Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u

Nihin ah kan Nu Bupi nih a kan thim piakmi thawngṭhabia (Mt. 17:1-9) chungin in thazang i lak ṭi hna u sih. “Cu hnu ni ruk ah Jesuh nih Peter le Jeim le a nau Johan kha tlang sangpi cungah anmah lawng tein aa kaipi hna. An hmaiah cun a mui kha aa thleng i a hmai cu ni bangin a ceu i a hnipuan cu ceu bantukin an rang. Cun a zultu pathum hna nih cun Jesuh cu Moses le Elijah he bia an i ruah kha an hmuh. Cucaah Peter nih cun Jesuh cu a hun thawh i, “Bawipa, hika um hi a nuam; na duh ahcun thlam pathum in kan sakpiak hna lai, nangmah caah pakhat, Moses caah pakhat, Elijah caah pakhat,” tiah a ti. Cu ti bia a chim lioah cun a ceumi minmei nih a run zelh hna i minmei chung cun aw nih, “Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u,” tiah a ti. A zultu pawl nih aw kha an theih tiakh an thin a phang tuk i vawlei ah an bawk. Jesuh cu a ra i a tongh hna i, “Tho u, nan thin phang hlah u!” tiah a ti hna.Cucaah van lei kha an hun zoh i Jesuh lawnglawng kha an hmuh. Tlang cungin an ṭum pah ah kha, “Hi thil nan hmuhmi hi, Mi Fapa hi thihnak in thawhter ka si ṭhan hlanah cun ahohmanh chim hna hlah u,” tiah a ti hna.

Khrih ah dawtmi u le nau hna, August (06) ni ah kan Nu Bupi nih “Kan Bawipa Jesuh Khrih muihmai thlennak puai, The Transfiguration of The Lord” timi puai sunglawi ngaiin a kan tuahpiakmi ni a si. Hi ni a tlangtar in thazaang lak ṭi ding le ruah ṭi dingin ka duhmi cu zeidah a si tiah cun (Mt. 17:5) chungah, “Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u,” timi hi bia tlangtar in thazaang i lak ṭi le hrawm kan duh hna. 

A voikhatnak kan relmi (Daniel 7:9-10, 13-14) chungah zeidah kan hmuh tiah cun Profet Daniel nih a hmuhmi “A zungzal a nungmi” tiin bawi thutdan cungah a thumi Daniel nih a hmuhmi kha kan hmuh. (Daniel 7:14) chungah zeidah kan hmuh, “Bawinak le sunparnak le siangpahrang ṭhawnnak kha amah cu pek an si i cucaah miphun zakip le holh phun zakip nih a rian kha an ṭuan. Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak a ngeihmi cu zeitikhmanh i hrawh khawh lomi ṭhawnnak a si” tiah a ti. Kan Bawipa Jesuh Khrih bawi a sinak kong, siangpahrang a sinak kong kha Profet Daniel nih a hmuhchungmi kha nihin ah kan hmuh khawhmi a si. 

Cuve bantukin (Ps. 97:1-2, 5-6, 9) chungah, “Bawipa cu siangpahrang a si, maw vawlei i lawm tuah” a ti. Rili chung i a ummi tikulh vialte hna i lawm uh, khuadawm le muihnak kha a velchum in an um a pennak cu dinnak le biading cungah a hram a bunh. Liannganmi Bawipa nangmah cu vawlei cung dihlak uktu na si. Pathian dang, Pathian vialte hna nakin a let tampi in na ngan deuh” a ti. 

Salm hla lehnak chungah, “Lianngan Bik Bawipa, nangmah cu vawlei cung dihlak a uktu a si; pathian vialte hna nakin a let tam piin na ngan deuh” tiah a ti. Chimduhmi cu kan Bawipa Jesuh Khrih cu siangpahrang vialte lakah siangpahrang, bawi vialte lakah bawibik a sinak, cungnungbik Pathian a sinak kha le kan Bawipa Jesuh Khrih a sinak kha Porfet Daniel chungin siseh, cun salm hla chung zongin siseh nihin kan hmuh khawhmi a si. 

Cuve bantukin a voihnihnak bible kan relmi (2Pet. 1:16-19) chungah zeidah kan hmuh tiah cun Mithiang Peter nih kan Bawipa Jesuh Khrih a sunparnak, nihin ah a muihmai aa thlennak a hmutu a sinak kha tehte a khaannak kha nihin ah kan hmuh khawhmi a si, kan relmi a si. Hihi mi phuah chawmmi le tuanbia tuktak kan i rinhmi a si lo” tiah a ti. A lianngannak kha kan mit hrimhrim in kan hmuh, sunparnak cungnung bik nih, “Hihi ka dawtmi ka Fapa a si, kan lung a ka tongtu a si,” tiah a ti i Pathian kan Pa nih upatnak le sunparnak a pek tikah khan, cuka hmun ah cun kannih kha kan um. Tlang thiang cung i amah sin kan um lioah, hi aw cu vancung in a run kha kanmah hrimhrim nih kan theih. 

