ZEICAHDAH BIA CU MINUNG AH A CAN?
ZEICAHDAH BIA CU MINUNG AH A CAN?
Nicea zumhnak bia in kannih nih, “Kanmah minung caah le kan khamhnak caah vacung in a rung ttum: Thiang Thlarau `hawnnak in Ngaknu thiang Mary chungah minung cannak a lak i minung ah a cang” tiah kan ti.
Pathian he remternak in kanmah khamh awkah BIA cu minung ah a cang. Pathian nih kanmah kha a kan dawt i kan sual thianh awk caah a Fapa kha a rak thlah. Vawlei khamhtu ah a rak thlah i amah cu Vawlei sualnak a kalpitu” tiah phuan a si, (Jn 4:10, 4:14, 3:5).
Zawtnak in kan minung sinak nih dam a duh: tluknak in thawh a duh i thihnak in thawh`han a duh. Kannih nih thil`ha kan ngeih mi kha kan thlau. Cucu hmuh`han kan duh. Muihnak chungah khumh kan si; ceunak kha put kan herh. Tlaih mi kan si: tlanhtu kan hngak. Thongtla kan si; bawmhnak kan herh. Sal kan si; luattertu kan herh. Mah hna hi a phu lomi, a siloah `uk`ak men a si maw? Mahtluk temhinnak, le nuamhlonak nih minung sinah Pathian kha a rak `uamter i a rak kan venter lo maw? (St. Gregory of Nissa).
Pathian dawtnak kha kan hngalhnak hnga BIA cu minung ah a cang. Pathian dawtnak cu kanmah lakah aa phuang. Pathian nih a Fapa kha vawlei ah a rak thlah cu nunnak kan hmuhnak hnga caah a si, (I Jn 4:9). Zeicahtiah Pathian nih vawlei kha a dawttuk hringhran caanh a Fapa ngeihchun kha a pek; amah kha a zummi hna cu an rawk lai lo, zungzal nunnak an ngeihnak hnga caah a si, (Jn 3:16).
Thiannak ah kan i zohchunh awk BIA cu minung ah a cang. “Ka seihnam kha i bei u law ka sinah cawng tuah u; Keimah cu Lam le Biatak le nunnak ka si; ahohmanh keimah loin Pa sinah an ra kho lo” (Mt 11:29, Jn 14:6). A muihmel aa thlennak tlang ah Pa nih, “A bia kha ngai u,” tiah nawl a pek. (Mk 9:7, Dt 6:4-5). Jesuh cu thluachuah hmuh awk caah i zohchunh awk le nawlbia thar ah i tahnak a si, “Keimah nih kan dawt hna bantukin pakhat le pakhat i daw u.” (Jn 15:12). Hi dawtnak nih hin amah bantukin mah pum lila pek khawh tiang a simi dawtnak ngeih a kan fial. (Mk 8:34).
Pathian sinak aa hrawmmi si awkah Bia cu minung ah a cang. (2Peter 1:4). Pathian Fapa cu Mi Fapa ah a cang. Cucu minung hi BIA he pumkhat sinak chungah luhin Pathian fa sinak kha cohlan in Pathian fa kan cannnak hnga caah a si. (St. Irenaeus) “Zeicah tiah Pathian Fapa minung a rak can cu Pathian kan cannak hnga caah a si”. (St. Athanasius) “Pathian Fapa ngeihchun nih Pathian sinak kha aa hrawm mi siter a kan duh caah kan minung sinak kha a lak i minung ah sermi Amah nih kannih kha Pathian ah a kan sernak hnga caah a si.” (St. Thomas Aquinas).