Nunnak in Pathian Bia Nunpi

Bible relding mi hna: Ezekiel 18:25-28; Psalm 24(25):4-9; Philippians 2:1-11; Matthew 21:28-32

Nihin kan Bible thiang relmi hna nih Pathian he kan i pehtlaihnak i dah cio ṭhan dingin a kan sawm. Thil biapi a simi hna cu kan theih cio ko hna. Sihmahsehlaw, kan tuah taktak mi hna le ka zulh taktak mi hna hi aa dang tawn timi kha hmuh khawh a si. Pathian nih kan chimmi lawng kha a zoh lo. Zeitin dah kan nun timi zong a zoh timi kha kan theih ding a si.

Voi(1) Bible relnak ah Parofet Ezekiel nih a mi hna sinah “Pathian cu a ding mi Pathian a si” tiah ralrin a pek hna. Mi pakhatkhat nih a sual nak kal tak in Pathian sin a kir ṭhan tikah Bawipa Pathian nih a cohlaan i, nunnak a pek lai a ti.

Hihi pakhat cio kan nunnak ah thawngṭha taktak a si. Pathian nih hlaan kan rak hruhnak le kan rak sualnak lawng zoh in kan caah bia khiahnak a tuah lo. Palhnak kan rak tuah ko men lai. Tuah hnga dingmi thil tuah lo zongin kan um ko men lai. Midang hna cung zongah fahnak kan pek ko men hna lai. Pathian cawnpiaknak theih lo zongin kan rak um ko men hna lai. Sihmahsehlaw, biatak ngaihchihnak lungthin he Pathian sin kan kir ṭhan a si ahcun Pathian nih a kan cohlaan ṭhan ko.

Nun zia then timi cu hmailei kan nunnak ah palhnak lam hrial in nun kha a si. “Kaa ngaihchih” timi bia menmen lawngin chim kha a si lo. Kan nunnak hrimhrim in kan i ngaihchihnak kha kan langhter a herh.

Thawngṭhabia chungah mipa pakhat nih mitsur dum ah rianṭuan dingin a fapa pahnih hna a thlah hna nak kong kan hmuh.

Upa deuh pa nih “Ka kal lai lo” tiah a pa sinah a ti ko nain a hnu ah a lung aa thleng ṭhan i mitsur dum ah cun a kal. Fapa hniang deuh pa nih “Elaw, ka kal lai” tiah a pa sinah a ti ko nain, a pa sin biakamnak a tuah mi zul loin amah duhnak tu kha a tuah, a zulh, kal loin a um. 

Jesuh nih biahalnak a tuahmi cu “Aho nih dah a pa duhnak kha a zulh?” tiah a zultu hna kha a ti hna. 

An leh cio mi cu: mitsur dum ah a kal mi pa nih kha a pa duhnak a zultu cu a si an ti.

Hi thawngṭhabia nih a biapi ngai mi le kan hmuh cio, kan ton cio mi fimnak a kan chimh. A caan ah kan ka in cu “A si, Pathian duhnak ka zulh lai” tiah kan ti ko nain kan nunnak tu in cun “Ka huam lo” tiin kan mah duhnak tu kha kan zulh tawn. 

Biana ah: Pathian cu kan dawt kan ti ko lio ah khan midang hna cungah sualnak ngaihthiamnak kan ngei kho lo. Sifak santlai lo kan zohkhenh hna kan ti ko lio ah khan kan pawngkam ah bawmhnak a herh taktak mi hna kha i theih ter loin kan um tawn. Thlacam kan duh kan ti ko lio ah khan, thlacam dingin caan kan pe tawn lio. Bupi rian ka ṭuan cang lai kan ti ko lio ah khan ṭuanvo lak duhnak lungthin kan ngei tawn lo. Kan i phet tawn. Kan sualnak cungah kan i ngaihchih kan ti ko lio ah khan tuah kelmi sualnak kha thlah kho loin a tu le a tu palhnak chungah kan tla tawn.

Kan ka, kan bia in cun Pathian kan duh ngai tawn ko nain Pathian duhnak zulh le tuah ding caah kan khul a nuar lengmang tawn. Kan bia le kan tuah sernak aa dang lengmang tawn.

Nihin kan theih mi fapa pakhat sin in kan caah ruahchannak a um ko timi zong hmuh thiam a hau. Ka duh lo, ka kal lai lo, ka pa nawl ka zul lai lo tiah a ti ko nain a hnu ah a lung aa thleng i a tuah, a ṭuan, a zulh bang in kan nunnak zongah palhnak tampi a rak um ko men lai. Sihmahsehlaw, kan rak palhnak nih kan hmai lei caan a kan khiah piak lo. Ngaihchihnak caah caan sunglawi kan ngei rih. Palhnak pakhat ruangah a dih-dongh tiang kan palh thai lai tinak a si lo. I thlen ṭhannak caan ruahchannak a um rih ko timi zong kha kan theih a herh. 

Tangdornak lungthin cu Khrih nih a ngeih mi le a zulh mi lungthin a si. Paul nih hitin a ti. “Khrih cu Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. Mi toidah aa dor i nawlngaihnak lam kha thih tiangin a zulh, vailam cung thihnak tiang in” a ti. 

Hihi Khrihfa hna nih kan ngeih hnga ding mi, kan i nunpi dingmi a cawnpiaknak “MURU” a si. Tangdornak lungthin le nawl ngeihnak lungthin kha kan ngeih ding a herh mi a si.

Jesuh nih dawtnak kong a chim lawng si loin a nunnak hrimhrim in a langhter. Khrihfa nun zia cu bia dawhdawh chimnak men lawng si loin Khrih bantukin kan nun ve ding kha a si. Khrih nun lam cu Pathian duhnak cungah khan “A Si” tiah timi nun lam kha a si. Cucu Khrihfa hna nun lam zong a si ve.

Thazaang petu /- Fr. Fidelis Maung Sein