Cucaah cun profet hna nih an rak chimmi bia kha kan zumh chinchin” tiah a ti. Nihin ah Peter nih kan Bawipa Jeush Khrih kongah tehteh a khaannak kha a voihnihnak bible kan relmi chungah khan nihin kan hmuh khawhmi a si. Nihin Tabor tlang kan Bawipa Jesuh Khrih nih Peter le Jeim le Johan a kaipi hna tikah khan cu tlang terbo tlang ahcun kan Bawipa Jesuh Khrih nih a muihmai kha an vung i thleng i, a hmai cu ni bangin a ceu i a hnipuan zong kha horha bantukin a hrang dih, a ceu dih, a ti. A zultu pathum hna nih cun kan Bawipa Jesuh Khrih cu Moses le Profet Elijah he bia an i ruah kha an hmuh tikah Peter nih Jesuh cu a hung thawh i zei a ti tiah cun, “Bawipa, hika um hi a nuam; na duh ahcun thlam pathum in kan sakpiak hna lai, nangmah caah pakhat, Moses caah pakhat, Elijah caah pakhat kan ser piak hna lai tiah cutin a chim lioah cun minmei nih cun a run zelh hna i minmei chung cun aw pakhat an theihmi cu zei a ti, “Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u,” tiah minmei chung cun Pa Pathian nih kan Bawipa Jesuh Khrih kha tehte a khaannak, amah pumpak nih hi vawlei kha khamh awkah, vawlei misual hna kalpi awkah, lak piak awkah vawlei mi kan caah a run peknak kha mi vialte nih hmu hna seh ti a duh caah tehte a khaannak kha phuan chin dingah a zultu pathum hna sinah khan tehte khaan in a rak chimmi aw a ti. 

Nihin Pa Pathian nih kan Bawipa Jesuh Khrih a aw kha ngai dingah, zulh dingah nihin ah nang le kei a kan chimh. Nihin kan Vawlei pumpi Facebook chungin siseh thawng pang kan zoh tikah hin thawngpang ṭha nakin thawngpang chia hi nihin ah kan theih deuhmi a si. Pawngkam kan zoh tikah cuve bantukin a si. Thahnawnnak, lainawnnak te hna a phunphun in thangchiat sawiselnak vialte hna nihin ah kan theihmi a si. Kha vialte nakin nihin zumtu Khrihfa hna nih kan theih dingmi cu zeidah a si? Kan Bawipa Jesuh Khrih a aw kan ngaih ding le kan Bawipa Jesuh Khrih a bia hi kan zulh dingmi le hi a bia hi nihin ah nang le kei nih kan theih dingmi le kan zulh dingmi a si ti hi nihin ah kan hmuh khawhmi a si. Nang le kei zong kan Bawipa Jesuh Khrih a muihmai aa thlen bantukin nifatin kan nunnak ah hin kan i thlen ve awk a si timi zong philh hlah usih. 

(2Kor. 5:17) chungah zeidah kan hmuh, “mi zeihmanh Khrih ah an i pehtlaih tikah cun, Khrih chungah a um tikah cun a nunning hlun kha a lo i nunning thar kha aa thawk cang” tiah a ti. Kan Bawipa Jesuh sunpar lianngannak he mi vialte nih hmu hna seh ti a duh caah a muihmai aa thlen bantukin nang le kei zong vialte hmuh khawh dingah kan Bawipa Jesuh Khrih a muihmai aa thlen bantukin nifa kan nunnak in kan nun hlun vialte kha thlau, thah in kan i thlen ding a si i, nunning thar in Khrih ah hin kan i thawh dingmi a si ti hi zeitikhmanh ah philh hlah usih. 

Khrih ah aa thawkmi nun ah mi nih zohchunh tlak le lak awk dingmi i nunpi dingmi nihin nang le kei i thawh in a kan hmutu hna nih, “Hihi Pathian fanu fapa, Khrih nih a dawtmi fanu fapa an si” ti kha a kan zumh te dingin khan nihin ah kan nun ding a si timi zong hi nihin ah philh hlah usih. Nihin nang le kei zong Pathian dawtmi fanu fapa kan si ve i, kan nun mi nih an kan zoh tikah zohchunh tlak, cawn awk tlakin nung ko hna usih. 

Nang le kei kha Pathian nih “Hi pa hi ka dawtmi ka Fapa, ka lung a ka tong ngaingaimi a si. Amah bia kha ngai uh” a kan ti bantukin, nawl a kan pek bantukin, a kan forhfial bantukin kan Bawipa Jesuh Khrih a aw, a nawlbia le a bia hna hi kan i nunpi i kan zulh ko a si ahcun nang le kei zong Pathian dawtmi fanu fapa kan si lai. Pathian dawtmi fanu fapa kan si khawhnak dingah cu a nawlbia, a bia a zul khomi kan si khawhnak ding ah Bawipa nih kan dihlak cungah thluachuah kan pe ko seh. 

Thazang petu /- Saya William