PA LE NU A SER HNA NAK LE PARADAIS I AN UM LIO

Pa le nu cu Pathian nih a ser cang hna. Khatlei ah minung an sinak ah tling tein an i tluk. A dang khatlei ah pa sinak le nu sinak an ngei. Pa sinak le nu sinak hi a `hami a si i Pathian a duhmi a si. Pa le nu nih sertu Pathian sinin an hmuhmi hmaihngalnak kha an ngei cio i cucu lak piak khawh an si lo. (Gen. 2:7, 22). Pa le nu nih Pathian muikeng an sinak ah hmaihngalnak pakhat aa lomi kha an ngei. Pa le nu sinak ah Pathian a fimnak le a dawtnak kha a lang.

Pathian nih pa le nu kha a ser hna i pakhat caah pakhat siseh, ti kha a duh hna. Pathian bia nih mah kong kha theihthiam dingah a kan bawmh. “Mipa hi mah lawng um cu a `ha lo, amah caah a tlakmi bawmtu ka ser piak lai,” a ti. (Gen. 2:18). Saram dang pakhat te hmanh a phun hawi an si kho lo. (Gen. 2:19-20). Mipa hnakruh in Pathian nih a sermi minu kha a un hmuh tikah mipa cu khuaruahhar le lawmhnak in a au: “A dongtakawi ah, “Mah hi cu: ka ruh in a simi ka ruh, ka sa in a simi ka sa,” a ti. (Gen. 2:23). Mipa nih minu kha ‘keimah’ dangin a hmuh i minung sinak pakhat te aa hrawmmi a si k ha a rak hmuh.

Pa le nu cu pakhat caah pakhat si awkah ser an si. Cucu pumkhat si awk caah le bawmtu si awk caah a si. Thitumnak ah Pathian nih, “thikhat sakhat” ah a kawmh hna caah minung nunnak kha a pek chin khawh. “Tefa ngei ulaw pungzam ulaw vawlei kha khat dih u,” (Gen. 1:28). Nunnak kha a pek hna caah pa le nu nih nu le va le nu le va sinak in sertu rian`uannak kha an bawmh.

Pathian khuakhannak chungah pa le nu nih, “Vawlei tei awkah auhnak an hmuh. Pathian chawkengtu an si. Sertu mui in sermi pa le nu hna cu Pathian nih a sermi thil vialte kha zohkhenh awk rian an ngei. Zeizong vialte anmah kut chungah ap dih a si.

Hmasabik minung cu `ha tein ser lawng kha a si lo. Sertu Pathian he i kawmh in mahle mah siseh, sermi thil dang hna he siseh, rualrem tein um awkah chiah a si. Cu nunnak nakin a sung deuhmi nunnak cu Khrih ah sertharnak lawng a si.

Adam le Eve hna cu thiannak le dinnak chungah ser an si i mah thiannak an ngeihnak cu Pathian nunnak kha an hrawm awk caah a si.

Minung hi Pathian he rem tein an um chung paoh cu sifah harnak le thihnak an tong lai lo. (Cf. Gen. 2:17, 3:16, 19). Minung pumpak chungah rualremnak, pa le nu karlak ah rualremnak a um tikah sermi thil vialte he rualremnak a um ve. (Gen. 2:25).

A hrawmthawk in Pathian nih minung sinah a rak pekmi vawlei teinak hi minung chungah a um. Cucu mah le mah i ukkhawhnak hi a si. Hmasabik minung cu ningcang tein ser an rak si caah pumsa duhnak in an luat. (Cf. IJn. 2:16).

Pathian le minung anni remnak langhternak ah Pathian nih minung kha dum chungah a chiah hna. (Gen. 2:15, cf. 3:17-19). Thlawh awk le zohkhenh awkah annih cu cuka ahcun a chiah hna. Rian`uannak cu annih caah thilrit a si lo, minung nih Pathian sermi thil hna dawhtlinnak caah bawmh kha a si ko. Mah tlukin aa rualrem mi dinnak le nuamhnak cu kan pa hna nih sual tuahnak in an rak thlau.