26 September 2025
Audio 🎧 ngaih awk ah👇
📕📕Haggai 2: 1-9; Lk. 9:18-22
Peter i sual phuannak
Nihin thawngṭha nih, “Jesuh cu amah lawngin thla a cam i a Zultu hna cu amah asinah an ra,” (v. 18) tiah a kan chimh. Thawngṭha ah, zinglei sangah a tho asiloah thlacamnak ah zaan khuadei a hman ti kha kan hmuh tawn. Hihi zoh hna u sih: 1) Khrih nih rian tampi a ngeih ko nain, a Pa le a Zultu hna he adang tein um caan tlawmpal lawng a hmuh. 2) Khrih cu amah lawng a umlio ah thla a cam. Kan duhpatnak caah kanmah lawng kan um hi a ṭha, zeicah tiah kanmah lawng kan si tikah Pa Pathian nih a kan umpi caah a si. 3) Khrih lawng thla a cam caan a um, A thlacamnak ah Amah he i fonh awkah a Zultu hna cu amah he an um; cucu chungkhar-thlacamnak a si. Nulepa nih an fale he thla an cam awk a si, bawi nih an sal he, saya le sayamah hna nih an siangngakchia hna le an cawnpiak mi hna he thla an cam awk a si. 4) Khrih nih anmah kha a chek hna hlanah anmah he thla a cam, ‘Mi nih ahodah ka si an ka ti’ timi le ‘nannih nih ahodah ka si tiah nan ka ti’ timi an hmuh khawhnak hnga an caah thla a camnak thawngin a biahalnak kha leh awkah lamhruainak le thazaang peknak a si.
Asinain hi thawngṭha bia nih hin Khrih he hmunkhat ah thla an rak cam ti kha a kan chim lo. Thla a cammi lawng kha a kan chim. Thla an cam ṭi tiah ruat hna u sih. Asinain aho nih dah thlacamnak tamdeuh a herh? Khrih asiloah Pathian kong tlawmte lawng a hngalmi kannih maw? Kannih nih kan Thlacam pekchanhnak hna kha kan tlawmter asiloah thlacamnak kan herh lo tiah ruah awkah kan i ruamkai maw. A minung sinak ah Jesuh nih thlacamnak a herh tiah a ruah ahcun, zeitluk in dah fakpi le ṭha tein le ziaza ṭha tein thlacamnak nun kan herh deuh?
Cu he pehtlaiin, Carlo Carretto, minthang hermit (zateih) le thlarau lei caṭialtu nih, a farnu sinah a cakuat (Dolcidia sin cakuat 1954-1983) ah tehte a khan, Bawipa he ni 365- 2007 kum i a lakmi bantukin. Amah nih hitin a ti: “Khrihfabu caah rian tampi ka ṭuancang ti kha na hmuh, hihi keimah lawng nih ka ruahmi le ka zawnruahnak lawng a si. Aa pe bikmi missionary tluk in meng tampi ka tlik cang i ka kal cang. A chel ah Khrihfabu nih a ngeih lomi cu rianṭuannak, cawlcanghnak, thlarau luhternak caah project saknak a si lo ti kha ka lung ah a hung chuak. A tlaumi asiloah a tlawmbik mi cu thlacamnak, thinlung pek he thlacamnak, mah le mah i pekchanhnak, Pathian he naihniam tein umnak, Thiang Thlarau cungah zumhawktlak sinak le Khrihfabu a sertu taktak a si timi zumhnak hna kha an si: biafang pakhat in chim ahcun kokek lonh khuaruahhar thil tinak a si. Keimah le keimah fiang tein ka chim lai: Khrihfabu ah tuahsernak a ngeimi hna a herh nain an tuahsernak nih thlacamnak ah a nem deuhmi asinain abiapi deuhmi thil kha a hnorsuan lonak hnga kan i ralrin a hau.
Thlacamnak cu kan theih cio bantukin Pathian he biaruahnak a si. Cucaah thlacam lo awk a ruang zeihmanh kan ngei lo. Zeicatiah thla kan cam lo ahcun Thumkomh Minung Pathum (Thumkomh Pathian) he thlacamnak i rumnak kha kan sungh caah a si.
Dawtmi unau hna, Cucaah a donghnak ah Catholic Khrihfabu Catechism (no. 2601) nih a chimmi zong kha ruat hna u sih. Catechism nih, “Thlacamnak ah Bawipa hmuh a si tikah Khrih zultu zong nih thlacam a duh ve. Thlacamnak i bawi a simi Fapa kha ruahnak le theihnak thawngin fale nih Pa sinah thlacam an cawn,” tiah a ti.