25 November Tuesday

Thawngṭha: Luke 21:5-11

Donghnak caan hmelchunhnak hna

A Ra laimi Buainak

“Miphun pakhat le pakhat an i do lai i pennak pakhat le pakhat an i do lai, hmunkhat hnu hmunkhat lihnin le mangṭam le rai a tlung lai i khuaruahhar thil le hmelchunhnak hna cu van in an lang lai.” Luke 21:10-11.

Dawtmi nulepa ulenau hna,

Hi Jesuh chimchungbia hi a hung lang hrimhrim lai. Tuahsernak in chim ahcun zeitindah a hung lang lai,? Cucu hmuh ding a si rih.

Ahmaan ko, mi cheukhat nih mah chimchungbia cu kan vawlei ah a tling cang tiah an ti men lai. Cheukhat nih mah le Cathiang chung i a dang chimchungbia hna kha caan pakhatkhat asiloah thil sining pakhatkhat he pehtlaihter an i zuam lai. Asinain mah cu palhnak a si lai. Zeicahtiah chimchungbia a sining taktak cu a thuhmi a si. Chimchungbia vialte cu ahmaan i a tling lai, asinain chimchungbia vialte cu Vancung tiang fiang tein hngalhthiam khawh an si lai lo.

Cucaah kan Bawipa sinin a rami hi profet bia chungin zeidah kan lak? Hi caang nih hin, a ngaingai ti ahcun, a ra laimi thil lianngan deuh le vawleicung pumpi ah a cang dingmi thil sining hna kha a chim duhmi a si ko nain, nihin kan nunnak ah a ummi kanmah pumpak thil sining hna zong kha a chim duhmi a si kho men. Cucaah, cu thil sining hna chungah cun a bia nih kan sinah bia a kan chimter awk a si. Hi cacang nih a kan chimhmi bia pakhat cu, a caan ah, kan vawlei cu a hrampi tiangin a hninh bantukin a langh ahcun kan khuaruah a har awk a si lo. Phundang in kan chim ahcun, kan pawngkam ah buainak, ṭhatlonak, sualnak le huatnak kan hmuh tikah kan khuaruah a har awk a si lo i kan lung zong a dongh awk a si lo. Nunnak ah kan i zuam tikah hi cu kan caah abiapi tukmi thawngthanhnak a si.

Kanmah pakhat cio caah, kan nunnak ah kan tonmi “lihnin, mangṭam le rai” tampi a um kho men. Annih cu a phunphun in an i lak lai i a caan ah harnak tampi a chuahtertu an si lai. Asinain an si a hau lo. Kan ton khawhmi buaibainak kha Jesuh nih a hngalh ti kan i fian i cu caah a kan timhtuah taktak ti kan i fian ahcun harnak a chuah tikah kan hna a ngam deuh lai. Phundang in chim ahcun, “Oh, hi thil hna lak ah pakhat a si, asiloah Jesuh nih a ra lai tiah a timi caan hna lak ah pakhat a si” tiah kan ti khawh ko lai. A ra laimi harnak hna hngalhthiamnak nih hin an caah timhtuahnak a kan pek awk a si i ruahchannak le zumhnak he kan in khawh awk a si.

Nihin ah, Khrih chimchungmi bia nih na nunnak ah a cangmi lam pakhatkhat kha ruatṭhan. Jesuh cu a langmi buainak vialte lakah a um ti kha hngalh law nangmah caah a ruahmi sunparnak donghnak ah an hruai!

Dawtmi ulenau hna,

Bawipa, ka vawlei cu ka pawngkam ah a rawkmi bantuk a si tikah, nangmah lei ah ka mit ka mer khawh nakhnga le na zaangfahnak le velngeihnak ka zumh khawh nakhnga ka bawm ko kan ti lai. Zeitikhmanh ah na ka kaltak lai lo ti le zeizong vialte caah khuakhannak tling na ngei ti ka hngalh khawh nakhnga ka bawm ko. Jesuh, Nangmah cu kan bochan.