Jesuh a Herhlo
PA CHAN
Thlahmi
8. Pa chan cu Biakam hlun chan a si. Pathian a zummi hna cu Pathian bia an ngai, anmah tein raithawinak an pek i Pathian an biak tikah Pathian lungtlinnak an co; zoh dingah; – Abel (cf. Gen. 6:9-10,20), Abraham (cf. Gen. 15:6; 22:13) le midang tampi zong an si. Melkhizadek cu cungnungbik Pathian i Tlangbawi (cf. Gen. 14:18) a si i amah biahla ṭialmi zeihmanh a um lo; Pathian Fapa bantuk a si tiah a ti (cf. Heb. 7:3).
Pathian nih, a thimmi Israel miphun hna sinah Moses a thlah i (cf. Ex. 3:15) anmah kilvengtu dingah vancungmi a thlah (cf. Ex. 23:20). Pathian nih, a lianngannak huham in a umpi hna (cf. Ex. 40:34), ahleice in Thlarau huham pali a simi Tuukhaal, Lungpi, Tawhfung le Tlangbawi sinakin a umpi hna.
Ex. 3:15 “Cun Moses sinah cun, ‘Pathian nih nan sinah aa ka tlah tiin Israelmi hna sinah na chimh hna lai’ tiah a ti.”
Ex. 23:20 “Nan lamtluan ah an kilvengtu hna dingah vancungmi ka thlah lai.”
Ex. 40:34 “Thlam cu minmei nih a hup i Bawipa sunparnak kha a chungah a khat.”
(a) Tuukhaal
Salm 80:1 “Maw Israel Tuukhal, kan bia kan ngaihpiak tuah … kan thlacamnak kan ngaih piak tuah.”
(b) Lungpi
Salm19:14 “Bawipa cu ka himnak Lungpi a si.”
(c) Tawhfung
Is. 22:22 “A kut ah tawhfung pawl ka pek lai i amah nih a onmi cu ahohmanh nih an khar lai lo, amah nih a kharmi cu ahohmanh nih an ong lai lo.”
(d) Tlangbawi sinak
Ex. 28:1 “Ka ca i Tlangbawi ṭuan dingah na u Aaron le a fapa kha na sinah au hna.”
Num. 15:15-16 “Hi bu chungah nannih caah le nannih an pemmi khual hna caah nawlbia pakhat a si lai, nan tefachin tiangin a donglo mi nawlbia a si lai. Bawipa hmaiah mipem zong cu nanmah bantuk an si ve lai.”
Pathian zumhning
9. Pa chanah, Pathian nih Aaron cu Tlangbawi a caanter ruangah (cf. Heb. 5:4), Pathian zumhning aa thleng cang. Mah pumpak cio in Pathian zumh a ngah ti lo. Pathian thlahmi Moses hruainak tangah Israelmi pawl le ramdang (Gentile) mi pawl pumkhat tein Pathian an zumh tik lawngah Pathian nih anmah cu a cohlan hna i vanram an co khawh (cf. Lev. 18:1-2, Ex. 12:49, Num. 15:15-16).
Lev. 18:1-2 “Israelmi hna sin chim dingah Moses sinnah hitihin a chim. Keimah cu Bawipa nan Pathian ka si.”
Ex. 12:49 “Cu phunglam nih cun Israelmi taktak zong kha a nenh hna i nan sin i khua a sami ramdangmi zong kha a nenh hna.”
Num. 15:15-16 “Hi bu chungah nannih caah le nannih an pemmi khual hna caah nawlbia pakhat a si lai, nan tefachin tiangin a donglomi nawlbia a si lai. Bawipa hmaiah mipem zong cu nanmah bantuk an si ve lai.”
Pathian bia ngaihning
10. Pathian nih, Moses le Profet hna sinin bia a chim i an bia a ngaimi hna cu Pathian bia a ngaimi an si ve caah Pathian lung an tong (cf. Ex. 19:5; Lev. 18:5; Num. 15:15-16).
Ex.19:5 “Atu Ka bia nan ngai i ka nawlbia nan zulh ahcun ka mi taktak nan si lai.”
Lev. 18:5 “Tuah awk kan fialmi hna nan tuah duh i zulh awk kan fialmi hna phunglam nan zulh duh … cutin nan tuah ahcun nan nung lai..”
