Vanmi Bawi hna Puai
Nihin September (29) ni cu St. Michael, St. Gabriel le St. Raphael hna i Vanmi bawi hna an puai hi Bupi nih a kan tuahpiak i, hi hna vawlei taksa a ngei lomi van mithiang, vanmirun bawipa hna hi upatnak le nawlnak a tuahmi ah hin kannih vialte nih hi hna, mithiang vialte hna nih zeidah an kan tuahpiak i, zeidah anmah nunnak in kan i cawn hna lai timi hi tlawmpalte kha ruah ṭi kha kan duh hna.
A pakhatnak ahcun van ralbawi Michael timi hi amah cu Pathian vanmi ralbawi, cun Pathian mi vialte hna kha ralteinak ah a hruaitu van mithiang Pathian le a miphun hna ṭanhtu kha a si. Amah nih hi Satan le Santan rul kha le a vanmi hawi hna kha an tei khawhnak hna kha zeitindah a si tiah cun Michael hi Pathian a ṭanhtu a si. Cun Lucifar timi limkengpi hi keimah tiah aa timi Pathian zeiah a rel lomi vanmi kha a si. Cucaah anih kha an doh tikah cun Pathian a ṭanhtu Michael le a vanralkap pawl hna nih khan teinak kha an hmuh ti kha kan theih tikah cun kannih vialte zong nih khan Pathian leikap ah kan ni ṭan a si ahcun le Pathian nih a kan ṭanpi a si ahcun vawlei ah hin a kan teitu ding ral hi an um lai lo timi kha zum usih.
Mithiang Paul nih khan Pathian hi kanmah leikap ah a ṭan a si ahcun ahodah a kan tei kho lai timi kha a chim bantukin khan kannih vialte zong nih Michael bantukin khan Pathian leikap ah, Pathian caah, a bupi caah kan dir peng le kan khamh a si ahcun Pathian nih a kan ṭanpi lai i vawlei kan ral, kan thlarau ral zong kha teinak ṭhawnnak thazaang kha a kan pek ve lai ti kha tinkhansa i lak usih.
Cun pahnihnak ah Gabriel. Gabriel cu Johan a chuah lainak kong le cun Jesuh Khrih chuah lainak kong kha a rak thanhtu kha a si. Johan kha anu Elizabeth le apa Zakiriah, an tar hnuah khan thla an cam i, fapate kan ngeih khawhnak hnga tiin khan thla an cammi kha Pathian vancungmi Gabriel nih khan, atu cu naute nan ngei cang lai, na nupi Elizabeth hi a tar cang ko nain khan a tar leiah fapate a pawi lai i, cuticun a miphun Israel mi hna kha an biakmi an Pathian sinah lam a hruai hna lai tiin khan thawng kha a rak thanhtu kha a si.
Cu bantukin kha Nazarath khua zong ah khan Mary sin zongah khan a rak lang i Mary kha thla a cam liote ah khan Gabriel kha a rak lang i kha ti khan, nang cu nu vialte lakah thluachuak nu na si, nau na ngei lai i amin ah Jesuh na sak lai, tiah khan a rak ti i, cun amah cu milian mingan a si lai i cungnungbik Pathian Fapa tiah auh a si lai. Cun a bawi ṭhutdan le a bawinak a uknak cu zungzal in a hmun lai, tiah Gabriel nih a rak chim. Cucaah hi kan khamhnak tuanbia aa thawknak cu Gabriel i thawng peknak, thawngthanhnak thawngin khan a si.
Cucaah dawtmi u le nau hna vawlei cungah lawmhnak a chuahpi bikmi cu hi thawngṭha ruangah hin a si. Cucaah hi thawngṭha taktak a kan phurhtu Johan a chuah lainak kong zong a si ah, Jesuh Khrih a chuah lainak kong zong a si ah hi thawngṭha a kan phurhtu vanmithiang Gabriel cungah khan kannih nih upatnak le thlacamnak kha ngei zungzal usih law kannih vialte zong nih nitinte kan nunnak ah hin Jesuh Khrih kong hi a theih rih lomi vialte hna sinah kan nunnak hi zeitlukdah kan ni pek khawh lai, zeite tal hi Jesuh Khrih caah, khamhnak caah, mi vialte lunglawmhnak chuahtertu le a petu ding caah zeidah kan ni pek khawh lai, zeidah kan tuah khawh lai timi hi kannih vialte zong nih khan i lak usih law nitinte kan nunnak ah kei hi zeidah ka tuah khawh lai. Jesuh Khrih thawngṭhabia caah zeidah ka tuah khawh lai, zeidah ka phawrh khawh lai timi hi i hnaktenh usih law timi hi ruah ṭi ka duh.
