St. Agatha, Virgin & Martyr (250)

Audio (aw) zong in ngai khaw a si. 👇👇

Gathania khua i Martyr a simi St. Agatha cu kumzabu (3) nak hrawnghrang ah Sisilli i minthang mi chungkhar in a chuak. A ngakchiat tein Pathian sinah pekchanh mi a rak si cang caah zeibantuk hamnak le ṭhit-umhnak caah hal mi hmanh a rak duh lo. Amah a helh mi hna chungin pakhat, tlangpi Gosium cu, cu bantukin duh lo nak a ton ve caah a thin a hung tuk i a in khawh lo caah St. Agatha cu tazaa a cuai. Decius Siangpahrang nih Khrihfa hna a hrem lio caan a simi AD 250 lioah nuṭhalo rianṭuannak i inn hngaktu Abroditia sinah St. Agatha cu an kuat. Asinain Pathian zohkhenh kilvennak thawngin Agatha cu a zumhnak kha a thleng lo. Thlakhat a rauh tikah St. Agatha kha khatlei le khatlei hri in hnuh in rengh in hremnak ah an sermi she cungah chiah in hremnak, thirso in a vun hlainak, hrihrual in vuaknak le tukvelhnak hna in an hrem. Ahnu bikah nu sinak zawn ah rialchih in tannak sifahnak a rak ing. Nili a rauh tikah thlalang kuai cawh mi meiṭil senpi cungah taklawng in an khin i sifah an inter ṭhan. Cuti an inter hnu, thong chung i an rak putṭhan lioah Agatha nih, “A ka sertu Pa Pathian, hi vawlei harnak chungin nangmah nih na ka chanh i hremnak tampi kha in khawhnak, ngaihthiam khawhnak thazaang kha na ka zaangfah. Atu ah ka thlarau kha ka cohlan piak hram ko” tiah a chim i a thi. St. Agatha cu Nurse Sayamah hna a zohkhenhtu a si hleiah lihninhnak le hnuk he pehtlaimi zawtnak hna ca zongah mitampi nih an bochan mi a si.