Cathiang chungah a umlo hmanhah
Cathiang chungah a umlo hmanhah
31. Bupi cawnpiaknak cu Thiang Thlarau cawnpiaknak a si caah, Ca Thiang chung ah kan hmu kho lai lo. Ca Thiang chungah kan hmuh khawh lo hmanh ah, kan zulh ṭhiam a herh.
Zohchih dingah:-
(a) Pa, Fapa, Thiang Thlarau, thumkomh Patian pakhat timi cu Bupi cawnpiaknak a si.
(b) Zumnak hleihnih (CREDO) zong cu Bupi cawnpiaknak asi.
(c) Jesuh min in kan hal, nawl, tbk, “Amen” nan ti lai timi zong hi Pope Clement cawnpiaknak a si.Thawhṭhan puai a ni zong kum fatin i thleng seh ti zong Pope Pius cawnpiaknak a si.
(d) Genesis in Biathlam tiang Bible siseh timi zong Pope Damasus cawnpiaknak a si.
(e) December 25 ni ah Christmas puai nan tuah lai timi zong Pope Julius cawnpiaknak a si.
(f) Jesuh kum relnak AD/BC zong Bupi cawnpiaknak a si
(g) Bible i dal le caang zong hi Bupi cawnpiaknak a si.
Pathian biakning aa thleng
32. Jesuh nih Tlangbawi ngan a sinak cu Peter sinah a pek caah Thiang Thlarau chan ah Pathian biak ning a thleng. Jesuh nih, “nan sin ka ratṭhan hlan tiang a thi lo ding mi nan um” (cf; Mt. 16:28) a timi cu, Peter a si i Thlangbawi ngan sinak le Thlarau huham pali (Tuukhal, Lungpi, Tawhfung, Tlangbawi) a pekmi kha a thi kho lai lo a tinak a si. Tlangbawi sinak cu an rak i chang lengmang i AD-2013 kum ah Pope (266) an tling cang. Jesuh nih zungzal cain raithawinak voikhat a tuahning cu hmanungbik zanriah an ei lio ah changreu le mitsur hang kha amah pum le thi ah can ter dingin thla a cam i “keimah ruahnawlhnak ah rak tuah u’ tiah a Lamkaltu hna sinah Tlangbawi sinak (Ordination) a pektak hna (cf; Heb. 7:27; Mk. 14:22-24; Lk. 22:19). Tlangbawi nih raithawinak cu a caancaan lawng ah tuahding a silo, nifatin tein thawinak (Mass) cu tuah ding a si (cf; Ezk. 46:13). A tuah ding caan cu zinglei ah (cf; Ezk. 46:15) a silole zanlei ah (cf; Salm 141:2) a silole zaan ah (cf; Lk. 24:28-31) tuah ding a si. Raithawinak cu Pathian nih nifatin tuah dingin nawl a peknak cu zumtu hna nih Jesuh le Bupi he pumkhat sinak caah changreu ei in thluachuah an hmuhnak hnga caah a si (cf; 1Kor. 10:16-17). Zeicaah kan ti ahcun Tlangbawi nih raithawinak a tuah fatin, zungzal Tlangbawi simi Jesuh zong nih kan herhmi tlinter awk ah van ah raithawinak a rak tuah ve (cf; Heb. 7:26).
Mt. 16:28 “Mi Fapa hi Siangpahrang bantukin a rat nan hmuh hlan tiang nanmah lakah a thi lo ding mi nan um..”
Thiang Thlarau chan Bu ṭhenṭhek pawl cawnpiaknak
33. Thiang Thlarau chanah bu ṭhennak a tuahtu cu Khrih Thlarau ngei lo an si caah, Khrih ta an si lo (cf; Judas 1:19, Rom 8:9) timi hi Lamkaltu hna cawnpiaknak a si nain, Pathian ta a silo mi nih cun an zulh duh lo ruangah (cf; 1Jn. 4:6) an taksa duhnak ruang i an tuhmi thihnak kha an zun lai (cf; Gal. 6:8).
Judas 1:19 “Ka dawtmi hna, Bawi Jesuh chan i an in cawnpiak mi hna kha ii cinken zungzal u; hi hna pawl cu bu ṭhennak a chuahtertu an si i taksa duhnak nih a ukmi an si i Thlarau ngei lo an si.”
Rom 8:9 “Khrih Thlarau a ngei lomi hna cu Khrih ta an si lo.”
1Jn. 4:6 “Pathian ta a silo mi nih cun ka bia an ngai lo.”
Gal. 6:8 “A taksa duhnak lawng a tuahmi nih cun , a tuh bangin a theipar a zun te lai.”
Pathian cin lomi
34. Pa chanah Pathian thlahmi Moses a dotu le a zamtaktu Korah le a zultu pawl, Fapa chanah Pathian Fapa a zamtak mi Judas Iskariot; Thiang Thlarau chanah Jesuh thlahmi Lamkaltu hleihnih a pomlo mi le a zamtak mi Martin Luther le a zultu; bu ṭhenṭhek pawl hna cu Pathian nih a huattuk hna caah an tuar lai ding mi ṭihnung ngai mi hremnak pawl fianternak “Pathian dawtning phunthum” (Ca caang -95) ruangah a thin a hungmi an um ahcun an lungfak hlah seh, Pathian nih a cin lomi kung hna cu bawh dih an si ko lai (cf; Mt. 15:12-14). Zeicah ti ahcun midang lunglomh ter cu kan tumtah mi a silo, Pathian nih chimter a kan duhmi kan chim ruangah thatho ngaiin i nuam deuh u (1The. 2:4).
Mt. 15:12-14 “Cun a hnu zultu pawl kha a sinah an ra i ‘Na bia chimmi ruangah Farasi mi hna an thin a hung ti na thei lo maw?’ tiah an ti. Jesuh nih ‘Vancung i Ka Pa nih a cin lomi kung paoh cu bawh dih an si ko lai, anmah ruangah lungnuam loin um hlah u’ tiah a ti.”
1Thes. 2:4 “Pathian nih chimter a kan duhmi kha kan chim,… midang mithmai hmuh awk cu kan i tinhmi mi a si lo, … Pathian lunglawmh ter long hi kan i tinhmi cu a si.”
Heb. 7:27 “Anih cu raithawinak voikhat lawng a pek. Zungzal cain amah nunnak a pek mi kha a si.”
Mk. 14:22-24 “Zanriah an ei lio ah Jesuh nih chang kha a lak i, thla a cam hnuah, ‘hihi Ka sa a si’ tiah a ti. Hrai kha a lak i thla a cam hnuah ‘ka thi a si’ tiah a ti.
Lk. 22:19 “Keimah ruahnawlhnak ah tuah u.”
1Cor. 10:16-17 “Bawipa zanriah hmannak i kan hmanmi … chang hlum pakhatte ruangah kannih kan zapi mitampi kan si nain pumkhat kan si.”
Heb. 7:26 “Jesuh cu kan herhnak a tlinter khotu Tlangbawi a si.”