Pope: Jesuh nih na sining a theih dih i amah he kalṭi awk ah an sawm zungzal

Peru ram Lima khua ah thlacamnak le tonpumhnak a ngeih lio ah, sualnak le palhnak ruang ah nun thar thawk ding ah a tlai cang tiah ruat hlah u. Jesuh kha zoh u! Khrih nih nan sining le nan sualpalh nak vialte a theih dih ko i amah he kalṭi awk ah an sawm zungzal ko hna tiah mino hna sin ah Pope nih thazaang a pek hna. Cawn nili ni ah Pope Leo 14 cu Lima khua Estadio Nacional ah mino hna le university siangngakchia hna he thlacamnak an tuah. Bawipa kawh auhnak aw ngai in a hnu zulh awk ah, na hmailei caan saupi kha a hlankan i i timhlamh ciammam le faktuk in tuantaan awk a herh lo. Nihin ah na sikhawh tawk tein kar hlan i zuam ko. A dawtnak kha zum law i bochan. Bawipa nih lam an hmuhsak lai tiah ati. Mino hna nih hmailei nunnak khuasaknak ah kawlmi le biahalnak tampi an ngei i a cheukhat biahalnak le lungawṭawmnak cu caan saupi tiang lungthin chung ah a caam tawn tiah a ti. Zeiti thlacam awk na theih lo lio caan zong ah Bawipa sin ah na lungchung ummi biachim ding kha ṭih hlah. Kan mitthli le kan halmi kan hmuh rih lo mi thil vialte kha Bawipa nih a hngalh dih. Kan zumhnak nih harnak lamtluan ah fektein kan dir khawhnak hnga thazaang a kan pek i, sifahnak le harnak zeizong vialte a donghnak an si lo a ti. Kan tonmi ngaihchiatnak le lungretheihnak hna kan tuar khawhnak ding ah caan pek a herh tawn bang in cheu khat hna caah cun hawikom ṭha le bawmtu ṭha ngeih a herhnak kong zong a fianter.

Midang ruahnak in nung hlah, ruahnak ṭha lo aw kha ngai hlah law i hlenter hna hlah. Midang nih an tuah khawhlo mi thil tuah khawh ding in Pathian nih a dang tein an ser. Pathian duhnak tuah le a kawh-auhnak kan zul ti mi cu, kan saduhthah le kan chunmang vialte kha hlawt in ah kan ruah tawn. Hi bantuk ruahnak cu ṭihnungmi ruahnak an si i, Pathian cung ah lunghrinnak a chuahter. Lunglawm tein khuasak tintuknak vialte cu Pathian nih a kan chuh i duhdim tein um a kan sianh lo tiah kan ruah tawn. Minung cu nunnuam tein kan um khawhnak ding ah sual zong kan tuah a herh tiah a ruatmi kan um tawn. Cubantuk tukforhnak hna hi ṭha tein thleidan thiam a herh i Pope Benedict 16 nih a rak chim bang in, zeibantuk sualnak le ṭhatlo nak paoh cu minung caah sivai ṭhalo an si a ti mi kha hngalh a hau, tiah a ti. Cu asi caah, dawtmi mino vialte hna, daitein in thlacam caan le daitein Bawipa thisa hmai ah um caan ngeihnak thawng in Bawipa he i ton awk ah Pope nih Peru mino hna sin ah thazaang peknak a ngeih hna.