November 3 _ Reflection

Thawngṭha : Luke 14:12-14

Sifak Sawm hna

Dawtmi ulenau hna, Biakinn mawtaw chiahnak hmun ah harnak a tongmi Protestant pastor pakhat a um. “Hi hmun hi i nganh a si” tiah fiang tein aa ṭialmi catar a um ko nain midang nih an duh caan paoh ah a hmun ah an mawtaw an chiah,

Hmelchunhnak cu a fiang deuh a herh tiah a ruah caah, hmelchunhnak dang a tuahter hna i, “Pastor lawng caah chiahmi” tiah a ṭial. Sihmanhsehlaw mi nih zeiah an rello i an duh tik paoh ah a hmun ah an mawtaw an chiah. “Hmelchunhnak cu a ṭhawng deuh awk a si men lai,” tiah a ruah. Cucaah a ṭihnung deuhmi pakhat a ser, cu nih cun, “Hika ah hin mawtaw na chiah lai lo,” tiah a thanh. Cu hmelchunhnak zong nih zeihmanh thleidannak a chuahpi hleilo. A donghnak ah, a ṭhami biafang kha a hmuh. Cu catlap cu, “Hika ah mawtaw a chiahmi nih Zarhpi ni zing ah phungchim seh!” ti a si.

Cu hmelchunhnak an langhter hnuah, hi pastor caah chiahmi hmun cu ahohmanh nih an lak lo, Zarhpi ni zing ah phungchim an ṭih caah a si kho men. Asiloah, hmuhtonnak le cawnnak an ngeih lo caah cutin tuah cu an lung a tling lo men lai.

Sihmanhsehlaw na rianṭuannak cu zeidah a si? Nihin caah thimmi Thawngṭha relnak nih kan dihlak in kan i tel khawhmi le kan tuah khawhmi rianṭuannak pakhat hmuhnak a kan chiahpiak. Khual dawtnak rianṭuannak tiah ka auh lai.

Jesuh nih kanmah kha vanchiatnak a tongmi hna: sifak, mizeng, kebei, mitcaw le hi vawleicung i midang hna kha zeihmanh hmuh ṭhannak ruahchannak um loin pekchanhnak thawngin cohlan awkah a kan sawm. Zeicatiah man loin pek lawnglawng ah minung pakhat kha a ṭhangcho ter . Zeicatiah pekchanhnak nih mah le mah i hlawtnak tlawmpal a herh caah a si. A sifahter lo, a petu thlarau kha a rumter deuh. Pekchanhnak cu zaangfahnak le zawnruahnak in a khatmi lungthin chungin a chuakmi a si. Pathian nih a kan dawt hmasa i, kan dawtnak cu kan cung i a velngeihnak le a velngeihnak lianngan cungah lunglawmhnak bia lehnak a si. Kan cung i a zaangfahnak ah Pathian cu kan lonh kho lo. Hihi pekchanhnak taktak a si i pekchanhnak cu khual dawtnak a si. Siannak le khual dawtnak cu aa pehtlaimi an si caah a si. Pakhat le pakhat aa ṭhen kho lo.

Khual dawtnak cu mi vialte le nunphung vialte nih an herh nain cheukhat cu an thiam deuh. Kannih, Chinmi pawl caah cun, hi phunglam in theih kan si i hi phunglam hi a nung lai i a kal peng lai tiah ruahchannak ka ngei. Cun Khrihfa miphun pakhat cio nih khual dawtnak le zaangfahnak ngeih hi biaknak lei in a kan halmi zong a si. Pathian nih kan cungah zaangfahnak le khual dawtnak a ngeih caah, kan i hrawmmi nunnak ah midang zong kan sawm hna. Cun khual dawtnak petu kan si caah midang herhmi kha kan hngalhthiam zungzal awk a si.

Khual dawtnak kan ngeih tikah zawnruahnak kan ngei. Zaangfahnak kan ngeih lo tikah midang nih an intuarnak hmun ah kan hmu hna lo. Nemnak le zaangfahnak a ngeimi kan si awk a si. Hi lio caan ah fahnak a kan petu hna cungah zawnruahnak ngei hna usih. Pakhat le pakhat kan i ngaihthiam lo ahcun, midang sawm khawhnak le kan i tlak lomi hawikomhnak taktak langhter khawhnak hrampi zawnruahnak kan ngei lo, zeicahtiah Pathian nih misual kan si lio tein a kan dawt.

Pumpak ṭhatnak le laksawng ruah loin Jesuh nih a pek bantukin man loin kan pek ve maw?