh tikah zeitluk in dah Bawipa he pehtlaihnak a ngeih timi tahfung tampi a um. Pakhat vun langhter a si ahcun Khrihfa pakhat thlarau lei ah kar a hlaan khawhnak ding caah ‘zeitluk in dah thian nak nun a ngeih. Zeitluk in dah toidornak a ngeih? Zeitluk in dah thlacam nun a ngeih? Zeitluk in dah Pathian bia ah aa lawmh?” timi ah hin zoh khawh a si. 

Thlarau fa hna kan i lawmhnak ahcun vawlei thilri ah a si lo. Pathian bia le hla, Pathian duhnak tuahnak ah khan kan i lawmh bik ding cu a si. Paul nih “Bawipa lung a lawmhter tu thil kha kawl i zuam u” tiah a ti. Pathian fa hna an i lawmhnak cu Bawipa bia ah a si. Pathian bia le hla ah a si. Pathian duhnak tuah kha an i lawmhnak cu a si. 

Psalm chungah: Mitthli he thlaici a tuhmi nih lawmhnak he thlaici a zun lai a ti. Lawmhnak facang phal put buin an rak kir lai a ti. Thlarau lei ah lawmhnak, hnangamnak hmuh kan duh ahcun kan nunnak hi, kan sining vialte hi thlarau lo ah kan tuh i, cuticun thlarau ah aa lawm mi kan si ko lai. 

(2Cor 9:6) chungah: thlaici tlawmte lawng a tuhmi nih cu tlawmte lawng kha a zun tawn a ti. Tampi a tuhmi nih cun tampi kha a zun tawn a ti. Cinthlak nak lei in kan zoh zongah a fiang ngai mi a si ko. Sihmahsehlaw, thlarau mit in kan zoh tikah zei ruangah dah thlarau nunnak ah, zumhnak ah kan theipar hi a chuah tawn lo kan ti tikah kan tuhmi thlaici hi a tlawm tuk tawn caah a si. Vawlei pumsa duhnak tu ah kan i zuam, kan zuan hnawh i thlarau lo ah thlaici kan tuhmi a tlawm tuk tawn ruangah a si. 

Thlarau thei tampi zun u sih ti kan duh a si ahcun thlarau lo ah tampi thlaici kan vorh a hau i mission rianṭuannak ah kan ngeihchiah chawva, kan thazang, kan thlacamnak, kan sining vialte hi tampi kan pek a si ahcun nikhatkhat ah thei a tlai mi zumtu kan si te lai i Bawipa a lawmhter tu, Bawipa duhnak a kawltu  fanu fapa ṭha kan ti ko lai. Mitthli he thlaici a tuhmi nih lawmhnak au thawng he an rak kir te lai tiah a ti bantukin lawmhna aw thawng he ka Pa sinah a kir mi kan si te lai. Nan dih lak cungah Bawipa nih thluachuahnak in pe ko hna seh. Amen

Thazang petu /- Saya Simon Hram Ling