Ahodah Na Kawl Ve?

(Lk. 9:7-9) tiang, “Galilee ram a uktu Herod nih khan hi bantukin thil a ummi vialte kha a theih ve; hi kong ah hin a lung aa tuai ngaingai, zeicahtiah mi a cheu nih, “Tipil petu Johan kha a nung ṭhan,” an ti. Midang nih, Elijah kha a hung lang cang, an ti i a dang nih hlan lio pi i a raku mmi profet pakhatkhat a hung nung ṭhan, an ti. Herod nih cun, “Johan cu a lu ka tanter ṭung hna, a thawng ka theih lengmangmi mipa hi ahodah a si kun?” tiah a ti. Cun Jesuh hmuh ding kha heh tiah aa zuam lengmang”. Bawipa Thawngṭhabia a si. 

Bawi Khrih ah dawtmi u le nau hna nihin ah tlangtar ruah ṭi ka duhmi cu Herod nih kan Bawipa Jesuh Khrih kha hmuh a duh ngaingai timi, kan Bawipa Jesuh Khrih kha hmuh dingah heh tiah aa zuam lengmang timi tlangtar in ruah ṭi kan duh hna. 

Voikhatnak Bible kan relmi (Pht. 1:2-11) chungah zeidah kan hmuh ti a si ahcun, minung kan nunnak zeihmanh a si lo zia, minung kan nunnak hi vawlei kan nunnak ah pakpalawng a si zia, kan tuahsernak, kan ṭuanmi vialte, kan hmuh kan tonmi vialte Pathian hmai ah minung hi a zeihmanh kan si lo zia, pakpalawng kan nun a si zia kha nihin ah a voikhatnak bible ah kan hmuh khawhmi a si. 

Cuve bantukin (Ps. 90:3-6, 12-14, 17) tiang nihin slam kan relmi chung zongah siseh, (Ps. 90:12) chungah zeidah kan hmuh ti a si ahcun, minung kan nunnak hi zeitluk in a thawi ti kha kan hngalhter law cuticun kan fim deuh lai, tiah Moses nih a timi minung kan nunnak a tawizia, cun (Ps. 90:10) chungah zeitindah kan hmuh ti a si ahcun, minung kan nunnak hi kum 70 maw, kum 80 ti khi, kan nunnak a tawizia kha Psalm chung zongah nihin ah kan hmuh khawhmi a si. 

Dawtmi u le nau hna nihin minung kan nunnak hi aa pawrhlaw lengmangmi, aa uah lengmangmi, nihin nangmah le keimah kan nunnak a tawizia, minung kan nunnak hi vawlei ah, Pathian hmai ah zeihmanh kan si lo zia, caan tawite chung lawnglawng a nungmi minung, thladem bantukin a simi minung kan si zia kha, pangpar bantukin a simi minung kan si zia kha nihin ah a voikhatnak bible ah siseh, cun slam chung zongah siseh kan hmuh khawhmi a si. 

Cucaah zeihmanh a si lomi kan nunnak kha amah sinah phan dingah, nunnak kan ngeihnak dingah zeitindah Alleluia chungah kan hmuh ti a si ahcun, kan Bawipa Jesuh Khrih nih amah a lam a kan hmuhsakmi lampi a kal dingah; keimah cu lam le biatak le nunnak ka si, tiah a ti, keimah sinin dah ti lo ahcun ahohmanh Pa sin an phan kho lai lo, ti kha Alleluia chungah kan Bawipa Jesuh Khrih nih Pathian hmaiah minung kan nunnak zeihmanh a si lomi kha nunnak kan hmuh khawhnak dingah, amah sinah phak khawhnak dingah, lam, biatak le nunnak a sinak kha kan hmuh khawhmi a si. 

