ST. JOSAPHAT (1580-1623)

Tuesday, November 12, 2019

(Bishop le Martyr)

            Bupi pumkhat sinak fakpiin aa zuam buin a rak thimi mithiang Josaphat cu kum 1580, Ukrian ram Vladimir ah a chuak. Vilna khua in chawdawrpa pakhat sin i rian a ṭtuan lioah sipuayi leiah ṭtuanṭti ding le a bawipa fanu pakhatkhat he ṭthitum dingin sawm a rak si nain Josaphat cu Zateik pakhat sidingin biachahnak a rak ngeihcang caah a al hna. 1604 kumah Vilna khua Thumkomh Pathian Zateik Sianginn ah a lut i a rauh hlanah Siangbawi caannak a hmuh. A dinfel tukmi, nunnak, pum semrel nunnak in a rak nung i Arthodox bu le Rome bu i komhṭthannak caah fakpiin a rak chim.

            1617 kum ah Polotsk khua Bishop ah riankhinh a rak si hnuah Pathian bia cawnnak cauk a rak chuah. Josaphat cu abikin voikhatnak tamdeuh in leh aa thahmi Siangbawi hna kha thlen le ṭthanchoter dingah bia a khiah. Hika zawnah hin kan theihawk cu, (nichuah lei Orthodox pawl Canon upadi ningin leh aa thahmi kha Siangbawi cannak pekkhawh an si nain, a nupi a thih ahcun lehthahnak nawl a ngei ti lo). Josaphat i thawngṭtha rianah teinak a hmuhmi nih Orthodox bu hna kha fakpiin an thin a hunter hna. Annih nih Josaphat kha “Tharau fir” tiah an auh. Josaphat nih, “Keimah cu Rome bu he komhding le St. Peter (Pope) i nawlngeihnak caah thih dingin timhcia ka si,” tiah a rak chim. 1623 kum ah Josaphat cu zingka thlacam dingin Biakinn lei a kal lioah kalsual (zumhnak a palhmi hna) mi hna nih an rak doh i meithal kahnak in a rak thi.