St. Paul Miki & His Companions, Martyrs (1597)

Audio (aw) zong in ngai khawh a si. 👇👇

Japan ram in hmasabik Mithiang a simi St. Paul Miki cu 1564 kum ah a chuak. A ngakchiat tein Jesuit bu ah a lut i Bible kha tei ngaiin a chim khawh. Japan ram ahhin kum (50) tuan deuh in Khrihfa thahri a rak bunh cang caah zumtu 2 million an um cang. 1588 kum ah Siangpahrang Kanpa Kuadono nih ‘Keimah lawng Siangpahrang ka si’ tiah a thanh i Khrihfa phungchimtu hna kha thla ruk chungah an ram cio ah kir dih dingin nawl a rak chuah. Missionary tampi hna cu an kir ko nain Brother Paul Miki le a hawi cheukhat hna tucu a thlithup in an taang. 1597 kum ah Bro. Paul Miki le a hawile (25) hna kha ralkap nih an hmuh hna i an rak tlaih hna. Nakasaki khua tiang khuapi tampi tan in an rak hruai hna i, cu lamthluan ah an hna tannak, sersat zawmhtaihnak hna kha an in. An zapi tein Vailamtah cungah an ṭem chih hna i an hngawng ah thir aa telmi an bunhpiak hna. An ralṭhat zia kha a hmumi hna nih an khuaruah a har ngaingai. St. Paul Miki le a hawile hna cu Pathian ṭhawnnak kha Salm hla in an thangṭhat hnu ah “Bawipa, Na kut chungah kan pum le kan thlarau kan in chanh” tiah an ti. Bro. Paul Miki cu a sunglawi bikmi Vailam cungin mi hna kha “Keimah cu Japan ah ka chuak i Jesuit bu ah kawh-auhnak ka hmu. Khrih thawnṭhabia caah ka thi cang lai. Siangpahrang le ka nunnak ral a ka sermi hna kha ka ngaihthiam hna. An zapi in tipilnak an in i Khrihfa an sinak hnga kan nawl” tiah a chimtaak. Cu hnu ah kut sum lo mithattu pali hna nih an vainam an chuah i an zapi in caan tawite chungah an thah dih hna. “Jesuh, Mary, Joseph ……. Thlacamnak kha cat loin cam caan ah an hmai cu daithup tein a rak um. Cu Japan ram Martyr hna cu 1862 kum ah Mithiang sinak an rak pek hna.