Umm phunli, Minung phunli

Umm (Beel) phunli, Minung phunli

Phunkhatnak Umm (beel) cu a chungah zeihmanh a umlo nain an kharmi, a chin chinhmi umm phun khi a si. Mi cheukhat nih upat awktlak an sinain Pathian bia a thei lomi an si.

 Phunhnihnak umm cu a chungah a khat ko nain hunmi, a chin chinh lomi an si. Cheukhat minung cu upat hmaizah tlak an si lo nain Pathian bia a hngal ngai mi an rak si.

Phunthumnak umm tu cu a chung a lawngpi, a chin zong chinh lo aa hungmi a si. Cubantuk mi hna cu muihmel zong dawh lo, dinnak (Bible) zong zeihmanh a thei lomi hna khi an si.

Umm phunlinak cu a chung zong a khah, a chin zong chinhmi umm phun an si. Upat hmaizah awktlak an si bangin, ahmaanmi thil, dinnak (Bible) zong a thei i a hngalmi hna kha hi umm he aa khahchunh hna.

Bible Thiang chung i Mihrut phunli

Phungthlukbia chungah mihrut phunli kha a langhter. Phut. 30:11-14 chungah a um.

An pale kha chiat a serh i an nule kha a thangṭhat lomi, anmah an i hmuhnak ahcun a thiang i an fihnunnak a thianh ṭung lomi, a ṭhatuk hringhran ah aa ruatmi, sifakmi kha ṭam dinawk ah le chambaumi kha ei dinawk ah a ha vainam a si i a khabe ah kawngthun aa bunhmi minung phun” hi an um.

Tlawmpalte kan fianter ahcun pakhatnak phun hi nu le pa lawmhnak a theithiam lomi an si. A pa kha chiat a serh i a nu kha upat thangṭhat awk a hngal lomi an si. “Na nu le na pa upat hna” a timi nawlbia a buartu an si. Nu le pa chimhhrinnak kha a ngai lomi hna cu palhnak lam zulh a fawimi an si.

Phunhnihnak cu mah pumpak kha sualnak ka tuah lo, tiah aa ruatmi an si. Sualthlahnak tuah a herh lo. Sualnak ka tuah ṭunglo a timi hna an si. Cubantuk minung hna nih cun Bawipa thlacamnak le Nu Mary sin thlacamnak hi an cam awk a si ti lo. Zeicah kan ti ahcun kan sualnak kan ngaihthiam ve tuah;- thla kan campiak tuah timi biafang hna aa tel caah a si.

“Pathumnak phunkhat cu ruamkai in aa uahmi pawl an si. Aa porhlawt thiammi minung an si caah lukun a thiam lomi an si. Ahohmanh zeiah ka rel hna lo a timi phun an si.”

Palinak phun cu misifak hna kha an eihmuar dingah vainam a ngeimi, thi dop dingah ha a ngeimi hna an si i a hleicein minung zuarthlaimi hna an si. Amiak tampi lakin amiak a eimi hna zong hibantuk minung phun hi an si ve.

Hi minung phunli hna hi mihrut cazin ah a lutmi an si, tiah Bible nih a chim mi cu an si. Cu hna cu nu le pa upat lomi, chiaṭha thleidannak lungthin a thimi, ruamkaimi hna le misifak hna thi a dopmi” an si. Atu ka chimcia mi minung phunli hi Bible Cahlun chungin a si i Bible Cathar (Biakam thar) i Jesuh Khrih nih a chimmi kan zoh tuah lai.

Jesuh Khrih nih a chimmi minung phunli

Jesuh Khrih nih minung phunli kha vawlei phunli he a khahchunh. Matthai dal (13) nak ah kan zoh ahcun thlaici vorhtu bianabia ah khan thlaici vorhtu pa kong kan hmuh lai.

“Pakhatnak phun cu lamhril kachaang vawlei an si. Thlaci biatak (Bible) a si caah phunṭha phunthiang mi a si. Vawlei phun cungah aa hngat. Kachaang- lamhril i a tlami thlaici cu vate nih an char i mi nih an lamh caah a kung an ṭhang kho lo.”

“Phunhnihnak vawlei cu non a pan deuhnak lung vawlei an si. A kung a rak kheuh ko nain ni a lin tikah a linhnak an tuar kho lo i an uai dih.”

“Vawlei phunthumnak cu hling a tammi vawlei an si. Thlaici hna cu a kung an kheuh ko nain hling nih an zual hna i an ṭhang kho ti lo.”

“Phunlinak vawlei tu cu non a ṭhami vawlei ṭha a si caah zualtu naidemhnak umlo, rambelh zong a um lomi vawlei an si. Cuka hmun i a tlami thlaici tu cu letzakhat, let sawmruk, let sawmthum in an vui an tlai. Hi vawlei phunli he aa lomi minung hna cu; mi sawhsawh zong nih theih khawhnak dingah kan fianter a si ahcun, Pakhatnak phun cu lam hril-kachaang vawlei phun, biatak kha an ngaih nain a kehlei hnakhaw in a lut i an orhlei hnakhaw in a chuakṭhan mi phun an si. Zeihmanh a tang lo.”

Pahnihnak miphun hna cu lung nih a danhmi vawlei phun an si. An hnakhaw in a lut i an ka in a chuakṭhan mi minung phun an si. Kan chim ahcun “Bawipa thawngṭha cu a ṭhatuk” an ti i “zeicah a ṭhat” tiah kan hal hna ahcun, “Kan ni peng i kan ngu kho lo” tiah an kan leh. “Zei cawnnak dah naa laak” tiah kan hal hna tikah ‘Ka hngal lo’ tiah an kan leh.

“Phunthumnak vawlei phun cu hling tammi vawlei an si. Phungbia an ngaih tikah an hnakhaw in a lut i an thinlung tiang a khenmi hna an si. Asinain lungretheihnak hna, rian le khai hna lakah phungbia lei i zuam awk a philh tawnmi hna an si. “Nunning ziaza ah lungrawk ngaimi an si, Asinain kaa manh rih lo a timi hna an si.”

Ahnubik vawlei phun cu vawlei ṭha vawlei thiang phun an si. Phungbia (Bible bia) kha an hnakhaw ah a lut i an thinlung tiang a khenh lawng siloin kuttongh in aa zuam a tuah mi hna an si. An lu (Head) in an thinlung (Heart) tiang a phak lawng siloin kuttongh (Hand) in a sakmi hna an si. A ṭhami pahrang (ပါရမီ) theipar hna a let tampi in a tlai kho mi hna an si.

 Kha! a si ahcun careltu hawikom unau vialte hna kan umnak cio in kannih pumpak cio kha i hlathlai (check) hna u sih!

Hnakhaw in a lut i a chuakṭhan mi minung phun maw ka si; Hnakhaw in a lut i Kaa in a chuakṭhan mi minung phun maw ka si; Hnakhaw in a lut i thinlung in a chuakṭhan mi minung phun maw ka si?

Hnakhaw in a lut i kuttongh in a tuahmi phun dah ka si. Hi vawlei minung phunphun chungin zeibantuk miphun chungah dah kaa tel tiah cekhlat hnuah remh a herhmi kha i remh cio hna u sih! Tlokciar mi nakin kuttongh a simi tuahnak lawng kha ṭuanchuah cang hna u sih.

“Hna nan ngeih ahcun thei ko uh” (Mt; 13:9).