November – 10 Monday

Bible relnak 👉Luke 17:1-6 👈

Sualnak leiah Tukforhnak

Theih lomi pakhat nih tukforhnak cu sualnak tuah awkah a kan forhtu a si tiah a ti. Pathian cu tukforh khawh a silo (Jeim 1:13). Asinain kan duhnak (Jeim 1:13-15), tangka (1 Tim. 6:9), mah le mah i zohfel lonak (Gal. 6:1) le nunnak i porhlawtnak (1 Johan 2:16) hna nih an kan tukforh khawh. Tukforhnak chungin luatnak hmuh awkah thlacam dingin fial kan si (Matt. 6:13) zeicahtiah Bawipa nih cu chung cun a kan luatter khawh (2 Pet. 2:9).

Nihin St. Luke thawngṭha nih Jesuh kong a dang tein a chimmi bia pathum a ngei i cu hna cu pakhat le khat aa pehtlai dihmi an si. Pakhatnak bia cu sualnak a kan tuahtertu tukforhnak hrial khawh lonak kong a si. Sualnak a ngeimi minung kan si caah tukforhnak cu hrial khawh a silo. Pathian velngeihnak um ko hmanh sehlaw palhnak tuah kan i thim khawh rih.

‘Tukforhnak’ timi Greek biafang cu scandalon a si i Mirang biafang scandal he aa khat dih. Scandal timi sullam taktak cu mi pakhat a tlu i a tlaktertu rap le tluknak a si. Thil diklo (scandals) hna cu mi nih Khrih le a Thawngṭha zumh le cohlan a hartertu dawnkhantu ah a cangmi bia asiloah tuahsernak hna kha an si. Mi pakhat nih; Judah mi nih midang sualnak cawnpiak cu ngaihthiam khawh lomi sualnak a si tiah an ruah tiah a ti. Midang kha sualnak tuah dingin a cawnpiak ahcun, ruahnak umlo hmuhkhawh lomi sualnak lampi ah amah zong nih midang kha a cawnpiak ve men lai. Cucaah Jesuh nih a zultu hna le kannih kha midang lam ah tlukrilhnak lung chiah lo ding le midang sualnak ah a hruai khomi zohchunhawk ṭhalo pek lo ding rian kong kha ralrin a kan pek.

A pahnihnak bia cu ngaihthiamnak le remnak kong a si. Sualnak cu abiapi le a nganmi thil a si ti cu ahmaan ko. Sualnak nih a chuahpimi chiatnak cu a tam, cu hna cu: Pathian lung a fahter, kan chiaṭha thleidannak le kan thlarau a hrawh, kan lungthin a hakter, ziaza ṭhalo a ser, velngeihnak le duhnak ṭhawnnak (willpower) a tlau, hlatnak a ser, thlacamnak ah harnak le a dangdang hna an si. Asinain midang sualnak ah hruai cu a fak deuh i a hrawk deuh, zeicahtiah Khrihfa kan si bantukin midang sinah Khrih nunnak cawnpiak awkah kawh kan si. Kan caah hnemhnak cu unau pakhatkhat nih sualnak a tuah ti a fiang ahcun remh a si awk a si. Cun, fiang tein aa ngaichih ahcun ngaihthiam a si lai. Amah nu/pa nih sualnak pakhat kha voi zeizat le voi zeizat hmanh a tuah ko zongah, ngaihchiatnak taktak a langhter ko ahcun ngaihthiam a si lai.

A pathumnak bia cu zumhnak kong a si, cucu Pathian i bochannak thukpi a si. Lamkaltu hna nih Jesuh kha an zumhnak ṭhanchoter dingin an hal. Jesuh nih a lehmi hna kha i cinken u sih! “A si, nan zumhnak kha ka nganter lai” a ti lo. Cu nakin hitin a ti: “Anṭam ci tluk in zumhnak nan ngeih ahcun hi thingtheihmung kung hi, ‘A hram in i ṭhial law rili ah va cin,’ tiah nan ti lai i nan bia an ngaih hna lai.” Jesuh nih a chimmi cu na a tlawmmi na zumhnak kha hmang ko tiah a ti. A dang vialte cu amah nih a pek hna lai. Zumhnak mit in sualnak a ṭhatlonak kha kan hngalh khawh lai i Pathian a duh lomi thil hrial awk le a lung a lawmhtermi thil tuah awkah thazaang kan hmuh lai, dawtmi ulena hna.

Billy Graham nih a chimmi hi bia hi ruat hna u sih: “Sualnak cu tukforhnak kha i pekchanhnak caah kan hman tikah a si.”