Nun himnak caah dornak a kawlmi hna kha hnu chit in mer tak hna hlah u tiah vawlei ramkip hruaitu hna sin ah Pope nih nawlnak a tuah

June 21, Zarhpi ni ah St Peter’s Square ah Angelus thlacam dih ti Pope Leo XIV nih mipi sinah biacahnak a ngei. Brazil ram ah mawtaw canghsual ruang ah nunnak a liammi hna caah thlacam piaknak zong a ngei fawn. Cun June 20 ah United Nations nih tuahmi Vawleicung Ralzam Ni kha ruahṭhan in hremnak, thahnawnnak le buainak le harnak a phunphun ruang ah ralzaammi hna kha kilven dingah biakam thar tuah awk ah vawleicung ramkip hruaitu hna sin ah nawlnak a tuah. Ralzaam kong he pehtlai in 1951 ah UN Meeting an rak tuahmi ah minthutnak le hnatlaknak a rak um. Cu UN meeting an rak tuahmi cu 75 tling cang. Cu kong he pehtlai in Pope nih a chimmi cu, Vawlei Ralpi Pahnihnak a dih hnu ah, inn le lo, khua le ram chuahtak in ralzaam mi hna cungah upadi ning in kilvennak pek ding in dirhmi ramkip hnatlaknak le a caan sau a hmun dingmi zohkhenhnak a umnak ding a biapi tiah a chim.

Hi kong he pehtlai in ram kip hruaitu hna cungah Thiang Thlarau nih an chiaṭha thleidan khawhnak chung ah rian a ṭuan lai i an lungthin a ceuter lai tiah ka ruahchan tiah a chim chap. Sifah harnak le ṭihnung ral ton ruangah nun himnak hmun a kawlmi le ralzaam mi hna kha mer tak in hrial awk an si lo. Hremnak a tongmi hna kha daihnak le upat ṭihzahnak he an nun khawhnak hnga kan bawmhchanh hna  ikan cohlan hna awk an si tiah a ti. Kan hnu naite ah, Ceará Ramkulh accident in a thimi mino hna caah thla ka campiak hna lai tiah “, tiah a ti. Mah thil sining nih hin basketball team ah aa telmi minung 7 nunnak a liam i, cu hna chungin Kum 15 le 22 karlak, a thimi hna cu Juazeiro do Norte khuapi chung Brazil sianginn tampi in siangngakchia le siangngakchia hlun an si tiah theih asi.