GUADALUPE NU MARY
GUADALUPE NU MARY (1531)
Khrih kum 1531 ah Nu Mary cu Mexico ram Guadalupe khua, Juan Diego sinah langhnak a hmuhsak. A nuam i aa dawhngai mi December ni 9 zingah Juan Diego cu Biakinn lei panh in a kal lioah vafate hna i duhnung awthawng in nunnem tarnu pakhat min “Yuan Diego, Yuan Diego” tiin auh thawng a theih. Lam khat telei tlangbo ah khan a vun zoh tikah nika bantukin a tleu i mansung lung cungah a ṭhumi Nu Mary kha a vun hmuh. Nu Mary nih “Keimah; minung hna cungah tahchunh khawh lo dawtnak le zaangfahnak, bawmhchanhnak le khamhnak hna tuah khawhnak caah titling cungah Biakinn pakhat kha, in ka sakpiak hna seh ti ka duh tuk,” tiah a rak chimh. Juan Diego zong nih hmakhatlo ah Bishop pa sinah thil sining dihlak kha a chimh ko nain a rak zumh lo. Cuticun harnak a ton tikah Diego cu langhnak a rak hmuhnak tlangbo lei ahcun a rak kir ṭhan i vel he a khatmi Nu Mary sinah “Ka dawtmi Nu Mary, hi bantuk harngai in ṭuanawk rianṭuanvo caah a biapi i thil ti khomi pakhatkhat sinah langhnak na hmuhsak ahcun annih zong nih an i zumh lai i an tuah hnga. Kei tucu a hme tukmi le santlai lomi sifak pei ka si ko cu,” tiah a chimh ṭhanko nain Nu Mary nih, “Ka dawt ka fapa… thaizing khuadei zingka ah Bishop sin va kal ṭhan law, Nu Mary nih a ka thlah tiah va chimh ṭhan” ti lawngin a rak leh. Juan Diego zong nih Nu Mary bia kha a ngai i Bishop pa sinah a va chimh ṭhan. Tutan cu Bishoppa nih khuaruahhar thil pakhat tal langhter dingin a hal. Cu tikah Nu Mary cu Juan Diego sinah a langhṭhan i cu hmun tlangbo cung i a hmuhmi hninsi par poah kha a ṭawh i angkifual in na fun hnuah Bishoppa kha na hmuhsak lai tiah a chimh. Nu Mary nih a chimh ningin a tuah i Bishoppa hmaiah cun a kaupiak. Cu bak ahcun khuaruahhar hninsipar pakhat chungin Nu Mary cu a lang. Cu langhnak a hmuh hnuah Bishoppa zong nih Nu Mary nawl a ngaih i cu hmun ahcun Biakinn pakhat a sak. Cu Biakinn ah langhnak a rak hmuhsakmi angkifual upat pekchanhnak kha hlunghlai ngaiin a tuah. Guadalupe Nu Mary cu a min a rak thangchin lengmang hnuah American mi hna bawmtu Guadalupe Nu Mary a si ti fehternak an rak thanh.