Cun a pathumnak ah Raphael timi kong hi a si. Raphael timi cu Tobit cacuk chungah khan kan hmuh. Tobit cauk chungah kan hmuhnak cu Tobit nih a fapa Tobious kha khual a tlawnter i, na khualtlawnnak ah Pathian vancungmi nih an zohkhenh lai, tiah bia a cah i cuti ningte cun Raphael nih khan a lamthluan ah khan a rak zulh taktak. Lam pi ah, tiva an tan tikah ngapi kha an tlaih i ngapi hnit kha a lakter i hihi siiṭha a cang lai, damnak siiṭha ah a cang lai, tiah khan a ti i cuticun a kenter tikah khan an va kal i an tlunnak inntek i an fanu Sarah kha amah ṭhit a duhtu tlangval pasarih kha a rak thihtertu a si. A thihtertu ti cu amah nih a thah si loin khan amah a tlaitu khuachia ṭhalo nih khan a rak tuah hna i an pasarih ning tein an thi. Cucaah a nu le pa zong nih pasal ngeih lai ding zong hi an ṭih ngaingai.
Sihmanhsehlaw, Rafael nih zei a ti, ṭih hlah! Hi fanu hi na ṭhit lai, tiah a ti i zaan an ih hlan ah khan ngahnit kha mei in khan a khangh i mei kha a khut, cucun thla an cam tikah khan a thaizing ah nung le dam tein khan an nung kho. Cucaah Tobious nih Sarah kha dam le lawm tein khan a ṭhit i Rafael bawmhnak thawngin khan a ṭhit khawh i nung le dam tein khan an khua ah khan ai tlungpi khawh timi kha kan theih. Cun an va tlun hnu zongah khan an pa Tobit kha amit a rak cawt caah hi a pa mitcawtnak a damnak hnga caah Tobious nih khan hi ngahnit kha aa lak i a pa mit ah a thuh tikah khan a pa mit kha a dai, khua a hmu ṭhan kho ti a si. Khakha Rafael i tuahsernak thawngin le bawmhnak thawngin khan a si.
Cucaah Rafael nih khan zei a ti, kei cu Pathian nih nanmah bawmh awkah a ka thlahmi, Pathian hmaiah a dirmi vancungmi ka si e, cucaah ahlu zong pek a hau lai lo, tiah khan a ti i a kaltak hna. Cucaah hi Rafael zong hi siibawi hna, nurse mah hna le dam lomi vialte hna i, i bochan tlakmi Rafael ah khan aa cang. Cucaah kannih vialte zong nih khan damnak kan duh a si ahcun, a bikin mit tha dernak, mit khua hmuh lonak kan tuar a si ahcun Rafael sinah khan i bochan usih law thlacam usih.
Cucun siibawi hna le nurse mah hna zong hi Rafael sinah thla an cam i bawmhnak an ngah i mizawmi hna zong kha tampi damnak an pek hna bantukin khan kannih vialte zong nih khan taksa dam lonak, thlarau dam lonak ah khan damnak a pe khotu Jesuh Khrih bantukin khan thlarau siibawi ṭha ah khan Jesuh Khrih a si bantukin khan kanmah vialte zong hi damnak a hmuhtertu, damnak a petu siibawi ṭha ah khan kanmah zong kha kan cang kho ve timi kha tinkhansa i lak usih law timi kha nihin ah nihin ah Mithiang Michael bantukin khan Pathian Bawipa le a bupi ṭanh in khan kan zumhnak kha ṭanh in khan kan nun a si ahcun Bawipa nih teinak a kan pek lai timi kha tinkhansa i lak in cun Gabriel bantukin khan lunglawmhnak thawngṭha a chim khotu le a thanh khotu kan si khonak hnga le a phurtu kan si kho nakhnga zong kha kan i zuam lai.
Rafael bantukin khan khualtlawnnak ah harnak a tongmi hna kha a bawmtu le a damlomi hna a bikin mitzawtnak mit ṭhatlonak kha damnak a pe khotu si awkah khan kannih vialte kha kan i zuam lai timi kha tinkhansa i lak usih.
Thazaang petu /- Fr. Abraham Hrang Hit