Nunnak in zungzal nunnak ah
Nihin ni caah kan relmi cathiang hna cu (Lamkaltu 8:1-8; Jn 6:35-40) hna hi an si.
Nunnak kan timi hi kan takpum he aa ṭhen hnu zongah hin a thi kho lo i zungzal nunnak ah maw a kal lai i zungzal hrem hmun ah dah a kal lai, hmun khatkhat ah a kal ding cu a si ko. Cu nunnak cu Pa Pathian nih Fapa Jesuh Khrih thawngin pek a kan duh i Fapa Jesuh Khrih nih hin a thi le sa in zungzal nunnak co hna seh timi hi a kan duhmi a si ti kha cathiang ah kan hmuh mi a si.
Vawlei cungah sermi thil vialte hi a hmun ding zeihmanh an um lo. Minung sermi siseh, Pathian sermi siseh, zungzal a hmun ding zeihmanh a um lo i an caan a phak tikah cun a rawk, a dih ding lawng te kha an si. Sihmahsehlaw, Pathian nih a ser in sermi siloin Amah a nunnak, a thaw a chuah hnawh a kan pek mi nunnak tu hi cu a thi kho mi a si lo ti kha cathiang ah kan hmuh.
Khrihfa a silo mi zumhnak dang, biaknak dang hna zong nih nunnak hi cu a thi kho lomi a si ti kha fiang tein an hngalh cio i, kan kawlram biaknak ‘Budist’ biaknak kan zoh tik zongah nunnak hi cu a thi kho lomi a si i, kan thi kan chuak ṭhan tibantukin chan 31 kan i hel hnu ah zeihmanh a um ti lonak a daihnak “Nirva” ah kan i din ti kha an zumhmi a si.
Kannih Khrihfa hna zongnih kan zumhmi cu hi kan nunnak hi a thi kho lomi a si bantukin Khrih thawngin zungzal nunnak ah kan phan lai ti kha kan zumhmi a si ve. Cucu kan Bawipa Jesuh Khrih nih a thi le a sa in a kan um pi zia le zungzal nunnak co hna seh ti kha a kan duh piak mi a si. Lai tlang zumhnak cheukhat nih “Jesuh Khrih cu changreu chungah zeitin dah a um khawh lai? Mitsur hang chungah cun zeitin dah a um khawh lai” tiah an minung sinak, taksa ruahnak in an ruah tikah an zum kho lo. Keimah philh lonak ca lawngah tuah u a kan ti ko cu tiah an ti i kan Bawipa thi le sa kha an zum duh lo.
Tahchunhnak ah dawr i an zuarmi thil thaan pakhat kha nu pakhat nih aa cawk i hni ah aa ṭhit tikah cun nu hni ah a cang ko i cu thil thaan pakhat cu aa laan ah siseh minung nih an ti tikah cun cu thil thaan cu mi nih upat mi le hmai zah mi ah a cang ko. Thil thaan ciocio a si ko nain minung nih siseh tiin sining tampi ai dang mi kha kan hmuh mi a si.
Cu ve bantukin changreu a si ko nain kan Bawipa Jesuh Khrih nih ‘ka thisa siseh, ka thisa a si’ tiah a ti a si ahcun a thisa a si ko tiah kannih nih kan zumh ding kha a si ko. Minung thinlung le, thluak le ruahnak in kan tuak i kan phak khawh mi lawng kan zumh ding a si ahcun kan biakmi Pathian hi minung level lawng a si hnga. Sihmahsehlaw, kan biakmi Pathian cu minung ruah khawh lomi, tuak khawh lomi pin lei tiang a ruat kho tu a tuak kho tu a si caah kan biakmi Pathian a si kan timi cu a si. Cucaah Pa Pathian nih Fapa Jesuh Khrih thawngin zungzal nunnak co hna seh ti a kan duh bantukin Fapa Jesuh Khrih nih a thi le sa thawngin zungzal nunnak co hna seh timi kha a kan duh ve mi a si.
Cucaah dawtmi u le nau hna zungzal nunnak kan phak kan co khawhnak hnga ding caah hin kan Bawipa Jesuh Khrih nih ‘Ka Pum thiang a si. Zungzal nunnak ka si. Vancung in a rung ṭummi nunnak changreu cu ka si. Ka sa a ei i ka thi a dingmi cu zungzal nunnak an ngei lai’ tiah a kan ti bantuk tein kannih hna nih zungzal nunnak kan co nak hnga ding caah kan Bawipa Jesuh Khrih nih a kan cah ta mi bia hi kannih nih zumh in zulh i zuam ko hna u sih.
Zungzal nunnak timi cu Pathian bia chungah, kan Bawipa Jesuh Khrih bia chungah a ummi a si i, Jesuh Khrih bia leng i, cathiang bia leng i cu minung zumhnak le minung ruahnak a si caah a dong ding a si. Kan biakmi kan Pathian nih a kan cah ta mi “Bia” cu zungzal in a hmun mi “Van le vawlei hmanh rawk sehlaw ka bia cu a rawk lai lo” tiah an kan cah bantukin a bia i a ummi “zungzal nunnak changreu cu keimah hi ka si. Ka sa a ei i ka thi a dingmi cu zungzal nunnak an ngei lai. An rawl a ṭam in an ti a hal ti lai lo” tiah a kan ti bantuk tein kannih hna nih zungzal nunnak Vancung ram kan phak khawhnak hnga ding caah kan Bawipa Jesuh Khrih nih an kan umpi ko. Zungzal in zungzal tiang ti kha kannih nih kan zumh i kan Bawipa Jesuh Khrih thi le sa kha i hrawm ṭi zungzal ko hna u sih.