Pathian Pennak Kong Thawngṭha cu Zum ko
Nihin ni ih rel dingin Khrihfa Bupi nih a kan timh piakmi (1Kor. 15:12-20, Lk. 8:1-3) tiang a si. “Cu hnu tlawmpal ahcun Jesuh cu khuapi he, khuate he a tlawng duahmah hna i Pathian Pennak kong thawngṭha kha a chimh hna.
Lamkaltu (12) nih khan an zulh i an zawtnak le thlarau ṭhalo nih a tuah hna nak in a damter mi hna nih khan an zulh ve. Cu hna cu a chungin thlarau ṭhalo pasarih a chuah piakmi Mary Magdalene timi le Herod zung i bawi a simi Khuza nupi Joana le Susana le Jesuh le a zultu hna kha a ngeihmi thil in a rak bawmtu hna nudang tampi kha an si.”
Khrihfa Bupi nih nifatin te biakinn ah Pathian kan biaknak ah kan aupi pengmi cu Khrih cu kan caah a thi, kan ca’h a tho ṭhan i, Khrih cu a ra ṭhan lai; timi zumhnak biathuk pathum ah hin aa funtom dih. Nihin kan relmi thawngṭha chungah kan Bawipa Jesuh Khrih cu khuapi he, khuate he a tlawng duahmanh hna i Pathian Pennak kong thawngṭha a chim e; tiah a ti. Cu Pathian Pennak kong thawngṭha cu zeidah a si kan ti a si ahcun amah a zum i amah aa bochanmi vialte hna caah cun thlanpin nunnak, thih hnu pinlei ah zungzal nunnak a um ti kha a si i vawlei cung mifimthiam, a fimthiamnak nih vawlei cung a rak hnih ve mi, Pathian a rak zum lomi Steven Hawking an timi pa nih Pathian hi a um lo, zeizong thil vialte a sertu Pathian timi hi a um lo.
Minung timi zong hi nunnak pakhat te lawng kan ngei i kan thih te lai i thih hnu pinlei nunnak timi hi a um lo” tiah Steven Hawking nih a rak ti. Cu a rak chimmi bia cu Pope a rak ṭuanmi, atu ah mithiang a si cangmi, Mithiang Pope John Paul II nih a timi cu, “Zeizong thil vialte a sertu Pathian a um ko; timi hi ahohmanh nih nan al awk a si lo, nan doh awk a si lo” tiah Steven Hawking i bia cu Mithiang John Paul II nih bia a rak leh.
Nihin ni ah bible a voikhatnak kan relmi (1Kor. 15) chungah kan hmuh khawhmi cu, “Hi vialte kan chimmi thawngṭha vialte hi: Khrih cu kan caah a thi i a tho ṭhan, timi kong kha kan chim i Khrih a zummi hna cu kan thih tikah thihnak in kan thoṭhan lai, timi kong hi cucu kan kan chim” tiah a ti. Khrih hi thihnak in a tho ṭhan lo nan ti a si ahcun Pathian cu lihchim nan si hnga” a ti.
Cucaah Jesuh Khrih cu thihnak in thawh ṭhan a si bantukin kannih zong thihnak in kan tho ṭhan ve lai, zungzal a sunparnak ah kan i hrawm ve lai ti hi kan chim a si i, Khrih hi a tho ṭhan lo; tiah ti a si si ahcun hi vialte nun thap in thawngṭha kan chimmi vialte hna hi pakpalawng a si hnga i Khrih Jesuh nih ruahchannak a kan ngeihtermi hi, hi vawlei nun chung ca lawng a si ahcun vawlei cungah zaangfah awk tlakmi kan si hnga” a ti. “Sihmanhsehlaw hi biatak cu hihi a si: Khrih cu thihnak in thawhter a si i, cucu thihnak chung i aa hngilhmi hna zong thawhter an si ve lai tinak aamahkhaan cu a si” tiah a ti. Steven Hawking nih a timi cu, “mi nih thihnak in thawh ṭhannak a um an ti lengmang mi hi minung hi kan thi te lai; timi ṭihnak kha an ṭih caah thawh ṭhannak a um ko e, tiah vawlei cung caan tawite an nun chikkhat caan chung te ah hnemhnak bia in an chim a si. Thihnak pinlei ah nunnak ti a um lo” tiah a ti.
Duhdawtmi u le nau, nu le pa hna kawl phungtluk ahcun, “Naa zuam ahcun Pathian na cang lai” ti a si. Sihmanhsehlaw zeitluk kan i zuam hmanh ah Pathian kan cang kho lo natein Jesuh Khrih cu aa zuamnak ruangin thihnak in a tho ṭhan a si lo i, zeizong vialte sertu Pathian nawlngeitu a si caah thihnak nih amah cu a tei lo i, thihnak cu sermi thil nih kan tei kho lomi cu Pathian a simi kan Bawipa Jesuh Khrih nih thihnak cu a tei a si. Cucaah cun Khrih a zummi hna cu Jesuh Khrih thawngin thihnak cu kan tei ve a si. Khrih a zummi vialte hna cu thihnak in kan tho ṭhan te lai i zungzal sunparnak kha kan i hrawm te lai, ti kha kan zumh i kan i ruahchan a si.
Duhdawtmi u le nau, nu le pa hna cucaah cun thihnak in a tho ṭhanmi pa, thihnak a kan teipiaktu kan Bawipa Jesuh Khrih cu i bochan peng usih law ahnu zul peng ko usih. Thihnak in kan thawh ṭhannak hnga ding caah a kan bawmchan khotu cu kan biak kan Pathian a kan dawtu Jesuh Khrih dah ti lo cun vawlei cung thil ah zeihmanh a um lo. Lung si hnangam tein, a hnu zulh in a Pennak kong thawngṭha cu zum ko usih.
Thazaang petu /- Saya Canute Bawi Kam