Khrih a Bupi ti mi cu Khrih he lunglawm tein a kal ṭi dingmi kan si.

10 November 2025

“Pathian hmunthiang taktak cu Khrih a si. Amah lawng hi kan khamhtu le tlanhtu a si i Pathian le minung kar ah palai a kan ṭuanpiaktu asi. Minung cannak a lak i minung sin ah a umnak thawng in le a dawtnak in a kan thlanh. Kan caah innka kaupi in a kan on piaktu le Pathian sinah a kan hruaitu a si. Kannih cu Khrih i a Bupi kan si i Khrih pum chungah chungtel kan sinak cu vawleicung pumpi ah zaangfahnak, hnemhnak le daihnak Thawngṭha karhter awk ah kawh le auh kan si. Kan biaknak le kan tuahsernak thawngin nunnak tehte khannak ah zeizong vialte nakin kan ceu deuh awk a si.Catholic Bupi cu vawleicung pumpi Khrihfa hna zumhnak khualtlawnnak ah zohkhenhtu nu si awk ah le Rome khua Pope he thin khat lungkhat tein hawikomhnak le lungrualnak  biathuk kong ruah awkah kawh kan a si tiah Mithiang John Lateran Biakinnpi pekchanhnak puai ah Pope nih a chim. Rome Diocese Biakinnpi(St.John Lateran Basilica) le Peter hnuzultu ṭhutdan tuanbia kong, zuksuaimi le biaknak le ro thil sunglawi a langhter bikmi cu “Bawipa nih ṭuanvo a pekmi hna cungah Lamkaltu hna nih zeitluk in zumhnak an kilven i nihin ni tiang cu ṭuanvo cu pehtlai in i chanhchin le kilven asi nak kong a chim.
Pathian biathuk i a lianhngannak cu Biakinnpi chung i suaimi zuk hna le Biakinnpi lenglei i Lamkaltu hna zuklem hna an dawhnak zongah a langter. A laifang ah Lamkaltu hna milem ngan hleihnih a um, cu hna nih cun minung mit hmuh i rumra ngeihnak lawng si lo in  thlarau lei hmuhning le ruahning pinlei tiang theihthiam awk le hngalh awkah a kan bawmh. Catholic Bupi i a biathuk nih, mit hmuh khawhmi hmunhma hna, thing le lung in sakmi inn hna lawng kha si loin in cu nakin a tam deuh le a sang deuhmi thil hna hngalhthiam awkah a kan bawmh. Pathian hmunthiang taktak cu Khrih a si, sihmanhsehlaw, “Jesuh nih Jerusalem Biakinn a thianhnak kong ah Thawngṭha nih a kan theihter bantukin, Pathian hmunthiang taktak cu a thi i a tho ṭhanmi Khrih a si.
Amah lawng hi khamhtu le tlanhtu a si. Khrih nih minung cannak a lak i a dawtnak in a kan thlanhnak thawngin kan nih vialte zong a nungmi lungvar innpi kan si ve. Ka u le nau hna, Pathian Miphun thiang sinak lawmhnak in kal awk ah le thlarau lei kar hlan awk ah kan lungthin kha kan cawnpiak a hau. Khrihfa hna i kan derthawmnak, kan palh kan sualnak hna le tlamtlinlonak hna nih Catholic Bupi i a rumnak biathuk hna hmuh awk ah a kan dawntu le a kan khamtu asi. Sihmanhsehlaw, Catholic Bupi i a thianhlimnak cu kan mah pakhat cio i kan ṭhatnak le kan thianhlimnak cung ah aa hngat lo i, Bawipa i a vel laksawng cung ah aa hngat i, Bawipa vel laksawng cu a hnu ah a kir bal lo.
Cucaah Pathian thimmi Miphun thiang kan sinak lawmhnak in kal hna u sih law Bawi Khrih cohlannak le a thlacamnak in a kan umpi nakhnga Bawiu Mary sin ah bawmhnak hal hna u sih, tiah Angelus thlacamnak ah Pope nih mipi a chimh hna.