The Holy Arch Angels, Michael, Gabriel le Raphael

Vawlei a sem hlan tein thlarau lawng a ngeimi vancungmi hna cu Pathian nih a sangbik dot in a rak ser cang hna. Annih cu pum ngei lo le a thi kho lomi thlarau an si. An min cu anmah le an ttuanmi ttuanvo cung cioah Pathian nih a pek hna.

Pathian he aa lomi tiah suallam a ngeimi Michael cu khuachia hna tuk awkah ttuanvo pekmi a si. Pathian aana ka chut lai tiah aa timmi Lucifer kha vancung in tthawl awkah Michael cu ttuanvo pek a si. Cu hnu ah vancung ah ral a tho. Michael le a vancungmi hna nihcun limkeng kha an doh. Limkeng le a hawile cu umnak an ngei lo. (Bia 12:7-8). Michael cu nifate in khuachia ral kan dohnak ah a kan bawmh. Khuachia cu vawlei can a dongh tikah an sung te lai. (Bia 20:10).

Vanbawi Gabriel (Pathian huham) cu Pathian tthawnnak huham aana kha thanh awkah ttuanvo pek a si. Amah cu nungak thiang Mary sinah Jesuh Khrih kha na pawi lai i na hrin lai tiah thawngttha a rak thanhtu a si. Bawinu nih kei cu nungak thiang pei ka si cu a ti tikah vanbawi Gabriel nih ‘Pathian nih a tuah khawh lomi zeihmanh a um lo’ tiah a leh. (Lk 1:37). Gabriel cu thawngttha a phuangtu hna kha a bawmh hna i ruahchannak ngei lo tiangin harnak kan ton tikah a kan bawmtu a si.

Raphael (Pathian siibawi) cu pumsa le thlarau a dam lomi hna kha thlopbul awkah ttuanvo pekmi a si. Anih cu Tobiah kha lamthluan kipin a rak zohkhenh i, nupi a tthit zan zongah khuachia ral in a khamh. A mit a cawmi Tobiah zong kha a damter. A sining hmaan tein vanbawi a sinak kong a langhter hnu ah Tobiah kha ‘keimah cu zungzal nungmi Pathian hmaika ah a lutchuak mi vanbawi pasarih chungin pakhat; Rapael ka si’ tiah a rak chimh. (Tobiah 12:14).