St. Blaise, Bishop & Martyr (306)
Audio (aw) zong in ngai khawh a si. 👇👇
Hrom zawtnak a ngeimi hna a kilveng i a khamhpiaktu St. Blaise cu Armenia ram i phunsang nu le pa nih an rak hrin. Khrihfa fimnak kha ṭha tein a rak thiam i siibawi pakhat a rak si. Cu hnu ah Siangbawi cannak a rak hmu i Sebasterial khua Bishop zong a rak si.
Lucinius Siangpahrang nih Khrihfa hna a rak hrem caan chungah amah nih a thlop i thluachuah a pekmi hna sahrang hna an umnak ramlak lungkua ah a rak i thup. Puai zohnak inn ah kuat dingin saram hna tlaih ah a kawlmi sakap thiam hna nih an hmuh i an tlaih hnu ah Armenia i Rome khuaukbawi Akarit Kolos sinah an kuat. An kalpinak lam ah nutung pakhat i a fate cu a hrom ah ngaruh nih a chunh i St. Blaise sinah cun a ratpi. Amah nih thla a campiaknak thawngin ngakchia cu thlop a si. Cu ni thawkin hrom he pehtlai mi zawtnak a ngeimi hna nih St. Blaise cu an panh cio.
A rauh hlan ah hremnak ing in thihnak kha a fekmi zumhnak he a phorh. Thir hmunthur huinak in a titsa kha an hlai i a lu an tan in a thi. St. Blaise puai ni ahhin Khrihfa hna i an hrom kha thluachuah pek ciami meilul (phazawngdan) pahnih in Vailamtah hmelchunhnak an tuah i thluachuah an pek tawn hna. Cu lioah Siangbawi nih “Bishop le Martyr a simi Mithiang Blaise i thlacam piaknak thawngin; na hrom i na in mi zawtnak hna le thlichia in in khamh ko seh, Pa le Fapa le Thiangthlarau a min in Amen” tiah a chim.
St. Ansgar, Bishop (801-865)
Europe thlanglei i lamkaltu a simi St. Ansgar cu AD 801 kum, France ram i Amian khua pawngah a chuak. Picadi khua i Benedict Zateik Sianginn ah fimnak a rak cawng i Wespelima khua i New Kobi Zateik phungki Sianginn uktu Zateikci a rak si. AD 832 kum ah Hambeth khua Bishop sinak an rak pek hnu ah Denmark, Norway le Sweden ram hna ah phungchim dingin mission ṭuanvo pek a rak si. A phung chimnak ah zaran nakin a hleikhun mi le siaremnak pahnih aa cawh. Pupa zumhnak aa hruhchih mi Sweden Siangpahrang pa cu Khrihfa phungchim (missionaries) hna kha a ram ah luhter awk a tlak le tlak lo mee in biakhiahnak a tuah. St. Ansgar cu, cu buaibainak caah Pathian sinah bawmh hal in thla a cam tikah mee a hmu i Sweden ram chung luhnak nawl a hmu. Amah cu a hrat ngaimi rang-mei in tah mi angki kha i hruk, ti le changreu lawng ei in le sifak harsa mi cungah dawtnak le zaangfahnak nganpi kha a rak langhter. AD 865 kum i a thih lioah Europe ram thlanglei mi vialte nih an rak ṭah. Sweden ram ah hmasbik phunchimtu a rak sinak le Norway, Denmark ram i Biaknak lei phu a rak serpiaktu a rak si ruangah St. Ansgar cu Sweden, Norway le Denmark ram hna zohkhenhtu Mithiang sinak an pek.