Nan lakah a hmebikmi cu a nganbik a si
September (28), atu bantukin a biathiang in thazaang i lak ṭi ṭhan dingah caanṭha caan sunglawi a kan serpiaktu kan Pathian a min thiang ka thangṭhat. RVA in thawngṭha a ngaitu zumtu nan dihlak cungah Bawipa nih thluachuahnak in pe ko hna seh.
Nihin September (28) ni ah thawngṭha kan theihmi chungin (Lk. 9:46) chung ta kha nihin caan ah thazaang i lak ṭi dingah chim ka duh. “Nan lakah a hmebikmi cu a nganbik a si” a ti. Zumtu nun kan timi chungah kan ngeih lo awk a ṭha lomi pakhat cu zeidah a si tiah cun toidor nun hi a si. Toidor nun kan ti tikah toidor nun hi bible chungah tampi kan hmuh hna i cu chungin cun a tawi khawh chungin thazaang i lak ṭi dingah nihin caan ah chim ka duh. (Mt. 18:4) chungah, “Vancung Pennak chungah a nganbikmi cu mi toi ah aa dormi a si” tiah Bawi Jesuh Khrih nih fiang tein a kan cawnpiak. (Mt. 23:12) chungah, “Mi toi ah aa dormi cu mi ngan ah ser an si lai” a ti. (Pht. 18:12) chungah, “Upatnak phaknak lam cu toidornak a si” a ti. Cun Mithiang Peter nih Khrihfabu hna ca a kuat tikah, cakuatnak pakhatnak ah (IPeter. 5:5) ah khan zeidah kan hmuh tiah cun, “Toidornak puan kha i aih uh” a ti. Kan Khrihfa sinak ah, Khrihfa nunnak ah a herhtukmi cu “Toidor Nun” hi a si. Hi toidor nun hi bible chungah zeitindah a kan cawnpiak i, cun zumtu hna nih, zumhnak lei i kan pa hna nih zei bantukin dah an rak nunpi timi kha nihin caan ah chim ka duh.
A pakhatnak ah nihin caan ah thazaang pek kan duhmi hna cu Mithiang Peter nun a si. Mithiang Peter cu ngatlaitu a si, Lamkaltu pakhat zong a si. Voikhat cu nga an tlaih lioah khan zankhuadei an sur cu an vorh ko nain pakhat hmanh an tlai lo, a ti. Sihmanhsehlaw Jesuh nih khan, “ti thuknak leiah khan nan lawng kha hei thawn ulaw hei chap u” a ti hna tikah khan Jesuh bia ningte cun an tuah i nga kha tamtuk hringhran an tlaih, ti a si. Cu tikah a hnuah khan Jesuh a si timi kha a hmuh le cangka Jesuh kehram ah a khuk aa bilh i, “Bawipa, kei cu misual ka si, ka kaltak ko” a ti. Cucaah cun Mithiang Peter hi a nunnak ah kan zoh tikah hin Bawipa nih khuaruahhar in a hmanmi pa pakhat a si. Cun zultu vialte, Khrihfa vialte kan lutlai pakhat zong a si. Hihi zeiruang ah a si kan ti ahcun aa toidor ruangah a si ti kha fiang tein kan hmuh khawhmi cu a si. Cucaah cun toidor nun timi cu hruaitu hna kan caah zongah a biapi i zumtu kan dihlak ca’h zongah a biapi ngaimi pakhat a si.
A pahnihnak ah chim ka duhmi cu Moses nun in a si. Moses hi hruaitu ṭha a si i caan saupi Israel miphun, Pathian miphun hruaitu pa a si. Annih hi mifim mithiam a si. Cun ṭhithruainak leiah a thiamtukmi pa a si. Asina tein voikhat cu Pathian nih a auh i, “Moses, ka mi, Israelmi kha na hruai hna lai” a ti tikah hin Moses nih a chimmi cu, “Bawipa kei cu mi chambau ka si, mi tlamtling lo ka si. Keimah nih cun ka tuah kho lai lo” a ti. Sihmanhsehlaw, Pathian nih a timi cu, “Na kal lai i nan sinah keimah nih kan kalpi lai” a ti. Hihi kan zoh tikah bible thiamsang pawl nih an chimmi kan zoh tikah Moses hi a thiam lo ruangah a si lo, a thiamtuk ko nain Pathian hmaiah aa toidortuk mi, Pathian salṭha a si. Cucaah Pathian nih khuaruahhar in a hmangmi pa pakhat a si. Amah chan lioah cun hmelchunhnak tampi a tuah i miphun tampi zong a teitu pa a si. Pathian nih khuaruahhar in a hmangmi pa pakhat a si. Hihi kan zoh tikah toidornak nih hin kan nunnak hi a thlen timi zong kha kan hmuh khawh.
Cun a pathumnak ah hi nicaan ah thazaang i lak ṭi dingah chim ka duhmi cu Mithiang Augustine hi aa toidro tukmi pa a si ti kha a tuanbia kan relnak in kan theih khawh. Cucaah cun Mithiang Augustine hi bible sianginn kipah a theology, a ca ṭialmi hi a cawnglomi pakhat hmanh an um lo timi zong kha kan theih. Cucu a ruang cu zeiruang ah dah a si tiah cun, Pathian hmaiah aa toidor tuk i nun thiangthlim tein a hmangmi pa a si ruangah Pathian nih khuaruahhar in a cawisanmi pa a si ti zong kha kan chim khawh.
Asiahcun dawtmi zumtu nu le pa, u le nau vialte hna kan Bawipa Jesuh Khrih nih ngakchia pakhat kha nihin kan theihmi thawngṭha cu, ngakchia pakhat kha aa auh i, a ti; zultu, Lamkaltu hna lak ah a dirter a ti. A ruang cu Lamkaltu hna nih khan kanmah lak ah ahodah a nganbik, tiah pakhat le pakhat karlak ah minthannak, cun pawrhlawtnak, ruamkainak, zuamcawhnak a um rungah khan kan Bawipa Jesuh nih ngakchia pakhat kha a dirtermi kha a si. Cucaah cun, “hi ngakchia bantukin nan i can lo ahcun Vancung Pennak chungah nan lut kho lai lo. Nan lakah a hmebik cu a nganbik a si lai” a tinak kha a si.
Dawtmi zumtu u le nau vialte hna kannih vialte zong toidor tein Pathian sinah Pathian ṭangah aa dormi le khua a sami si hna usih law, cuticun kan nunnak in Pathian hi sunparnak a pe khotu zumtu ṭha kan si kho lai, timi kha nihin caan ah chim ka duh. Toidornak aa ralkahmi cu pawrhlawtnak a si. Satan cu aa pawrhlawt ruangah Pathian nih dan a tat i, vawlei ah an run thlak, timi cu kan theih. Cucaah cun pawrhlawtnak cu ṭumchuknak a si i; toidonak cu Pathian sinah upatnak le sunparnak phaknak lam a si timi kha nihin caan ah chim ka duh. A ngaitu nan dihlak caah Bawipa nih thluachuahnak kan pek piak hram ko seh.
A hrawmtu: Saya Simon Hram Ling