Daily Reflection

Mithiang Ambrose, bishop nih a ṭialmi Thilthup kong cauk chungin

Tipil inhnu phunglam kong cawnpiaknak

Hi hnuah, tlangbawi sinah na hung kal. Ahnu i a cangmi kha ruathmanh. David nih a chimmi cu a si lo maw: lucung i chiti bantukin, Aaron i khahmul cungah a luangmi bantuk a si. Hihi Solomon nih a chimmi chiti cu a si: Na min cu chiti thlet a si caah ngaknu hna nih an in dawt i an in hnuh. Nihin ah hrinṭhanmi thlarau zeizat nih dah an in dawt,  Na hnuah kan hnuh hna; na thilthuam rimhmui he, thawhṭhannak rimhmui thawh awkah kan in zulh colh lai.

Zeiruang ahdah cutin tuah a si ti kha hngalhthiam: Zeicatiah mifim pa mit cu a lu ah a um caah a si. Chiti cu khahmul cungah a luang, cucu mino dawhnak cungah a si; nangmah kha thimmi miphun, tlangbawi phun, man fakpiin cawkmi ah ser awkah Aaron khabe cungah a luang. Kan dihlak in Pathian pennak le tlangbawi sinak ah i tel ve dingin thlarau vel in chiti thuh kan si.  

Cun salm caṭialtu nih a rak chimchung bantukin sualnak puan kha nan phoih i sualnak ngei lonak puan thiang kha nan i hruk cang ti langhternak caah puanrang kha nan hmuh, cu bantukin salm catialtu nih a rak chimchungmi cu: Hyssop thing he na ka theh lai i ka thian lai, na ka ṭawl lai i hawhra nakin ka rang deuh lai. Tipil a ingmi pakhat cu nawlbia le Thawngṭha leiin a thiangmi a si tiah hmuh a si. Nawlbia he pehtlaiin, zeicatiah Moses nih tuufa thisen thehnak ah hyssop thingtum a hman caah; Thawngṭha kong he pehtlai in, Khrih nih a thawhṭhannak sunparnak kha Thawngṭha ah a langhter tikah a thilthuam cu vur bantukin a rang. Ngaihthiam a simi misual cu hawhra nakin a rang deuh. Bawipa nih Isaiah hmang in bia a kan kamh ve: Nan sualnak cu a senmi a si ahcun, hawhra bantukin ka rangter hna lai.

Ti in hrinṭhannak ah pekmi thilthuam aa hruk i, Khrihfabu nih, Hlabia biafang in a ti: Jerusalem fanu hna Kei cu ka sen nain ka dawh. Minung sinak derthawmnak ruangah a nak, zangfahnak thawngin aa dawh; misual hna in sermi a sic aah a nak, zumhnak sacrament thawngin aa dawh. Hi thilthuam pawl an hmuh tikah Jerusalem fanu hna cu khuaruahhar in an au: Hihi ahodah a si, a rangmi thilthuam aa hrukmi? Amah cu a nak, zeitindah ruahlopi in mirang ah a cang?   

Khrih nih a Khrihfabu cu a rang in aa hrukmi a hmuh tikah – amah zar ah Amah hrimhrim nih thilthuam thurhnawm aa hruk, Zekhariah chimchungbia ah na rel khawh bantukin – hrinṭhannak ti nih a thiangmi thlarau a hmuh tikah, a au: Zeitluk in dah na dawh, ka dawtmi, zeitluk in dah na dawh; na mit cu ṭhuro mit bantuk a si, zeicahtiah ṭhuro bantuk in Thiang Thlarau cu van in a rung ṭum.

Cucaah thlarau hmelchunhnak, fimnak le hngalhthiamnak thlarau, hngalhnak le upatnak thlarau le a thiangmi ṭihnak thlarau kha nan hmuh kha philh hlah u. Na hmuhmi kha him tein chiah. Pa Pathian nih hmelchunhnak an tuah hna, Khrih Bawipa nih thazaang an pek hna i a ra laimi thil caah biakamnak caah Thlarau kha nan lungthin chungah a thlah hna, cucu Lamkaltu sinin relnak ah nan cawn.

Lehnak

Thawngṭha kha nan zumh i Thiang Thlarau cakhenh in khenh nan si cang, cucu Pathian nih a ta ah a chiahmi hna caah luatnak a pemi kan ro ca i biakamnak a si.

Pathian nih chiti a kan thuh, biakamnak a kan pek, kan lungthin chungah kan i kenmi Thlarau, cun a hmelchunhnak in a kan hmelchunh, cu nih cun Pathian nih amah ta ah a lakmi hna caah luatnak a pek hna.