Pathian biakning
11. Pa chanah, Pathian zumtu hna cu thisen he anmah tein raithawinak (Mass) tuah in Pathian an biak nain Aaron cu Tlangbawi ngan a can tikah Pathian biakning aa thleng cang. Aaron sinin Tlangbawi sinak a ngahtu Levi hrinsor Tlangbawi pawl lawng nih Israelmi hna caah thisen in raithawinak an tuah khawh. Cuticun a zummi hna cu sual ngaithiamnak an hmuh (cf. Lev 17:11; 5:6).
Lev. 17:11 “Zeibantuk saram a si zongah a thisen cu biakṭheng cungah nan thlet lai. Nunnak a simi thisen nih sual a thian ter.”
Lev. 5:6 “Sualthlah thawinak caah Bawipa sinah tuu a silole meheh nan pek lai. Tlangbawi nih raithawinak an tuah piak hna lai.”
Jesuh a herhlo
12. Pathian thlahmi, Moses zultu hna cu saram thisen in Tlangbawi nih raithawinak a tuahpiak hna nak thawngin sual ngaithiamnak an hmuh. Jesuh a um rih lo caah Jesuh zumh zong a haulo. Jesuh zum loin Pa chanah vancungram a ngahmi tampi an um. Zoh dingah:- Abel, Enok, Noah, Abraham, Isak, Jakop, Josef, Moses, Hlawhhlang nu Rahap (cf. Heb .11:4-33).
Heb. 11:4-31 “Abel… Enok… Noah… Abraham… Isak … Jakop… Josef… Moses… Hlawhhlang nu Rahap…”
Heb. 11:32-33 “Ka chimmi ka nawlhṭhan lai maw? Gideon, Barak, Samson, Jephthah, David, Samuel le profet pawl cu zumhnak he thilṭha an tuah i Pathian biakammi an co.”
Pa chan a dih
13. Tlangbawi ngan Aaron a thih tikah a fapa hna nih pakhat hnu pakhat in an chan cuahmah (cf. Ex. 29:29). Cuticun, Tlangbawi sinak cu an i roh cuahmah hna i (cf. Ezk. 44:28), kum (1300) renglo a rau. Pa chan i Pathian dawtning cu Khrih a rat hlan tiang a kan hupphentu a si caah (cf. Gal. 3:24), Moses le profet hna nih an ṭialmi hna cu, Fapa chan i tipil petu Johan chan tiang lawng hman ding a si (cf. Lk. 16:16). Pa chan i Pathian dawtning cu Khrih nih adongh ter (cf. Rom 10:4).
Ex. 29:29 “Aaron a thih tikah a hnipuan thianghlim cu a fapa pawl nan pek hna lai.”
Ezk. 44:28 “Tlangbawi nan sinak cu chankhat hnu chankhat nan i roh zungzal lai.”
Gal. 3:24 “Phunglam cu Khrih a rat hlan tiang kan himnak a si.”
Lk. 16:16 “Moses le profet hna nih an ṭialmi cu tipil petu Johan chan tiang ca lawng a si.”
Rom. 10:4 “Khrih nih phunglam cu a donghter cang.”
Pa chan i Bu ṭhenṭhek cawnpiaknak
14. Pa chanah, Pathian thlahmi Moses zulh duhlo in Bu ṭhenṭheknak a tuahtu Korah le a zultu hna cu anmah tein an i thlah ruangah, Pathian nih a sunparnak le a Thlarau huham in a kaltak hna i leikak nih a dolh hna. Korah a zultu tlangbawi (250) zong mei nih a kangh dih hna i rai in a thimi cu (14,700) an si. Zeiruangah cuti cun a thah dih hna tiahcun Pathian thlahmi Moses a hlawtu cu Pathian a hlawtu an si ruangah a si (cf. Num. 16:1-3, 4-30; 16:31-50).
Num. 16:1-30 “… Levi hrinmi … Korah cu aa fimter i Moses a do …”
Num. 16:31-50 “… Dathan le Abiram an dirnak vawlei cu a kak i anmah le Korah zultu pawl le an thilri vialte he a dolh dih hna…vawlei cu aa ciipṭhan; cun Bawipa nih mei-alh a run thlak i rimhmui thawinak a petu 250 pawl cu a kangh dih hna, rai in a thimi cu 14700 an si.”