Mithiang Margaret Of Scotland le Mithiang Gertrude
Thursday, November 16, 2023
Scotland zohkhenhtu mithiang Margaret cu 1046 kum Hungary ramah a chuak. Norman ralkap hna nih an rakfuh ahkhan Margaret cu Scotland ah a zam. Kum 24 a siah Siangpahrang Malcom III he leh an i thah i fanu/pa pa 8 an ngei. Zohchunhtlak nu pakhat a sinak le a tlingmi Siangpahrang nu a sinak a rak langhter khawh. Dawtnak le mithmai ṭhatnak in a va Siangpahrang thinhunnak kha a daihter ton bantukin amah kha dinfelnak le dawtnak rianṭuan awk a forhfial khawh.
Siangbawi hna thlarau lei tharṭhannak kha a ṭhanghter bantukin zarhni, puai sunglawi ni hna ulhawk hna kha ṭuanvo ah a rak tuahkhawh. Biakinn tampi kha a rak sak. Biaknaklei i a herhmi hna kha bomh dingin lungthin thiang Nubu kha a rak tuah. Halvaakmi hna cu Margaret sinin an lawngin an kir ti a um bal lo.A thei zong kan thei bal lo. Margaret cu 1093 kum ah a thi i amah pumpak nih a rak sakmi Dumfermline Biakinn (Church of Dumfermline) ah an vui.
St.Gertrude: Thlanglei le Chaklei America karlak i a ummi nitlak India tikulhbu hna zohkhenhtu St. Gertrude cu 1256 kum, Germany ram Eilsleben ah a chuak. A hmettein Cistercian convent, Sister Sianginn ah a rak um i cauk le Philosophy lei ah khan a rak cawndeuh. Kum 26 asiah pakhat a min a thantermi biathlam (langhnak) a rak hmuh. A it i a hngilhlaite ah khan a sinah Jesuh a raklangh i “Ka sinah rak kir ṭhan, Keimah i nuamhnak cu na caah mitsur zu bantuk duhnung a site lai” tiah a rak chimh.
Cu hnuah biaknaklei he aa pehtlai lomi cawnnak le relnak hna kha a hlawt i Bible le Bupi i Pa le hna sinah a rak i mer ṭhan. Mithiang St. Gertrude cu St. Mechtildis i lam hmuhsaknak tangah thlacamnak le daitein thlacam nunnak tlamtlin nak kha a kawl. Voikhatnak langhnak a hmuhter hnu zongah Bawipa thisa a cohlan caanah Bawipa Jesuh cu mah nu sinah a rak lengṭhan tawn.
Nawlpekmi vialte le khuaruahhar hmuhtonnak vialte kha Gertrude Biathlam (The Revelation of Gertrude) tiah mi nih an theihmi “Pathian zaangfah dawtnak lamkaltu” timi ( Herald of God’s Loving Kindness) cauk ah a dihlakin a rak ṭial. Bawipa Jesuh he Thlarau lehthahnak kong le lungthin thiang upatpek a herhnak zong kha a rak ṭial.Voitam piin alu kha Bawipa Jesuh ṭang cungah a ihter i Bawipa Jesuh thinlung tor thawng a theihnak kong tette a rak khaan colh. St. Gertrude cu 1301 kum, amah kum 45 a ti ah a rak thi.