Nun ṭhing in Nun Thar ah

Bible thiang relding: Ephesians 4:1–7, 11–13; Psalm 19:2–5; Matthew 9:9–13

Nihin kan relmi thawngṭhabia chungah Jesuh nih a zultu si dingin Matthew a auhnak kong kan rel. Amah cu ngunkhuai khawl pakhat a si i midang hna nih an komh duh lomi, an huat mi pakhat zong a si. Sihmanhsehlaw, Jesuh nih cun Matthew i a luan cia a rak nunzia lawng kha zoh loin hmai lei caah ah Amah hnu zultu ṭha a si dingmi in a kawh a si. Jesuh nih: “Ka hnu ka zul” tiin fawi tein a kawh i Matthew zong nih cu kawhnak aw thawng cu zumhnak ngan pi he a leh ve, Jesuh hnu a zulh ve. Cuticun, Matthew nunzia zong cu a hun i theng mi a si.

Jesuh nih kan nih pakhat cio hna zong hi kan tlamtlin lonak tampi lak ah kanmah le kan sining tein a kan kawh cio ve timi hi kan i theih ding a si. Matthew cu Jesuh nih ngunkhuai kholhnak hmun a um lio ah a kawh. A tlin tuk ruangah a kawh mi a si lo. A tlamtlin lo bu tein Jesuh nih a kawh mi a si. Palhnak zong tampi a rak tuah ko men lai. Sihmahsehlaw, Jesuh nih a kawh tikah hin cu palhnak hna cu zoh loin a kawh ko. 

Fim a kan chimh mi cu: Pathian nih kan tlin cikcek hnu ah amah rianṭuan tu si dingin a kan au lo timi hi a si. A kan auh, a kan kawh a si ahcun Amah nih tlam a tlin ter ko lai. Kannih tu nih cun: ka tling rih lo, kaa tlak rih lo, palhnak tuk ka ngei, ka rak nunzia he Pathian rianṭuan ding cu a si kho lo tiin ka ruah sual tawn. Jesuh nih Matthew a kawh nak kan zoh tikah zeidah a kan theihter tiah cun kan rak palhnak hna nih hmai lei kan nun ding lam, Pathian rianṭuannak ding caah dawn khaantu a si lo timi zong kha kan theih ding a si. Sihmahsehlaw, biatak ngaihchihnak cu kan ngeih a herh taktak ve ko. Jesuh hnu zulh kan i timh cang a si ahcun kan nun hlun, kan nun lam ṭhing kha cu kan kal tak a herh ve ko.

Matthew nih Jesuh aw a theih cang ka in a tho, a ngeihchiah vialte a kal tak, a thil ti khawhnak vialte a kal tak i Jesuh hnu a zulh colh. Khua dang zei hmanh a ruat ti lo. Jesuh he an i tonnak thawngin aa rak tinhnak vialte aa thleng dih cang. 

Nihin Paul nih Ephesa mi hna sin ca a kuat mi hna ah: Pathian nih an kawh ning hna he aa tlak tein nung u tiah a ti. Khrihfa a simi paoh cu Pathian kawhnak a cohlaang mi lawng te kan si. Jesuh Khrih zumh ding lawng si loin, a hnu zulh dingin a kan kawh mi kan si caah a kan kawhnak he aa tlak dingin kan nun ding a si.

A kan kawh ning hi aa dang cio kho mi a si.

A cheu cu Siangbawi cannak in kawh an si i Pathian mi hna zohkhenh dingin kawh an si. Biaknak lei ah aa pechan mi hna nih an nunnak Pathian in i ap in Biaknak lei rianthiang ṭuannak in Pathian kawhnak kha an leh ve hna. Nu le pa hna zong fa le hna Pathian duh ning tein le cawnpiak ning tein an nun khawh nak hnga ding caah kawh mi an si ve. Mino hna zong an zaang ṭhawn nak hmangin midang hna ṭhatnak tuahpiak nak ah kawh mi an si ve. Khrihfa hna zong an mah le sining cio in an um nak paoh ah: rianṭuannak hmun ah maw, innchungkhar ah maw, Khrihfa bu chungah maw tiin nunzia dawh tein nun khawh cio dingin kawh mi an si ve. 

Theih ding a simi cu “Kanmah le midang hna he i tahchunh lo ding kha a si. Pathian nih a ka kawhnak ningin fel tein kan nung kho cang maw:” timi biahal nak zong kanmah le kanmah kan i tuah a herh.

Thiamnak le theih-hngalhnak dang cio in kan ngeih mi hna nih Pathian nih kan caah a tinh mi a um caah a si timi zong kan theih a herh fawn. Paul nih hitin a ti: a cheu cu zultu, Profet, evangelist, postor le cawnpiak tu saya ah kawh an si a ti. Pathian thluachuah a phunphun a um. Sihmahsehlaw tinhnak pakhat lawng a um i cucu Khrih pum thiang ser kha a si a ti. 

Bupi chung zongah hi tinhnak he a biapi tuk mi a si. Pakhat cio kan theih nak kan thiamnak hna aa dang cio hna. Ahohmanh nih midang cungah nahchuahnak lungthin kan ngeih lo ding kha a biapi tuk mi a si. Thil phunphun ti khawhnak in Jesuh Khrih a Bupi, a Pum thiang kan ser hna timi kha theih buin nifatin kan nunnak ah Jesuh lungthin, mithiang hna lungthin, Matthew lungput ngeih in Jesuh caah, Pathian Pennak caah kan i zuam cio ding a si. 

Thazaang petu /- Fr. Fidelis Maung Sein