November 5 Wednesday
Audio 👇🎧
Luke 14:25-33
Zultu sinak kong chimmi
Nathan C. Schaeffer i a, At Life’s Close- Nunnak a donghnak ah, nih biahalnak cu: “Zeizat dah na hmuh cang?” ti a si lai lo tiah a ti. sihmanhsehlaw “Zeizat dah na pek?” ti a si lai.
“Zeizat dah na tei cang?” ti si loin, “Zeitluk in dah na tuah cang?” ti a si lai.
“Zeizat dah na chiah” ti si loin, “Zeitluk in dah na hlawt cang?” ti a si lai.
“Zeitluk in dah upatnak na hmuh” ti si loin “Zeitluk in dah na dawt i rian na ṭuan” ti a si lai.
Dawtmi ulenau hna, Nihin i thawngṭha ah, mibu nganpi nih Jesuh an zulh tikah, zultu sinak nih a herhmi thil hna cu a tlin lo ti kha a hngalh. Bianabia pahnih a chim i kan vailamtahnak kha i put in amah hnu zulh dingin a kan sawmnak kan theih. Hika ah Mithiang Luka nih Jesuh a intuarnak le a thihnak ah a naih tukmi, kan ti men lai, a taktak in zulhnak a ruahchan. Hi tahchunhnak hna ahhin, mi pakhat nih a fianter, zultu sinak caah a herhmi thil ngan pathum kan cawn. Amah hnu zulh awkah:
Pakhatnak ah, kan biapi bikmi thil kha kan dirh a hau. Hi thawngṭha caang thawngin mibu nganpi nih Jesuh he khual an tlawng nain tinhmi le biapi ah chiahmi tampi an ngei ti kha kan hngalh. Tahchunhnak ah: Jesuh kha an zulh, zeicahtiah lungthawhnak caah mipi rawl a pek hna i rawl pek an hngah hna ti an hmuh caah a si; damnak a pek khawhnak kong an theih i Amah naih khawhnak caanṭha an hngah i damnak hmuh an hngak. Ngaihchia ngai a simi cu, Amah le a cawnpiaknak ah aa pe taktakmi cu tlawmte lawng an si. Cucaah kan biapi bikmi thil kha kan dirh a hau i a biapi tiah kan ruahmi thil kha lam ah a kan kham awk a si lo.
Brett Blair nih a chimmi cu mi pakhat nih a tlangpi in kum 70 nunnak caan hman ning a tuak. Hi khuaruahhar nambar hna hi ngai hmanh: Ih (kum 23 asiloah 32.9%); Rian (kum 16 asiloah 22.8%); TV (kum 8 asiloah 11.4%); Rawl ei (kum 6 asiloah 8.6%); Khualtlawnnak (kum 6 asiloah 8.6%); Caan hmannak (kum 4.5 asiloah 6.5%); Zawtnak (kum 4 asiloah 5.7%); Thilthuam (kum 2 asiloah 2.8%); Biaknak (kum khat ah ni 256 asiloah .07%).
Pahnihnak ah, a man kan rel a hau. Donald William Dotterer nih a chimmi cu kan nunnak tling tein le nuam tein nun khawhnak dingah, nunnak hmun kipah a man kan rel khawh a hau. Ṭhitumnak cu pumpak man sangpi a halmi phu pakhat a si. Zeicatiah nuva hna nih “thihnak nih a kan ṭhen hlan tiang a ṭhatnak, a chiahnak, a rumnak le a sifahnak caah” pakhat le pakhat umṭi dingin hnatlaknak an tuah caah a si. Cun fa ngeih zongah, nulepa nih lungsau tein an fale cungah lunglawmhnak an ngeih awk a si. Zeicatiah cu bantuk a tuah lomi nulepa he amah lawngte a ummi le zohkhenh lomi le harnak a tongmi ngakchia an tamtuk caah a si.
Pathumnak ah, a man kan pek a hau. Jesuh nih a zultu hna cu “nan vailamtahnak kha nan i put lai i nan ka zulh lai” tiah a ti hna. Lamkaltu hleihnih hna cungah zeidah a cang? A man an pek: Andru cu vailamtahnak cungah a thi; Simon cu vailam ah an khenh chih; Bartholomew cu a nung in a vun an tan; Jeim (Zebedi fapa) cu a lu an tan; A dang Jeim (Alphaeus fapa) cu an tuk i a thi; Thomas cu fei in an chunh; Matthias cu lung in an cheh i a lu an tan; Matthai cu vainam in thah; Peter cu a ling talet in vailam ah an khenhchih; Thaddeus cu thal in an kah i a thi; Philip cu an thlai. John lawng nih a nung in a phan nain Mediterranean Rili laifang i tikulh hmete ah an thlah. A sullam cu Khrihfa biaknak hi Zarhpi zing biaknak a silo tinak a si. A herh ahcun thih tiangin Pathian hnu zulh a si. Kan hrampi a hninh, kan biapi bikmi thil a hrawh, hawikom le chungkhar he a kan dohter i hi vawlei ah khual ah a kan ser i mi nih “kan lungthin chungin a chuakmi” tiah an kan auh!
A donghnak ah Martin Luther bia hi ruat hna u sih. Hitin a ti: “Zeihmanh a pe lomi, zeihmanh a dih lomi le harnak a tong lomi biaknak cu zeihmanh man a ngei lo.” Mah hi kan ruahawk taktak thil pakhat a si.