St. Joseph Sister pawl nih Hakha ah an phu phaknak Golden Jubilee Puai an tuah (19 March 2025)
Hakha Diocese i Bishop Lucius Hre Kung nih St. Joseph Sister pawl i Hakha an phaknak Golden Jubilee cu St. Joseph Cathedral Hakha ah Lunglawmhnak Missa Raithawinak an tuah i Bishop nih a hruai hna.
Cu Missa ah Bishop (1), Tlangbawi (16), Sister (25) le Zumtu Khrihfa ulenau (500) hrawng nih St. Joseph’s Sisters of Apparition phu pawl i Chinram chaklei Hakha an phaknak Golden Jubilee Lawmhnak Missa ah an i tel.
Bishop nih “Pathian hi amah duhning lam in thil a tuah duhmi a um i ahmebik a tuahmi hmanh kha philh awk a ṭha tilo”. Bishop nih papek in St. Joseph i nunnak kha a chim. Joseph cu Bawhte Jesuh le a Nu Mary kilven le lam hmuhsak dingah mission rian a ngei. Bupi chungah kannih vialte zongnih kan sining cio in mission rian kan ngei ve. Bawipa i a Pum; Khrihfabu zong St. Joseph i kilvennak le zohkhenhnak tangah pek asi, Bawipa nih Mithiang Joseph kha Bawhte Jesuh le a Nu Mary zohekhenh le kilven awkah rian a pek bantukin kannih pakhat cio zong Bupi chungin Mission rianṭuan awkah thim kan si ve.
Kannih Khrihfa hna nih Bawipa sinin a ṭhami thil pakhatkhat kan i ruahchan ve, nulepa hna nih an fale kha Bupi le mipi caah fale ṭha hna canding an i ruahchan bantukin a si.
Bishop nih papek in a chimchap mi cu “ramchungmi ṭha, ram caah fale ṭha, kan umhmun Bupi le mipi caah kannih pakhat cio cu ruahchanmi kan si. Bible chungin Joseph i daitein a umnak kha a sawh, Anih cu a daituk a ti. Sihmanhsehlaw amah minung hna caah aa pekchanhmi hi tahkhawh asilo. Phungchimnak ah a thiammi kan simen lailo, Joseph bantuk diate nunnak ah, mipi caah tahkhawh asi lomi thil hna tampi na tuahkhawh ko lai, kum upa pawl le ngakchia pawl zohkhenh zong hi chanthar vawleicung caah a har ko lai. ~hihphaihnak, harsatnak le vanchiatnak phun zatling tong hmanh usihlaw zeitik hmanhah lungdong hla u sih. Joseph bantuk tein Bawipa kha i bochan hna u sih. Bawipa nih a Fapa ngeihchun kha amah sinah a pek bantukin a Pum asimi kannih hna zong Mary le Bawhte Jesuh bantukin a kan zohkhenh zungzal ko.
Bishop nih chiatserh in biakamhmi kha zumhawk tlaktein hnam (pom) hna u sih tiah a chimchap. Joseph cu a mission kha zeidah asi ti fiangtein a hngalh hlanah ‘ahodah si ti theihlomi sinin Mary nih fa a pawi tikah hlawt (kaltak) dingin a ruat. Sihmanhsehlaw, Joseph nih a ruatmi asiloah a mang chung i vancungmi bia hna kha ngaih awk le zulh awk ti a hngalh. Vancung i awthawng kha a zumh i a cohlan cangka in “ral hna i thah dingmi Bawhte Jesuh khamh dingah ṭhihphaihnak a phunphun a tongcolh”. Vancung i ruahnak cheuhnak thawngin khua pakhat in a dang pakhat ah a zam.
Kan nunnak zongah, midang khamhawk le midang ca ṭhatnak tuahawk ah Khrihfabu le Pathian miphun ṭhatnak caah, kan pumpak duh i sum ding asi tawn.
Myanmar ram a laicer i ummi Mandalay ah St. Joseph Siter pawl cu 1847 ah an phan. Rev. Fr. Alphonse U Ko Lay nawlnak thawngin St. Joseph Sister phu chung i Sr. Assumpta Wong cu Chinram chaklei i Hakha ah 1975 kumah a phan. Amah cu an Convent i hruaitu lubik asi. Bishop Nicholas Mang Thang (Archbishop Emeritus) nawlnak thawngin Sr. Wong cu dirh thar asimi “St. Teresa of the Child Jesus” Sister p awl phu i lam hruaitu le cawnpiaktu ah thim asi i a vawlei nunnak a dongh kum 2024 tiang ‘The Little Way Sisters’ phu i Moderator (Cawisantu) rian a ṭuan tiah Bishop nih a bia a dongh ter.