Synod Newsletter Issue-11
Bishop pawl i tonpumhnak sawhsawh a zarhlinak cu a thawk cang. Cardinal Mario Grech nih Bawipa Thilesa puai tuahlio i Thiang Thlarau kong a ruahnolhnak ah “2021 October thla in aa thawkmi khualtlawnnak saupi a theipar a khawmhtu kan Synodal Assembly khualtlawnnak cu a donghnakbik ah kan phan cang” tiah a chim. Biakhiahnak zarh a si i, kan mipi hna kha synodal khualtlawnnak caah thlacam peng dingin kan nawl hna.
Synod i avoi 16 nak Ordinary General Assemble donghnak zarh
Aa telmi hna nih Fr. Timothy Radcliffe i nikhat chung Retreat hruainak an hmuh. Fr. Timothy Radcliffe nih “Pathian i khuakhangnak aa bochanmi hna i zalonnak lawng kan ngeih i, kan zumhnak he bia-alnak ah kan lut ngam lo ahcun, ṭuanvo ngeilo kan si lai i kan ṭhangcho bal lai lo” tiah a theihter hna. Hi thlacamnak boruak ah, a donghnak cauk suaimi cu an pek.
Chaklei America in sianghleirun ngakchia 140 hrawng cu, Oct. 18 ni, Cacawn ningani zanlei ah Paul VI Hall i Synod ah aa telmi cheukhat he biaruahnak ngeih dingin an i pum. Thil sining cu “Biaruahnak ah Synod hruaitu hna he sianghleirun ngakchia pawl” tiah min pek asi i siangngakchia hna nih biahalnak an tuah i Cardinal Mario Grech, Synod Secretary General, Cardinal Jean-Claude Hollerich, Synod Rapporteur, Sister Leticia Salazar ODN, San Bernardino Diocese Chancellor, le Thlang Texas um Brownsville Diocese i Bishop Monsignor Daniel Flores hna nih an leh hna nak aa tel.
Assembly zarh donghnak aa thawk hlan Zarhpini, October 19 ah, Pope Francis nih Synodality kong he pehtlaiin Synod palai cheukhat he tonnak an ngei. Cardinals Mario Grech le Jean-Claude Hollerich, special secretary Riccardo Battocchio le Giacomo Costa hna he a cohlan hna. Ahnuah, Apostolic Palace ah, Francis nih synod ah aa telmi nu le lay (mi sawhsawh) pawl he an i tong. Nu pawl nih Synod ah an tonmi thil le an lungretheihnak kha zalong tein an chim. Pope Francis nih a lungthin a pek i thatein a ngaihpiak hna.
Synodal Assembly dih in Gregorian University ah “Council in Synod tiang, Biaknak lam onnak, kum (60) hnu Lumen Gentium (1964-2024)” tiin min pekmi cu Gregorian University ah tuah a si lai. Synod i General Secretariat le Pontifical Gregorian University i Collegium Maximum nih hmunkhat ah an dirhmi, hi timhtuahnak nih hin biachimtu hna le panelist phunphun hna nih, a tanglei tlangtar hna hi nifatin an tawlrel lai: “Khrihfabu, Nangmah le Nangmah Kongah Zeidah Na Chim?” (ni 28), “A chung in le a leng in Khrihfabu hna cu Bupi pakhat lawng a si” (ni 29) le “Khrihfabu le a dirhmun hna: Synod kong ruahnak” (ni 30).
Ni 28 nak zinglei ah onnak biachimnak cu Synod Secretary General Cardinal Mario Grech le Collegium Maximum President, Father Pino di Luccio nih an chim lai. Synod ah Vatican Council pahnihnak cohlannak le a Bupi tuanbia (ecclesiology) kong ceihmainak le theological debate caah ṭhatein “hmun” si dingin aa tinhmi Conference cu a duhmi vialte caah on a si. October 22 hlan ah www.unigre.it timi website ah min cazin pek a hau. Thawngpang tam deuh: lumengentium60@unigre.it