Cuve bantukin nihin thawngṭhabia chungah kan Bawipa Jesuh Khrih a thawng kha a theih tikah, “ahodah a si hnga hi pa hi” a ti. Kan Bawipa Jesuh Khrih nih a nun lioah heh tiah khuaruahharnak, hmelchunhnak phunphun a vun tuah kha a thawng a theih, a zawmi hna a damternak thawng kha Herod nih a vun theih ve tikah hi pa hi ahodah a si hnga, ti kha a lung a tuai ngaingai. Cucaah midang nih zeitin? Tipil petu Johan a nung ṭhan, an ti. Cun a dang hna nih hlanlio profet Elijah (asiloah) hlan lio pi a rak ummi profet pakhatkhat a hung nung ṭhan, tiah Herod kha an chimh tikah Herod nih a timi cu, “Aw! Johan a si ahcun Johan (John the Baptist) cu a lu ka tanter hna i ka thahter ṭung hna, a si kho lai lo. Cucaah hi pa hi, a thawng ka theihmi hi ahodah a si hnga ti kha hmuh a duh ngaingai, a ti. Cu kan Bawipa Jesuh Khrih hmuh ding kha heh tiah aa zuam e, a ti. Asiahcun hi Heroc nih hin kan Baiwpa Jesuh hi a hmuh khawh maw? Zeiruang ah dah hmuh a duh? A biak duh ruangah maw a si? Lunghrinnak thinphannak tattat in hmuh a duhmi a si. Hi Herod nih hin biak a duh ruangah a si lo, a ka lanh sual ti kha a phan caah hi Herod nih hin kan Bawipa Jesuh Khrih kha hmuh duh sawhsawh men aa zuammi a si. 

Khrih ah dawtmi u le nau hna nang le kei zong kan Bawipa Jesuh Khrih kan biakmi kan Pathian hi a konglam (asiloah) a tuahsermi, khuaruahnak a tuahmi vialte theih duh menmen in maw! kan Bawipa Jesuh Khrih hi kan fuh, amah hi kan biak (asiloah) a thawngṭhabia, a biathiang kha dawtnak he a kan chimhmi vialte kha kan lungthin ah i cohlan in a hmaanmi ngaihthiamnak, biak dingah a kawlmi, hmuh a duhmi, kan lungthin taktak in hmuh a duhmi duhnak in maw nang le kei kan biakmi kan Pathian hi kan kawl, hmuh kan i zuam. Hi Herod nih hin Johan cung i a tuahsernak vialte kha a lungthin, a thin a phang cang. Cucaah kan Bawipa Jesuh Khrih kong a vun theih bakin hi pa hi ahodah a si hnga, ti kha hmuh a duh ngaingai mi a si. Johan a si ahcun ka thahter cang hna, a ti. Kan Bawipa Jesuh Khrih kha hmuh duh taktak thinlung he a kawlmi si loin a thahtermi Johan kha a si taktak hnga maw ahodah a si hnga; ti kha a sualnak lei phuhrunnak kha a ngeih cang caah khan hmuh duh menmen in kan Bawipa Jesuh Khrih kha a kawl e, a ti. 

Nihin ah dawtmi u le nau hna kan biakmi kan Pathian nih zeitin, “Fek tein a ka kawlmi nih an ka hmuh lai” a ti. “Kawl u law nan hmuh lai” a ti. Cun Mathai thawngṭhabia chung zongah zeitin a ti, “Lungthin a thiangmi cu lunglawmmi nan va si dah! Pathian kha nan hmuh lai” a ti. Hi Herod Siangpahrang hi lungthin thiang tein hmuh duhnak taktak he kan Bawipa Jesuh Khrih hi va kawl seh law a hmuh ko hnga. Asinain a hnubik ah Pilat zungah a hmuh ko nain khakha a hmuhnak caan a caah san a tlai ti lo, a caah a hmuh ko nain a caah khamhnak a si ti lo. Pilat Siangpahrang sinah thahter dingin a chanhtu lila ah a cang. 

Dawtmi u le nau hna Nang le kei zong kan Bawipa Jesuh Khrih hi kan nunnak ah thahter ding lawngin maw hmuh kan i zuam (asiloah) amah biak dingah (asiloah) amah thangṭhat dingah, a tuahsernak vialte nang le kei kan nunnak ah, kan lungthin ah, hi vawlei caan tawite kan nun chungah hmuh duh in biak dingah maw nang le kei kan biakmi kan Pathian kan Bawipa Jesuh Khrih hi kan kawl, kan i zuam timi hi kan nunnak ah i check usih. “Lungthin a thiangmi cu lunglawmmi nan va si dah! Pathian kha nan hmuh lai” a ti. Lungthin thiang tein a kawlmi biak duhnak he, dawtnak he, nawl ngaihnak he, upatnak he nang le kei kan biakmi Pathian hi a kawlmi, biak dingah lungthin thiang tein a kawlmi Khrihfa kan si i kan i zuam ko a si ahcun nang le kei kan hmuh hrimhrim ko lai, ti kha nihin ah thazaang pek kan duh hna. Hakha Service RVA a ngaitu nan dihlak cungah Bawipa nih a thar in thluachuah in pe ko hna seh.

Thazang petu /- Saya William