Khrih nun a ngeitu

Nihin kan relmi (1Peter 5:5-14; Mk 16:15-20) hna hi an si. “Vawlei cung khuazakip ah va kal u law miphun kip kha thawngṭhabia va chim hna u. A zum i tipil a ing mi paoh nih Khamhnak an hmuh lai. A zum lomi paoh nih sual phawtnak an hmuh lai. A zummi paoh cu hi ṭhawnnak hmelchunhnak hi pek an si lai. Ka min in khuachia an ṭhawl khawh hna lai. Holh theih loin an holh lai. Rul kha an tleih hna lai i siivai an din zongah zei ti hmanh in an um lai lo. Mizaw cungah an kut an chuan lai i an dam lai” tiah a ti. 

Jesuh a min hi khuachia nih a ṭih mi a si lo. Khuachia nih a ṭih mi cu Khrih nun ngeih hi a si. 

Nihin cu Gospel ṭialtu Mark puai ni zong a si. Mark cu Peter thawngin Khrihfa ṭha ah a cang mi a si. Herod nih Khrihfa a hrem lio, Peter thong a tlak lio ah pumhnak inn le thlacamnak inn ah an hmanmi cu Mark te inn a si. Lamkaltu 12:12, 15:38 chungah ‘Mark cu ahmasabik Paul le Barnabas hna he Bawipa ram kauhnak caah rian a rak ṭuan ṭi.’ A hnu ah an i ṭhen i Paul le Silas cu Syria, Silicia ram lei an kal. Cun Peter he zong rian a rak ṭuan ṭi timi kha nihin avoi(1)nak kan relmi 1Peter 5:13 ah Peter nih “Ka fapa Mark” tiah a rak ti. Mark nih Peter cu Rome khua lei ah a zulh. Paul cu Jesuh ruangah Rome bawi hna nih thong an thlak. Mark he an i tong. Rome a um lio ah Mark Thawngṭhabia hi a rak ṭial mi a si. Pupa hna cawnpiak ning in cun, Thawngṭhabia a ṭial dih hnu ah Izip ram Alexandria khua lei ah a kal i thawngṭhabia a rak chim i Khrihfa bu a rak dirh. Jesuh a zumh ruangah an tleih i thong an thlak i a thi. Mithiang Mark bantukin Bawipa ram kauh nak ding caah biatak tein thawngṭhabia a phuang kho tu kan si khawhnak hnga ding caah amah sinah bawmhnak hal hna u sih.

Sacrament 7 an i funtomnak cu Bawipa thisa hi a si. A sangbik sacrament zong Bawipa thisa hi a si. Abiapi cemmi sacrament cu tipil innak a si. 

Nihin kan relmi thawngṭhabia chungah ‘vawlei cung khuazakip ah va kal u law miphun vialte kha thawngṭhabia va chim hna u. A zum i tipilnak a ingmi paoh nih khamhnak an hmuh lai’ a ti. Tipil innak cu khamhnak hmuh nak a si. Tipil nak kan hmuhnak thawngin kan thlarau thiannak veel, Pathian nunnak kan hmuh. (CCC- 1163 ) Pathian fanu fapa a kan siter. CCC-1213,1274 ‘Sualhram pasarih chungin kan luat. Dinnak veel kan hmu. Bupi member kan si’ (CCC 1265-1266).

Thawngṭhabia chungah “Ka min in khuachia an ṭhawl lai. Mizaw an damter lai” a ti. Lamkaltu 19:11-16 chungah ‘Mithiang Paul nih mizaw a damter. Khuachia tampi a ṭhawl hna. Paul nih a tuahmi kha Judah Tlangbawi Ngan Skeva fapa 7 hna nih an hmuh. Paul lawng nih a tuah kho lo. Kanmah zong nih kan tuah khawh ve ko. Jesuh min kan hman ve lai i Khuachia kan ṭhawl ve lai an ti hna. Khuachia ngeimi hna sinah an va kal i Jesuh min in thla an campiak hna. Paul nih a chim bantukin Jesuh min in chuak u kan ti hna’ an ti. Khuachia nih cun a thawh hna i ‘Jesuh cu kan hngalh, Paul zong kan hngalh. Sihmanhsehlaw nannih cu aho nan si kan hngal hna lo’ a ti hna i khuachia ngei mipa nih chun a ṭhuat ciammam hna i a tei hna i thi he hnai he an zam dih.’ Jesuh a min in khuachia nih a ṭhih ti lo. Mithiang Paul nih Glati 2:20 ah “A nung mi cu keimah ka si ti lo. Ka chung i a ummi Jesuh tu hi a si” a ti. Khuachia nih a ṭihmi cu Jesuh min si loin a chung i a ummi Jesuh tu kha a si deuh. 

Jesuh nun kan ngeih ni cu tipil kan in ni a si. Jesuh nun ngei tu kan si.