My Lord and My God

Mithiang Gregory the Great, pope i Thawngṭha chimmi chungin

Ka Bawipa le ka Pathian

Zultu hleihnih lak i aa telmi, Faphir tiah auhmi Thomas cu Jesuh a rat ah khan an sinah a um lo. Amah lawng hi a um lomi Zultu a si; a kir tikah thil sining cu a theih nain a zum duh lo. Bawipa cu a voihnihnak a ra; zumlotu Zultu nih tawngh awkah a hnak kha a pek, a kut a samh i a hma kha a langhter, a zumh lonak hma kha a damter.

Dawtmi hna, hi thil cangmi hna ahhin zeidah na hmuh? Hi thimmi Zultu a umlo, cun a ra i a theih, a theih i a lunghrinh, a lunghrinh i a tawngh, a tawngh i a zumh ti kha na zumh taktak maw? A cangmi thil ruangah si loin Pathian zohkhenhnak in a si. Khuaruahhar lam in Pathian zaangfahnak nih zumlotu Zultu nih a bawipa pum hma a tawngh tikah kan zumh lonak hma kha a damter lai tiah a kan timhtuah. Thomas i zumh lonak nih zultu dang hna i zumhnak nakin kan zumhnak caah rian a ṭuan deuh. Khrih a tawngh i zumhnak ah a luhter tikah, lunghrinhnak vialte cu hrial dih a si i kan zumhnak cu a fek chin. Cucaah, lunghrinhnak a ngeimi, cun Khrih i a hma hna kha a tuar i thawhṭhannak i ahmaanmi tehte ah a cang.

Khrih kha a tawngh i, a au: Ka Bawipa le ka Pathian. Jesuh nih a thawh i: Thomas, na ka hmuh caah na ka zumh. Paul nih hitin a ti: Zumhnak cu kan i ruahchanmi kan hmuh lai ti hngalhnak a si. Cucaah, zumhnak cu hmuh khawh lomi thil a langhtertu a si ti cu a fiang ko. Hmuh khawhmi nih hngalhnak a pek, zumhnak a pek lo. Thomas nih a hmuh i a tawngh tikah, zeicahdah hitin an ti: Na ka hmuh caah na zumh? Zeicahtiah a hmuhmi le a zumhmi cu aa dangmi an si caah a si. Pathian cu a thi khomi minung nih hmuh khawh a si lo. Thomas nih minung pakhat a hmuh, cu pa cu Pathian a si tiah a cohlan i: Ka Bawipa le ka Pathian a ti. A hmuh tikah a zumh; minung taktak a simi pakhat kha a zoh i, hi pa hi Pathian a si, ka hmuh khawh lomi Pathian a si tiah a au.

A tanglei ahhin lawmhnak nganpi a chuahtertu a si: A hmu lomi le a zummi cu lunglawmmi nan va si dah. Hika ahhin kanmah le kanmah kong a bik in langhternak a um; taksa in kan hmuh bal lomi pakhat kha kan lungthin chungah kan i tlaih. Hi bia hna ahhin kan i tel ko nain, kan zumhnak kha thilṭha tuahnak in kan zulh lawngah kan i tel. Zumtu taktak nih cun a zumhmi kha a tuah. Asinain zumhnak kha hmur lawng in a chimmi hna kongah Paul nih hitin a chim: Pathian cu kan hngalh tiah an ti, asinain an tuahsernak ah an hlawt. Cucaah Jeim nih: Tuahsernak aa tel lomi zumhnak cu a thi a ti.

Lehnak

Nunnak cu hmuh khawh a si cang; kan hmuh i tehte kan khan, cun hika ah hin Pa he a ummi le kan hmuh khawhmi zungzal nunnak kha kan in chimh hna.

Nunnak a simi Bia cu kan mit hrimhrim in kan hmuh i kan kut in kan tongh. Kan hmuhmi le kan theihmi cu Pa sin i a ummi nunnak kong kha kan chimh hna.