America ram Crookston Diocese chungum Biakinn 7 ah Zarhpi ni Missa pumhnak a um ti lai lo
America ram, Minnesota pengchung um Crookston Diocese chungah zumtu milu an hun tlawm ruangah siseh, Thlarau lei in hruaitu siangbawi milu an tlawm tuk cang ruangah Biakinn pi hmun 7 ah zarhpi nih pumhnak le Missa raithawinak a um ti lai lo tiah Bishop Andrew Cozzens nih theihter nak a tuah. Hi bantuk biakhiahnak tuah cu diocese hruaitu Bishop pakhat dirhmun in thil har ngaingai mi pakhat zong a si tiah Bishop nih cun a chim.
Biakinn 7 khar a si lai ah Crookston diocese chungum parish 65 a rak si tawn mi kha parish 58 lawng a si cang lai. Zarhpi ni ah Missa thawinak tuah ti lo nak ding biakinn hna cu:
- St. Philip (Falun)
- St. Mary (Badger)
- St. Francis Xavier (Oklee)
- St. Ann (Goodridge)
- St. Francis of Assisi (Fisher)
- St. Mary (Euclid)
- St. Joseph (Oslo) hna hi an si.
Diocese chung nawl ngeitu hna nih an langhter ning ahcun khuate lei ah minung an hun tlawm ruangah siseh, siangbawi cannak sianginn a kaimi an tlawm tuk ruangah le biaknak lei rianṭuantu an tlawm tuk cang ruangah asi tiah an ti. Cupin ah diocese chungum Pathian rianṭuan lio mi siangbawi 32 chungin chancheu cu a tu hnu kum 10 chungah hin kumtlin ruangah dinh ding hmunhma a phan mi an si cang caah, diocese chung ah Pathian rian pehzulh in ṭuan khawhnak hnga ding caah a thar in tawlrel ning suaisiam a herh caah a si tiah an ti.
Bishop Andrew Cozzens nih: Parish pakhat ah Zarhpi Missa thawinak a um ti lo timi cu zumtu hna caah intuar a har ngaimi thil a si ko lai tiah a lung chungum bia zong a chim. Sihmanhsehlaw, John 15 chungah kan hmuh bangin ‘mitsur nge kan tan tikah mitsur kung caah cun a fak ngaimi thil a si ko nain i thlennak le hmailei theipar tampi a tlai khawh nak hnga ding caah a si ko’ tiah a ti.
Hitin thil thlennak tuah timi zong hi Biakinn hna le biaknak he aa pehtlai mi thil hna khar dih cikcek ding kha si loin, siangbawi hna an tlawmtuk ruangah le minung um-ṭhial kal a tam deuh lio caan a si caah, rianṭuannak ah ṭha deuh in tawlrel khawh nak hnga ding caah a si tiah Crookston diocese chimphuannak nawl ngeitu hna nih fianternak zong an tuah.
Source: Diocese of Crookston, EWTN NEWS/CNA