Akita khualipi le Nu Mary langhnak aruang (3)
Tlawmpal a daih hnu ah:
“Na lungchung i na ruahmi kha ahmaan maw? Hlawtmi lung si dingin biatak tein bia naa khiah cang maw? Ka fanu/novice, Bawipa caah zeihmanh ngeilo dingin pum aa pe duhmi, aa tlakmi Bawipa salnu si dingin theih bu tein biakamnak na tuahnak ahhin thir pa 3 in vailamtah cungah khenh chih na si lai. Thir pa 3 hna cu: sifahnak, thianhlemnak le, nawl ngaihnak a si lai. Mah pa 3 chungah hin nawl ngaihnak hi a hrampi a si lai. Na bawile nawl ngai tein um law na Bawile nih theihthiamnak in an in hruai lai,” a ti.
A voithumnak a Langhnak kong le Nu Mary Biacahmi (October 13, 1973)
“Keimah cu a ngeih a chiami Nu ka si. Pa pawl nih an lung an i thlen lo i miṭha deuh an silo ahcun Pathian nih ṭih a nung tukmi dantatnak in minung a simi paohpaoh cungah a tlunter lai. Mah dantatnak hi vawleicung dantatnak vialte lakah a nganbik mi a si lai i Noah buanchukcho le Sodom le Gomorrah dantatnak hna nakin a ngandeuh mi, ahohmanh nih an hmuh bal lomi dantatnak a si lai. Vancung in kah mei-alh a rak tla lai i mi vialte an thi dih lai. Miṭha he miṭhalo he an thi dih lai. Tlangbawi le zumtu ṭha hna zong an thi dih lai. A nungmi hna nih a thimi si an duh deuh lai, zeicahtiah a nungmi hna caah vawleicung hi nun tlakmi vawlei ah an ruat ti lai lo. Rosary le ka Fapa nih a chiahtak mi hmelchunhnak lawnglawng a tang lai.
Nifate dong loin Rosary cam peng ko. Rosary na cam tikah Pope, Bishop hna le Tlangbawi hna caah tiah cam peng ko. Bupi chungah Satan tukforhnak a lut lai i Cardinal nih Cardinal a do lai, Bishop nih Bishop a do lai, Upatnak nganpi he a ka cawisangtu Tlangbawi cu a hawi Tlangbawile nih an nehsawh lai. Biakinn hna le biakṭheng hna cu hrawh an si lai. Bupi chungah ahmaan lomi ruahnak le hnial kalhnak a cohlangmi tampi an um lai. Khuachia nih Tlangbawi le Pathian rianṭuantu tampi hna cu vawleicung pumsa duhnak leiah a hruai hna lai i a chuahter ṭhan hna lai. Pathian caah pumpek in rian a ṭuanmi thlarau hna cungah tukforhtu khuachia hna cu khamh khawh an si hrimhrim lo. Thlarau tamtuk sungh a si cangmi cungah hin, ka ngeih a chiatuk hringhran. Mah tining tein sualnak le thlarau thihnak a karh peng ahcun ngaihthiamnak a um ti lai lo. Ralṭha ngaiin na bawile sinah va chim. Anmah nih thazaang an in pek khawh lai i zeitik ah thla kan cam lai i, mi vialte an lung an i thlen khawh lai ti cu an in chimh lai. Bishop Ito hi na Bupi a hruaitu pa a si.
Nihin hi, ni donghnak ni nangmah sin i bia ka chim ni a si. Atu thawkin nangmah an hruaitu (Mother/superior) nawl ṭha tein na rak ngai lai. Rosary a tam khawh chungin cam i zuam. Keimah lawnglawng nih rawhralnak a ra laimi chung zongah kan khamh khawh hna i ka daihter khawh. Keimah a ka bochan mi paohpaoh cu ka khamh dih hna lai,” a ti. Mah Nu Mary a miṭhli a luanmi cu (Akita Mayor) Akita khuapi uktupa nih a mit hrimhrim in a va hmuh ve. Mah lawng siloin Diocesan Bishop a simi Bishop John Shojiro Ito zong nih a cozah uktu bawi hna sinah heh tiah a chim ve. Cun a Cozah zong nih an theih dih tikah cun, Japan a cozahpi zong cu a lung a thlengṭhan ti a si. April 22, 1984 Akita Nu Mary langhnak hi ahmaan mi a si tiah “The Holy See” nih a thanh. 1988 June thla ah Ratzinger (Pope Benedict XVI) Cardinal a si lioah Akita cung i a cangmi thil hi Bupi zumhnak in kan zoh tikah zumh awktlak ahmaanmi a si tiah a thanh ṭhan.
Nu Mary nih Akita sin i a langhnak kong hi English to Chin in ka lehmi cungah hin tlamtlin lonak tampi a um lai. Lai Dictionary le Kawl Dictionary hman loin Laiholh he a remnak in ka lehmi a si. Kaa timhmi cu Nu Mary ka dawtnak langhternak caah Nu Mary langhnak vialte hi Laiholh in letdih ning law Laimi (Chinmi) Khrihfa hna vialte nih rel kho ve u sih ti ka duh caah a si.
A lehṭu—— Mr. Anthony Ngun Kung